Read KIMERU BIBLE PROTESTANT EDITION Mal 1 Bible Online

Mal 1 - KIMERU BIBLE PROTESTANT EDITION bible

Mal 1

¹Ijî nîcio nteto irîa MWATHANI eerîre kîroria Malaki ciegiî antû ba Israeli.

² MWATHANI nî eerîre antû baawe atîrî, “Ûûni nî mbwendeete.” Îndî bûrîûria, “Nî njîra irîkû ûtwonagia nacio wendo?” MWATHANI arîbacokeria akabeera atîrî, “Anga Esaû tî mûtaana wa ng'ina wa Jakubu? Amwe na ûu nî mpendeete Jakubu na nchiarwa ciaawe,

³îndî ndaathûûra Esaû na nchiarwa ciaawe. Ndaathûûkangîrie nthîgûrû îrîa Esaû na nchiarwa ciaawe baatûûraga ndaatiga gûntû kûrîa aigwatîrîte kûrî rwanda rwa gûtûûragwa nî mbîrwa.”

⁴Antû ba Edomu, tabo nchiarwa cia Esaû bakëeja kuuga “Kinya këethîra ntûûra cieetû nî ciînyangîtue tûgaaciaka kaîrî.” MWATHANI Mûrungu Mweneinya akabeera, “Kinya bwaciaka, nkaimomoranga.” Antû nabo batue kuuga, “Îîjî nî nthîgûrû înthûûku, mûgongo jûthûûri nî MWATHANI mwanka kenya.”

⁵Aisraeli bakoona mantû jaja na meetho jaao bongwa na bauge atîrî, “MWATHANI nî ûmûnene kinya oome ya mîanka ya nthîgûrû ya Israeli!”

⁶MWATHANI Mweneinya arîîra athînjîri-Mûrungu barîa bamenagîîria riîtwa rîaawe atîrî, “Mwana nî eekagîîra îthe, na nthûûmba nî îkagîîra mwathi waayo. Nkëethîrwa ni ndî abaagu rî, nî bûnkîraga? Nkëethîrwa ndî mwathi weenu rî, nî bûmpejaga gîtîîo? Buî bûrîûria atîrî, ‘Nîatîa tûmenithîtie riîtwa rîaaku?’

⁷Bûrîmenithîtie na njîra ya kûnditîra irio birî na mûgiro kîritîroone gîaakwa kîa igongwana. Ningî nî bûkûûria, ‘Nî njîra irîkû tûregete gûgwîkîîra nacio?’ Bûregete kûmbîkîîra na njîra ya kûthûgaania kîritîro gîaakwa kîa igongwana gîtî na gîtûmi.

⁸ Rîrîa bûritaga nyomoo ciûrîte meetho rî, bûu tî ûthûûku? Kana rîrîa bûritaga igongwana bia nyomoo cionji magûrû kana ciajîtue, bûu tî ûthûûku? Û nenkereeni mûrûngamîîri weenu nyomoo ta iu bwoone këethîra akagwîrua nî buî kana eetîkîîria ûrîa bûkwenda. Ûu nîu MWATHANI Mûrungu Mweneinya akuuga.”

⁹Nandî buî athînjîri-Mûrungu gerieni gûcwaa wega bwa MWATHANI, kwombîka agatwigîîrua kîaao. MWATHANI Mûrungu Mweneinya arîbûûria atîrî, “Nî bûkwona jaaka bûkoona wega bûreetete biewa ta biu?

¹⁰Wûi ndîngîona ûmwe weenu akainga mwari jwa kîurû kenda bûtiga gwakia mwanki kîritîroone gîaakwa kîa igongwana. Ntîkûbwenda na ntîkwenda igongwana biu bûnditagîra.

¹¹Nîkwîthîrwa antû ba gûntû kunthe nthîgûrûûne nî bambîkagîîra ntukû cionthe kuuma rûkîîrî mwanka ûgoro. Ningî nî mbîkagîîrwa gûntû kunthe kûrîa igongwana bia ubaani biritagîrwa.

¹²Îndî buî nî bwîkagîra kîritîro gîaakwa kîa igongwana mûgiro rîrîa bûreetaga irîo birîa bitîbuîri kûritîrwa ku.

¹³Buî bûriuga atîrî, ‘Bûrî înya mono gûtumîkîra Mwathani, na bûkarega kwathîkîra mataaro jaawe.’ Nîu MWATHANI akuuga. MWATHANI arîbûûria atîrî, ‘Nîkî bûndeetagîra igongwana bia into birîa bwiyîte na nyomoo imponju na irîa ciajîtue. Ka-bûkûthûgaania ngeetîkîîria into ta biu kuuma kîrî buî?’

¹⁴Muntû ûrîa ûnditagîra kîgongwana kîa nyomoo îtî înjega, nî ûmûrume nîûntû nî mûrongo ûtîkûûjûria mûciîtio jwaawe jwa kûnditîra kîgongwana kîa nyomoo înjega. MWATHANI Mweneinya ariuga nî mûnene ûmûnene ûkîri nî mîgongo yonthe.”