Read KIMERU BIBLE PROTESTANT EDITION Mal 3 Bible Online

Mal 3 - KIMERU BIBLE PROTESTANT EDITION bible

Mal 3

¹ MWATHANI Mweneinya ariuga atîrî, “Nkaabûtûmîra mûtûmwa waakwa ûrîa ûkaanthuranîrîra njîra. MWATHANI ûrîa bûgûcwa akeeja o rîo kîûrûûne kîaawe. Mûtûmwa ûrîa bwetagîîra kenda bûmwona nî eejîte.”

² Îndî rî, nûû ûûmba kûûmîîria ntukû îîu akeeja? Nûû ûûmba kûrûngama rîrîa agaacionania? Nîkwîthîrwa we akari ta mwanki jûrîa jûkerûraga îthaga na ta sabuni îrîa îthambagia mono.

³Nawe agaakara nthî ta mûkerûri na mûthambia wa fetha, nawe akagambîra athînjîri-Mûrungu abatherie ta thaabu na fetha, mwanka rîrîa bakaaritagîra MWATHANI igongwana birîa biagîrîte.

⁴Rîu MWATHANI akoona igongwana birîa biritagwa nî antû ba nthîgûrû ya Juda na ba ntûûra ya Jerusalemu birî bibiega o ta ûrîa biethagîrwa bibuui îgiita rîa mbere, mîaka îrîa îkûrûkîte.

⁵MWATHANI Mweneinya ariuga atîrî, “Ngaacionania kîrî buî mbûgambîre. Naani nkagîîta mpwîî cia kûgambithia arogi, na amaramari, na barîa baritaga ûkûûjî bwa ûrongo, na barîa baaagia ariti ngûgî baao bakabaa mûchaara jûtî jwa mma, na barîa bainyagîîria ntigwa, na aana barîa batî na aciari na mbîji cia kûngî, na barîa batînkîraga.

⁶“Buî nchiarwa cia Jakubu bûtîthiragua buru nîûntû ûûni MWATHANI ntîgarûkaga.

⁷Buî bûkaraga bûtîkûthingata mawaatho jaakwa o ta ûrîa biûjûjû bieenu biathithagia tene. Nandî cokeeni kîrî ni naani ngaacoka kîrî buî. Nîu ûûni MWATHANI Mweneinya nkuuga. Îndî buî bûrîûria, ‘Nîatîa tûkoomba gûcoka?’

⁸Ka-muntû abuîri kwiya Mûrungu? Îndî buî nîka bûmbiyaga. Buî bûriuga atîrî, ‘Nîmbi twiîte?’ Bûmbiîte ndeene ya kûrita gîcunchî kîmwe kuuma kîrî îkûmi na ndeene ya kûrita biewa.

⁹Ûûni MWATHANI Mweneinya ndîbwîra atîrî, Nî bûgwati nî kîrumi, nîkwîthîrwa buî bûrî mûgongo junthe nî bûmbiyaga.

¹⁰ Reetageni îchunchî bieenu bionthe bia îkûmi nyomba yaakwa, nîkenda kwîthagîrwa kûrî na irio. Ûûni MWATHANI Mweneinya ndîbwîra atîrî, ngerieni ûntûûne bûu, bwone këethîra ntîbûrugûrîra ndiricha cia îgûrû, mburithîrie itharimo biunîkare.

¹¹Ningî ngaakaania tûnyamû tûrîa tûrîîjaga irio bieenu kenda tûtîkarîe maciara ja into birîa bûrîmîte. Nayo mîzabibû ya miuunda yeenu îtîkorotiga gûciara.

¹²Rîu mîgongo yonthe îgaatua kuugaga nî bûtharimi nîkwîthîrwa nthîgûrû yeenu îkethagîrwa îrî înjega ya gûtûûra. Ûu nîu ûûni MWATHANI Mweneinya ndauga.”

¹³MWATHANI Mweneinya arîbwîra atîrî, “Buî nî bwarîîtie mantû jaakwa jamaaî mono. Ningî noka bûgûcoka bûkooria, ‘Nî mantû jaaku jarîkû jamathûûku twarîîtie.’

¹⁴Buî buugîîte atîrî, ‘Nî ûtheri gûtumîkîra Mûrungu. Nî wega bûrîkû twonaga nîûntû bwa kûthingata Waatho bwa MWATHANI Mweneinya kana twaithikîîra nîûntû bwa meeyia jeetû?

¹⁵Tuî twonaga antû barîa baaî bakîona itharimo; ningî bau baaî tî kûthinyaara akî bathinyaaraga, kinya bakageria Mûrungu na moothûûku jaao gûtî u bathithua.’”

¹⁶Rîu antû barîa bakîrîte MWATHANI nî baaranîîrie; MWATHANI arabathikîîra araigua ûrîa baaugaga. Nabo antû bau baakîraga MWATHANI nî baandîkîrwe mariîtwa jaao yukuune rîa kîririkano au mbere ya MWATHANI.

¹⁷MWATHANI Mweneinya arauga atîrî, “Bau nî antû baakwa. Ntukû ya îkanûkia bagatuîka gîntû gîaakwa buru. Ningî nkaabacaîîra o ta ûrîa mûciari acaîîraga mwana waawe ûrîa ûmwathîkîgîra na akamûtumîkîra.

¹⁸O kaîrî antû baakwa bakoona mwanya jwa antû barîa baagîru na barîa baaî, na jwa antû barîa bantumîkagîra na barîa batîntumîkagîra.”