Read KIMERU BIBLE PROTESTANT EDITION Mat 1 Bible Online

Mat 1 - KIMERU BIBLE PROTESTANT EDITION bible

Mat 1

¹Rûrû nîru rûrîîjo rwa Jesû Kristû, mûtaana wa Daudi, mûtaana wa Abrahamu.

²Abrahamu nîwe waarî îthe wa Isaaka. Nawe Isaaka aarî îthe wa Jakubu nawe Jakubu aarî îthe wa Juda na ataana ba ng'ina.

³Juda aarî îthe wa Perezi na Zera na ng'ina waao eetagwa Tamari. Perezi aarî îthe wa Hezironi na Hezironi aarî îthe wa Rami.

⁴Nawe Rami aarî îthe wa Aminadabu na Aminadabu aarî îthe wa Nahashoni na Nahashoni aarî îthe wa Salumoni.

⁵Nawe Salumoni aarî îthe wa Boazi na ng'ina wa Boazi eetagwa Rahabu. Boazi aarî îthe wa Obedi na ng'ina wa Obedi eetagwa Ruthu. Obedi aarî îthe wa Jesii.

⁶Nawe Jesii aarî îthe wa mûnene Daudi. Daudi aarî îthe wa Solomoni na ng'ina wa Solomoni aarî mwekûrû wa Uria.

⁷Solomoni aarî îthe wa Rehoboamu, nawe Rehoboamu aarî îthe wa Abija. Nawe Abija aarî îthe wa Asa nawe Asa aarî îthe wa Jehoshafati.

⁸Jehoshafati aarî îthe wa Joramu na Joramu aarî îthe wa Uzia.

⁹Nawe Uzia aarî îthe wa Jothamu na Jothamu aarî îthe wa Ahazi nawe Ahazi aarî îthe wa Hezekia.

¹⁰Hezekia aarî îthe wa Manase nawe Manase aarî îthe wa Amoni na Amoni aarî îthe wa Josia.

¹¹ Nawe Josia aarî îthe wa Jekonia na ataana ba ng'ina. Îgiita rîu nîrîo Ayahudi bataîrwe baraikua Babiloni.

¹²Barî atae kûu Babiloni, Jekonia aragîa na Shelatieli na Shelatieli araa îthe wa Zerubabeli.

¹³Nawe Zerubabeli aarî îthe wa Abiudi na Abiudi aarî îthe wa Eliakimu. Nawe Eliakimu aarî îthe wa Azori.

¹⁴Azori aarî îthe wa Zadoki na Zadoki aarî îthe wa Akimu. Nawe Akimu aarî îthe wa Eliudi.

¹⁵Eliudi aarî îthe wa Eleazari na Eleazari aarî îthe wa Mathani. Nawe Mathani aarî îthe wa Jakubu.

¹⁶Jakubu aarî îthe wa Josefu nawe Josefu nîwe waarî mûkûrû wa Maria, ûrîa waarî ng'ina wa Jesû ûrîa wîtagwa Kristû.

¹⁷Tontû bûû, kuuma Abrahamu mwanka Daudi kwaarî na nthukî îkûmî na inya. Ningî kuuma Daudi mwanka îgiita rîa gwikua kîthamîrioone kûu Babiloni kwaarî na nthukî îkûmi na inya. Ningî kuuma îgiita rîa kîthamîrio mwanka rîrîa Kristû aaciarîrwe kwaarî na nthukî îkûmi na inya.

¹⁸ Gûciarwa kwa Jesû Kristû gwakari ûjû. Rîrîa Maria ûrîa waeere ng'ina wa Jesû aagambagua nî Josefu, nî aagîîre îu mbere ya Josefu amûgûra. Îîu rîu rîaarî rîa Roho Ûmûtheru.

¹⁹Mûkûrû waawe Josefu aarî muntû ûmwagîru na nî aathûgaanîrie kûmûtiga na witho nîûntû ateendaga kûmwîkîrithia nthao.

²⁰Rîrîa aathûgaanagia ûrîa akamûtiga, mûraîka wa Mwathani nî aamuumîrîîre arî kîrootoone aramwîra atîrî, “Josefu mûtaana wa Daudi, ûgákîra kûgûra Maria aa mwekûrû waaku nîûntû îîu rîu arî narîo rîumanîtie na Roho Ûmûtheru.

²¹ Agaaciara mwana, naagwe ûmwîte Jesû, nîûntû nîwe ûkoonokia antû baawe kuuma meeyiene jaao.”

²²Mantû jau jonthe jaathithîkîre nîkenda rûteto rûrîa kîroria wa Mwathani aarîîrie rûûjûra:

²³ “Mwarî karaiti akagea îu na agaciara kaîjî, nako gageetwa Emanueli, nî ta kuuga, ‘Mûrungu arî amwe naatuî.’”

²⁴Tontû bûû, rîrîa Josefu ookîrîîre kuuma toroone, nî aathithîrie ûrîa mûraîka wa Mwathani amwîrîre na aragûra Maria araa mwekûrû waawe.

²⁵ Îndî atamûthengereere mwanka rîrîa aaciarîre kaana nawe Josefu arageeta Jesû.