Read KIMERU BIBLE PROTESTANT EDITION Mat 10 Bible Online

Mat 10 - KIMERU BIBLE PROTESTANT EDITION bible

Mat 10

¹Jesû nî eetîre aritwa baawe îkûmi na baîrî na arabaa inya ya kwînga roho inthûûku na inya ya kworia mîrimo na woonje bwa mîthemba yonthe.

²Mariîtwa ja atûmwa bau îkûmi na baîrî nîjo jaja: Wa mbere nî Simioni ûrîa weetagwa Peterû, na mûtaana wa ng'ina Anderea. Bangî nî Jakubu wa Zebedii na mûtaana wa ng'ina wa Johana,

³na Filipû na Batholomeo, na Toma na Mathayo ûrîa waarî mûritithia ûgotî; na Jakubu mûtaana wa Alifayo, na Thadeû;

⁴na Simioni wa kuuma Kanaani na Judasi Iskarioti ûrîa waakunyanîîre Jesû.

⁵Jesû agîtûma atûmwa bau îkûmi na baîrî nî aabeerîre ûjû, “Bûgeeteni kîrî antû barîa batî Ayahudi. Ningî bûkéeja gûkûrûka ntûûreene cia Asamaria.

⁶Îndî îteeni kîrî antû ba Israeli nîûntû bakari ta ng'ondu ciûrîte.

⁷ Bweeta tûmîriieni Nteto Injega bûkîugaga, ‘Ûnene bwa îgûrû bûrî akuî.’

⁸Orieeni barîa baajîtue, na bûriûkie barîa bakuîte, na bwoorie barîa barî na mûtigiri, ningî bwînge roho inthûûku. Bweei bûtîkûrîua, kinya buî eejanageni bûtîkûrîia.

⁹Bûgákamata mbeecha cia thaabu kana cia fetha kana cia îturutia mîbukoone yeenu.

¹⁰ Ningî bûgákamata rîîgu kana kabuuti kana îratû, kana rûturo. Nîkwîthîrwa mûriti ngûgî nî aagîrîte kûewa îtuui rîaawe.

¹¹O ntûûra kana mûciî jûrîa bûgakûrûka, cweeni muntû ûrîa ûrîngîenda kûbûgwata ûgeni. Kareeni nawe mwanka rîrîa bûkauma kûu.

¹²Bûgîkûrûka nyomba keethagieni barîa barî ku.

¹³Ningî këethîra eene nyomba bakabûgwata ûgeni, nkeethi cieenu cia thîîrî nî ikare kîrî bo. Îndî bakëeja kûrega kûbûgwata ûgeni, nkeethi cieenu cia thîîrî nî icoke kîrî buî.

¹⁴ Ningî antû barîa batîbûgwata ûgeni kana babûthikîîra, bwatua kuuma ku, ringaringeeni tîîri îrîa îrî magûrûûne jeenu.

¹⁵ Ndîbwîra na mma atîrî, ntukû ya îgamba yakinya, ntûûra îîu îgakanûkua bûbûnene nkûrûki ya ûrîa Sodomu na Gomora ciakanûkîrue.

¹⁶ “Thikîreeni, ni ndibûtûma bûkari ta ng'ondu gatîgatî ka mbawa. Tontû bûû, îthîrweni bûrî na ûûme ta njoka na ûkiri ta kîjea.

¹⁷ Imenyagîreeni nîkwîthîrwa antû bakabûgwata na babwikie kotini na babûûre ibooko bûrî kîromberoone ciaao.

¹⁸Bûgaikua mbere ya athani na anene nîûntû bwa riîtwa rîaakwa îndî bûgakûûjîîra Nteto Injega kîrî bo na kîrî barîa batî Ayahudi.

¹⁹Rîrîa bakabwikia bûgambithua, bûkamaka bûgîciûragia ûrîa bûkabeera kana ûrîa bûkabacokeria, nîkwîthîrwa îgiita rîu rîakinya, bûkaewa nteto irîa bûkabeera.

²⁰Tontû tî buî bûkeethîrwa bûkîaragia, îndî nî Roho wa Abaagu ûkaaria arî ndeene yeenu.

²¹ Muntû agaikia mûtaana wa ng'ina akooragwe, na mûkûrû aikie mwana waawe akooragwe; nabo aana bakarega kwathîkîra aciari baao na baboragithie.

²² Antû bonthe bakabûthûûra nîûntû bwa riîtwa rîaakwa. Îndî ûrîa ûkoomîîria mwanka mûthia, akoonokua.

²³“Rîrîa antû bakabûthangîkia ntûûreene îmwe, matûkeeni ntûûreene îngî. Ndîbwîra na mma atîrî, bûtîtûngania ntûûra cionthe irîa irî Israeli mbere ya Mûtaana wa Muntû acoka.

²⁴ “Mûritwa tî ûmûnene nkûrûki ya mûritani waawe; ningî nkombo tî înene nkûrûki ya mwathi waayo.

²⁵ Bwabua mûritwa agakara ta mûritani waawe, na nkombo îgakara ta mwathi waayo. Këethîra antû nî beetîte mweene mûciî Beelizebuli, bageeta antû ba mûciî jûu mariîtwa jamathûûku nkûrûki.”

²⁶ “Tontû bûû, bûgákîra antû bau. Nîkwîthîrwa gûtî gîntû kiithi gîtiithûrwa, na gûtî ûntû bûrî wiithoone bûtîmenyithanua.

²⁷Mantû jarîa mbwîragîra muunduune, jaarieni werûûne, na jarîa bûkaigua jakîarua na kîoe jatûmîîrieni na kaajû gakanene.

²⁸Bûgakîreni barîa boomba kûûraga mwîrî îndî batîûmba kûûraga mwoyo. Îndî kîrageni ûrîa ûûmba kûûraga mwîrî na akagera mwoyo mwankiine jwa kenya na kenya.

²⁹Anga tûnyoni twîrî tûtîendagua ciringi îmwe. Îndî gûtî kinya kanyoni kamwe gaatu gakujaga Abaagu atîtîkîîrîtie.

³⁰Ningî nî aijî wingî bwa nchiûri cia mîtwe yeenu.

³¹Tontû bûû, bûgakîreni, nîûntû bûrî gîtûmi nkûrûki ya nyoni inyingî.”

³²“O muntû ûrîa ûgakûûjîîra mantû jambegiî kîrî antû, kinya ni ngakûjîîra mantû jamwegiî kîrî Baaba ûrîa ûrî îgûrû.

³³ Îndî o muntû ûrîa ûgankaana kîrî antû, kinya ni nkamûkaana kîrî Baaba ûrîa ûrî îgûrû.”

³⁴“Bûkathûgaanieni atî ndeejîre kûreeta thîîrî nthîgûrûûne. Nteejîre kûreeta thîîrî îndî ndeejîre kûreeta ndwaa.

³⁵ Nîkwîthîrwa mbîjîte gûtûma mûtaana arwaa na îthe, na mwarî arwaa na ng'ina, na mwekûrû wa Mûtaana arwaa na ng'ina wa mûkûrû waawe.

³⁶Anthû ba muntû bakethagîrwa barî bakuuma nja yaawe yongwa.

³⁷Muntû ûrîa weendaga îthe kana ng'ina nkûrûki yaakwa atîagîrîte kwaa mûritwa waakwa. Nawe ûrîa weendaga mûtaana kana mwarî waawe nkûrûki yaakwa atîagîrîte kwaa mûritwa waakwa.

³⁸ Ningî muntû ûrîa ûtîjûkagia mûtharaba jwaawe na anthingata, atîagîrîte kwaa mûritwa waakwa.

³⁹ Muntû ûrîa ûmenyagîra ûtûûro bwaawe akaaga mwoyo, îndî ûrîa ûkairita nîûntû bwaakwa akoona mwoyo.”

⁴⁰ “Muntû ûrîa ûkabûgwataga ûgeni, nî ni agwataga ûgeni na ûrîa ûngwataga ûgeni nî ûrîa wantûmîre agwataga ûgeni.

⁴¹Muntû ûrîa ûgwataga kîroria ûgeni, nîûntû nî kîroria, akaewa kîewa kîrîa kîroria kîejagwa. Ningî ûrîa ûgwataga muntû ûmwagîru ûgeni, nîûntû nî ûmwagîru, akaewa kîewa kîrîa muntû ûmwagîru aejagwa.

⁴²Ningî muntû ûrîa ûgakundia ûmwe wa baba aniini rûûjî, nîûntû nî mûthingati waakwa, gankûbwîra na mma atî, muntû ûu atîaga îtuui rîaawe.”