Read KIMERU BIBLE PROTESTANT EDITION Mat 11 Bible Online

Mat 11 - KIMERU BIBLE PROTESTANT EDITION bible

Mat 11

¹Rîrîa Jesû aathirîrie kûritana aritwa baawe, nî aumîre au, na areeta kûritana na gûtûmîîria ntûûreene irîa ciaarî akuî.

²Johana arî ncheera, araigua mantû jarîa Kristû aathithagia. Aratûma aritwa baawe beeta kûmûûria:

³“Nîgwe ûrîa ûkeeja kana tweteere ûngî?”

⁴Nawe Jesû arabacokeria, “Îteeni bwîre Johana mantû jarîa bwoona na bwaigua:

⁵ atumuumu nî bakwona na bionje nî bigwîta, antû barîa baajîtue nî mûtigiri nî bakûorua na barîa batiigagua nî bakwigua; na akuû nî bakûriûkua na Nteto Injega nî igûtûmîîrua kîrî nkîa.

⁶Kîtharimo nî kîrî muntû ûrîa ûtî na nkaanja nîûntû bwaakwa.”

⁷Rîrîa aritwa ba Johana beetîre, Jesû nî aambîîrîrie kwîra ntundu ya antû mantû jegiî Johana: “Rîrîa bwetîîre rwanda rî, nîmbi bwerîgîrîte kwona? Nî mûrangi jûkiurutwa nî ruuo?

⁸Nîmbi îndî bwetîte kwona? Bwerîgîrîte kwona muntû wîkîrîte nguû inthongi? Antû barîa beekagîra nguû inthongi bakaraga nyomba cia anene.

⁹Nîmbi îndî, bwetîre kwona? Nî kîroria? Îî nî nkûbwîra na mma atî, ûrîa bwoonere nî nkûrûki ya kîroria.

¹⁰ “Ûjû nîwe Maandîko jaugîîte mantû jamwegiî atî: ‘Ngatûma mûtûmwa waakwa mbere yaaku eete agakûthithîrie njîra.’

¹¹Ndîbwîra na mma atî, gûtî muntû ûngî kîrî barîa batûûra mwoyo ûkûrûkîte Johana Mûbatithania. Îndî amwe na ûu ûrîa mûnini buru ûneneene bwa îgûrû nî amûkûrûkîte.

¹² Kuuma îgiita rîa Johana Mûbatithania mwanka îgiita rîrî tûrî ûnene bwa îgûrû bûtwîre kûrûûwa nabu na barîa batumagîra inya nîbo bakûrûkaga ku.

¹³Waatho bwa Musa na iroria bionthe nî biarorerie mwanka îgiita rîa Johana.

¹⁴ Nandî këethîra nî bûkwenda gwîtîkia, Johana nîwe Elija ûrîa weerîri akeeja.

¹⁵Ûrîa ûrî na matû nî aigue.

¹⁶Rîu nîmbi nkang'uanania nthukî îîjî nayo? Îkari ta twaana tûkari nthî thokoone tûgîtaaga tûngî tûkiugaga:

¹⁷‘Twabûringîîre mîtûrirû naabuî bûrarega kwina, tûrabwinîra ndwîmbo cia kwithikîîra naabuî bûrarega kwithikîîra!’

¹⁸Nîkwîthîrwa rîrîa Johana eejîre atîkûrîa na atîkûnyua, nabo nî baugîre, ‘Arî na roho înthûûku.’

¹⁹Nawe Mûtaana wa Muntû akwîja akîrîjaga na akînyunyaga, nî baugîre, ‘Ûjû nî muntû wendeete kûrîa biakûrîa mono na nî mwogiti, na mûcoore wa aritithia ûgoti na eeyia!’ Îndî ûûme kuuma kîrî Mûrungu nî bûcionanagia atî nî bwa mma kuumania na mathithio jaabu.”

²⁰Rîu Jesû araambîîrîa gûkaania antû ba ntûûra iu batige kûthithia ûthûûku, nîkwîthîrwa kinya këethîra nî aarî akûringa biama bibingî ku, nî baregete kwirira.

²¹ Jesû arauga atîrî, “Wûi kîrî gwe Korazini! Wûi kîrî gwe Bethisaida! Këethîra biama birîa biringi ntûûreene iiji, nîbio biaringîrwe kîrî ntûûra cia Tiro na Sidoni, barîngîîthîrwa bairirîre tene, beekîrîte ithango na kwigerera mûju mîtwe.

²²Îndî gankûbwîra, ntukû ya îgamba yakinya bûgakanûkua bûbûnene nkûrûki ya Tiro na Sidoni.

²³ Naagwe Kaperinaumu, ka bûgûciimbaimbia bûbûnene ûû nîkî? Bûkagerwa mwankiine jwa kenya na kenya! Këethîra biama birîa biringi ntûûreene îîjî, nî biaringi Sodomu, îrîngî kwîthîrwa îrî o mwanka naarua tûrî.

²⁴ Îndî ndîbwîra ntukû ya îgamba yakinya, Mûrungu akabûkanûkia nkûrûki ya Sodomu.”

²⁵Îgiita rîu Jesû aratûmîîria arauga, “Nî ngûgûcokeria nkaatho gwe Baaba, Mwathani wa îgûrû na nthî, nîûntû nî wiithîte mantû jaja kîrî antû barîa boome na mbîjî, na wajaguûrîra antû barîa batî na ûmenyo bûbwingî.

²⁶Gwe Baaba, ûu nîu wendere gûkarîka.

²⁷ “Baaba nî anenkerete into bionthe. Gûtî muntû wiijî Mûtaana tiga Baaba, na gûtî we wiijî Baaba tiga Mûtaana na bangî barîa Mûtaana akeenda kûguûra Baaba kîrî bo.

²⁸Njûûni kîrî ni buî bwinthe bûnogi nîûntû bwa gûkamata mîrigo îmîrito, naani nkabûnogokia.

²⁹ Jûkieni gîchooki gîaakwa bwîkîre, na bwiritane kuuma kîrî ni, nîûntû ni ndî ûmûkiri na mwinyiiyia nkoroone, naabuî bûkanogoka nkoroone cieenu.

³⁰Nîkwîthîrwa gîchooki gîaakwa nî gîkîûthû, na mûrigo jwaakwa nî jûmûûthû.”