Read KIMERU BIBLE PROTESTANT EDITION Mat 12 Bible Online

Mat 12 - KIMERU BIBLE PROTESTANT EDITION bible

Mat 12

¹ Îgiiteene rîmwe kûrî ntukû ya sabatû, Jesû na aritwa baawe nî bakûrûkîrîîte muundeene jwa nkano. Aritwa baawe barambîrîria kuuna nkano bakîrîjaga, nîûntû nî baarî na mpara.

²Îndî Afarisayo bakwona ûu bareera Jesû atîrî, “Tega aritwa baaku bakîthithia ûntû bûrîa Waatho buugîîte bûkáthithua ntukû ya sabatû!”

³ Jesû arabacokeria arabeera atîrî, “Ka bûtaathoma ûrîa Daudi aathithîrie rîrîa we na antû barîa aarî nabo baigîrue mpara?

⁴ Nî aakûrûkîre ndeene ya kîûrû arî na antû baawe, na bararîa mîgaate îrîa yaathûrîri Mûrungu. We na barîa baarî amwe nawe batetîkîrîîtue nî Waatho kûrîa mîgaate îîu tiga athînjîri-Mûrungu bonka.

⁵ Kana ka bûtaathoma Waathoone bwa Musa bwona ûrîa athînjîri-Mûrungu baunîre Waatho bwegiî ntukû ya sabatû barî kîûrûûne, ntukû ya sabatû îndî jatajukîrue jarî meeyia?

⁶Nandî ndîbwîra, kûrî ûmwe ûrî aja ûmûnene nkûrûki ya kîûrû.

⁷ Ningî këethîra nî bwijî gîtûmi gîa nteto iji atî, ‘Mpendaga barîa baigagîrua bangî kîaao, îndî ni ntî bata na kîgongwana kîa gwakîîria,’ bûtîngîtuîra antû batî na maatia ta barî na maatia.

⁸Nîkwîthîrwa Mûtaana wa Muntû nîwe mwathi wa sabatû.”

⁹Jesû arauma au na arakûrûka kîromberoone kîaao

¹⁰na areethîra muntû waarî na njara yonji. Antû baramûûria atîrî, “Waatho nî bûgwîtîkîîria muntû orua ntukû ya sabatû?” Baamûûrîrie ûû nîkenda boona ûntû bwa kûmûthitanga nabu.

¹¹ Jesû arabooria atîrî, “Nî ûrîkû weenu ng'ondu yaawe îgwîkia îriinyeene ntukû ya sabatû na akarega kûmîrita ntukû o îîu?

¹²Muntû nîwe ûrî gîtûmi gîkînene nkûrûki ya ng'ondu. Tontû bûû, Waatho nî bwîtîkîîrîtie muntû athithia ûntû bûbwega ntukû ya sabatû.”

¹³Rîu Jesû areera muntû ûu waarî na njara yonji atîrî, “Tambûrûkia njara yaaku.” Nawe aratambûrûkia njara yaawe, nayo îrabua na îrakara o ta îrîa îngî.

¹⁴Tontû bûû, Afarisayo barauma au na baraireba ûrîa bakamûûraga.

¹⁵Rîrîa Jesû amenyere ûntû bûû arauma gûntû kûu. Antû babaingî baramûthingata na arooria bonthe barîa baajîtue,

¹⁶na arabakaania batîkeere antû we nûû.

¹⁷Athithîriee ûu nîkenda jarîa kîroria Isaya augîîte joojûra:

¹⁸ “Îîjî nîyo nthûûmba yaakwa îrîa nthuurîte, ûrîa mpendeete na ûrîa ngwîragua nîwe. Ngatûma Roho waakwa akare kîrî we, na agatûmîîria mantû ja îota kîrî antû bonthe barîa batî Ayahudi.

¹⁹Atîteta kana akaya, ningî kajû kaawe gatiigîgua njîreene.

²⁰Atînyang'inyûra kathanje karîa karî akuî kûnyang'inyûka, kana oorîa rûtambi rûrîa rûrî akuî kwoora, mwanka rîrîa agatûma îota rîtue kûthingatagwa,

²¹na antû barîa batî Ayahudi bamwîrîgagîîre.”

²²Rîu Jesû arareeterwa muntû waarî mûtumuumu na atoombaga kwaria nîûntû nî aarî na roho inthûûku. Jesû arooria muntû ûu na arambîria kwona na kwaria.

²³Antû bonthe bararigara bakîûragia, “Ûjû oomba kwîthîrwa nîwe Mûtaana wa Daudi?”

²⁴ Îndî rîrîa Afarisayo baigîrue ûu barauga, “Muntû ûjû engaga roho inthûûku agîtumagîra inya kuuma kîrî Beelizebuli, mûnene wa roho inthûûku.”

²⁵Jesû akûmenya ûrîa baathûgaanagia arabeera atîrî, “Antû ba ûnene kinya bûrîkû bakeethîrwa bakîrûjaga gatîgatîîne kaao, ûnene bûu bûtîûmba gûtûûra îgiita rîrîraja. Ningî antû ba ntûûra îmwe kana antû ba mûciî jûmwe bakeethîrwa bakîrûjaga gatîgatîîne kaao, ntûûra îîu kana mûciî jûu, batîûmba gûtûûra amwe îgiita rîrîraja.

²⁶Këethîra roho îthûûku nî îkwînga roho îngî na cio-ijîîrî îrî ûneneene bûmwe bwa Nkoma rî, ûnene bûu bwoomba gûtûûra?

²⁷Buugaga atî mpîngaga roho inthûûku ngîtumagîra inya kuuma kîrî Beelizebuli, nabo aana beenu beengaga roho inthûûku bagîtumagîra inya yaaû? Tontû bûû, aana beenu nîbo bakabûgiitîra îgamba.

²⁸Îndî nkëethîrwa mpîngaga roho inthûûku na inya ya Roho wa Mûrungu, menyeni atî Ûnene bwa Mûrungu bûgûkinya kîrî buî.

²⁹Ningî nîatîa muntû oomba gûtonya nyomba ya muntû ûrî inya na akajûkia into biaawe, tiga akaamba kûmûtheeka rîu akajûkia into.

³⁰ Ûrîa ûtî amwe naani, nîka arûjaga naani. Ningî ûrîa ûtîûthûranagia amwe naani nîka anyagagia.

³¹Tontû bûû, ndîbwîra atî antû bakarekerwa meeyia jonthe, na kinya barîa barumaga Mûrungu bakarekerwa, îndî barîa barumaga Roho Ûmûtheru batîrekerwa.

³² Ningî ûrîa ûkaaria ûntû bûbûûî bwegiî Mûtaana wa Muntû akarekerwa, îndî ûrîa ûkaaria ûntû bwa kûmeneeria Roho Ûmûtheru atîrekerwa nandî na kenya na kenya.”

³³ “Mûtî jûkëethîrwa jûrî jûmwega, kinya maciara jaaju jeethagîrwa jarî jameega, îndî jûkëethîrwa jûrî jûmûûî, kinya maciara jaaju jethagîrwa jarî jamaaî. Mûtî jûmenyekanaga na maciara jaaju.

³⁴ Îbuî rûciara rwa njoka! Nîatîa bûûmba kwaria mantû jameega na bûrî babaaî? Nîkwîthîrwa o muntû aragia mantû jarîa jojûrîte nkoroone.

³⁵Muntû ûmwega aragia mantû jameega jaumîte kîrî wega bûrîa bûrî ndeene yaawe, na muntû ûmûûî aaragia mantû jamaaî jaumîte kîrî ûûî bûrîa bûrî ndeene yaawe.

³⁶“Ndîbwîra na mma atî Ntukû ya Îgamba yakinya o muntû akoorua mantû jegiî nteto cia rûûgo irîa aaria.

³⁷Nîkwîthîrwa nteto ciaaku nîcio igatûma ûtuîrwa atî ûrî ûmwega kana ûrî ûmûûî.”

³⁸ Rîu aritani bamwe ba Waatho na Afarisayo nî beerîre Jesû atîrî, “Mûritani, nî tûkwenda kwona ûkîringa kîama.”

³⁹ Îndî Jesû arabacokeria atîrî, “Buî nthukî îmbîî ya antû athûngîîri! Bûrîenda kwona nkîringa kîama bûkîona, îndî gûtîkîo bûkoona tiga kîrîa kîa kîroria Jona.

⁴⁰ O ta ûrîa Jona aakarîre kîu kîa gîkûyû gîkînene ntukû ithatû, ûtukû na mûthenya, o ûu nîu Mûtaana wa Muntû agakara nthîgûrû ndeene, ntukû ithatû, utukû na mûthenya.

⁴¹ Ntukû ya Îgamba yakinya antû ba Nineve bakeeja na bagambithie antû ba nthukî îîjî, nîkwîthîrwa antû bau ba Nineve nî bairirîre rîrîa Jona aabatûmîîrîrie. Raithîrieni! Ûmwe ûmûnene nkûrûki ya Jona arî aja.

⁴² Mûka-mûnene wa nthîgûrû ya Sheba akeeja Ntukû ya Îgamba yakinya, na agambithie antû ba nthukî îîjî. Mûka-mûnene ûu nî aumîre kûraaja na areeta kûthikîîra kîrîra kîa mûnene Solomoni. Raithîrieni! Ûmwe ûmûnene nkûrûki ya Solomoni arî aja.”

⁴³“Rîrîa roho înthûûku yuumaga kîrî muntû îriûnganagia na rwanda îgîcûaga antû a kuurûka, îndî îtîone.

⁴⁴Rîu îgaciîra atîrî, ‘Ngacoka nyomba yaakwa îrîa ndaumîre.’ Yacoka îkeethîra nyomba îrî întheri na yeegeri na yathongoma bwega.

⁴⁵Yoona ûu îgeeta îkagîîra roho ingî mûgwanja inthûûku nkûrûki yaayo, naacio igatûûra nyomba îîu. Tontû bûû, muntû ûu akeethîrwa arî ûmûûî nkûrûki ya ûrîa aakari mbere. Ûû nîu antû ba nthukî îîjî ya ûmaramari îgakara.”

⁴⁶Rîrîa Jesû aaragîria antû, ng'ina na ataana ba ng'ina nî baakinyîre na bararûngama oome bakîendaga kwaria nawe.

⁴⁷Muntû ûmwe areera Jesû atîrî, “Nyakwe na ataana ba nyakwe nî barûngi oome bakîendaga kwaria naagwe.”

⁴⁸Îndî Jesû aramûûria atîrî, “Chiaa nûû? Nabo ataana ba chiaa nî baaû?”

⁴⁹Rîu aroorota aritwa baawe na arauga, “Baba nîbo chiaa na nîbo ataana ba chiaa!

⁵⁰Nîkwîthîrwa muntû ûrîa ûthithagia ûrîa Baaba ûrîa ûrî îgûrû endaga, nîwe chiaa na nîwe mûtaana wa chiaa na ningî nîwe mwarî wa chiaa.”