Read KIMERU BIBLE PROTESTANT EDITION Mat 13 Bible Online

Mat 13 - KIMERU BIBLE PROTESTANT EDITION bible

Mat 13

¹Ntukû o îîu yongwa, Jesû araumagara nyomba îrîa aarî na areeta arakara nthî rûteere rwa îria.

² Antû babaingî mono bareeta au aarî, nawe araitia gîtarûûne na arakara nthî ku. Antû bau bararûngama rûteere rwa îria.

³Jesû arabaritana mantû jamaingî agîtumagîra ngerekano. Arabeera atîrî, “Îgiita rîmwe mwaandi nî eetîre kwaanda mbeeû.

⁴Rîrîa aandaga, mbeeû imwe nî ciagwîre njîreene na irarîîwa nî nyoni.

⁵Mbeeû ingî nî ciagwîre maigeene kûrîa gûtaarî na mûthetu jûmwingî. Nî ciaumîre ntûti nîûntû gûtaarî na mûthetu jûmwingî.

⁶Rîrîa riûa rîaumîre nî biaîîre na birooma nîûntû mîri îtatonyete nthî bwega.

⁷Mbeeû ingî nî ciaagwîre antû aarî na miigua. Miigua îîu îraciinyanîa iraremwa gûkûra.

⁸Mbeeû ingî nî ciaagwîre mûthetuune jûmûnoru, nacio irauma na imwe iraciara mainda îgana rîmwe, na ingî iraciara mainda mîrongo îtantatû, na ingî iraciara mainda mîrongo îthatû.

⁹Ûrîa ûrî na matû jakwigua nî aigue.”

¹⁰Rîu aritwa bareeta kîrî Jesû na baramûûria atîrî, “Nîkî ûkwarîria antû ûgîtumagîra ngerekano?”

¹¹Nawe arabacokeria, “Babuî nî bûeei ûûme bwa kûmenya witho bwa Ûnene bwa îgûrû, îndî bo batîeei ûûme bûu.

¹² Nîkwîthîrwa muntû ûrîa ûrî nabio akongeerwa bingî, îndî ûrîa ûtî nabio, kinya birîa arî nabio bikajûkua.

¹³Kîu nîkîo gîgûtûma mbaarîria na ngerekano nîûntû barî na meetho na batîkwona, ningî barî na matû na batîkwigua kana baciûra mantû.

¹⁴ Tontû bûû bakoojûria ûrîa kîroria Isaya aaugîre: ‘Kwigua nî bakwigua îndî batîkoroomba gûciûra; kwona nî bakwona îndî batîmenya noo mbi.

¹⁵Nîkwîthîrwa batî mpwîî cia kûgwata mantû; barî na matû na batiigagua, meetho barî najo îndî batîonaga. Këethîra tî u, barîîngîîthîrwa bakîonaga na bagaciûra mantû, ningî barîngîîthîrwa bakiigagua na bakamenya mantû, na bagacoka kîrî ni naani nkabooria mîrimo yaao.’

¹⁶ Îndî buî nî bûtharimi nîûntû meetho jeenu nî jakwona na matû jeenu nî jakwigua.

¹⁷Nî nkûbwîra na mma atî, iroria na antû babaingî babaagîru nî bairîragîîria mono kwona mantû jaja bûkwona, îndî bataajona, ningî nî bairîragîîria kwigua mantû jarîa bûkwigua îndî batajaigua.

¹⁸“Nandî thikîîrieni ûritani bwa ngerekano ya mûandi.

¹⁹Mbeeû irîa ciagwîre njîreene nî ngerekano ya antû barîa baigagua nteto ciegiî Ûnene bwa îgûrû îndî bakaremwa gûciûra. Nkoma akeeja na akathara kîrîa kîandi nkoroone ciaao.

²⁰Mbeeû irîa ciaagwîre maigeene, nî ngerekano ya antû barîa baigagua nteto cia Mûrungu na bageetîkia na mpwîî bagwîrîtue.

²¹Îndî nîûntû nteto iu itîthagîrwa iriki ndeene yaao, boomagîîria îgiita rîrîkai. Îndî rîrîa mîthangîko kana mathîîna jabeejîîra nîûntû bwa gwîtîkia nteto iu, nî batigaga gwîtîkia nteto iu ntûti.

²²Mbeeû irîa ciaagwîre antû arîa aarî na miigua, nî ngerekano ya antû barîa baigagua nteto cia Mûrungu îndî nîûntû bwa kûmakîra ûrîa bagatûûra na kwenda kwaa itonga, gûkaangaratania nteto iu, na bakaremwa kwîthîrwa barî na maciara.

²³Mbeeû irîa ciaagwîre mûthetuune jûmûnoru nî ngerekano ya antû barîa baigagua nteto cia Mûrungu na bagaciciûra, na bagaciara maciara; bamwe bagaciara mainda îgana, bangî mainda mîrongo îtantatû na bangî mainda mîrongo îthatû.”

²⁴Rîu Jesû arabaa ngerekano îngî: “Ûnene bwa îgûrû bwoomba kûng'uananua na muntû ûrîa waandîre mbeeû înjega muundeene jwaawe.

²⁵Îndî rîrîa antû bamami, mûnthû waawe areeta na araanda nthangari muundeene jûu jwa nkano na araciîtîra.

²⁶Rîrîa nkano ciaumîre na ciambîrîria gûciara, kinya nthangari îraambîrîria kwoneka.

²⁷Ariti ngûgî bareeta kîrî mwene muunda na baramûûria atîrî, ‘Mwathi weetû, uga ûtaandîre mbeeû injega muundeene jwaaku? Nandî nîkû nthangari yuumîte?’

²⁸Nawe arabacokeria, ‘Nî mûnthû ûthithîtie ûu.’ Rîu ariti ngûgî baramûûria atîrî, ‘Nî ûkwenda tûkûûra nthangari îîu?’

²⁹Nawe arabeera, ‘Arî, bûgakûûra nîûntû bwoomba gûkûranîria nthangari na nkano.

³⁰Tiganeni nacio ikûranîrie mwanka îgiita rîa maketha. Îgiita rîu nkeera barîa bagûkeetha baambe boothûranie nthangari bakîmîogaga ikundi ikundi nîkenda îîthua. Îndî bakethe nkano baciîke nchukuune yaakwa.’”

³¹Jesû arabeera ngerekano îngî: “Ûnene bwa îgûrû bûkari ta gapîndî ka mûthandûkû karîa muntû aajûkîrie na araanda muundeene jwaawe.

³²Gapîndî kau nîko kaniini buru kîrî mpîndî ingî cionthe. Îndî rîrîa kaandwa na kauma nî gakûraga na gakaa mûtî jûmûnene nkûrûki ya mîtî îngî yonthe. Nyoni nî ciakaga itara mpang'iine ciaaju.”

³³Jesû arabaa ngerekano îngî: “Ûnene bwa îgûrû bûkari ta mûtheega jwa kwimbithia mûgaate jûrîa mwekûrû aajûkîrie araungania na mûtu jwa ndebe ithatû, na mûtu jûu jwa gûkanda jûraimba jûnthe.”

³⁴Jesû aarîrie antû bonthe agîtumagîra ngerekano. Gûtî ûntû kinya bûmwe abeera atîgûtumîra ngerekano.

³⁵ Aathithîrie ûu nîkenda jarîa kîroria kîaugîîte jakoojûra: “Nkaabaragîria ngîtumagîra ngerekano. Nkabeera mantû jarîa jatwîre jaithi kuuma rîrîa nthîgûrû yoombîrwe.”

³⁶Rîu Jesû aratiga antû bau na aratonya nyomba. Aritwa baawe bareeta kîrî we na baramwîra, “Tûtaûrîre ngerekano ya nthangari muundeene.”

³⁷Jesû arabeera, “Mûaandi wa mbeeû iu injega nî Mûtaana wa Muntû.

³⁸Munda naju nî nthîgûrû. Mbeeû iu njega nî antû barîa Ûnene bwa îgûrû bûrî bwaao. Nayo nthangari îîu nî antû ba ûrîa Mûûî.

³⁹Mûnthû ûrîa waandîre nthangari îîu nî Nkoma. Îgiita rîa maketha nî mûthiro jwa nthîgûrû, nabo akethi nî araîka.

⁴⁰O ta ûrîa nthangari yûthûranagua na îkaîîthua, ûu nîu gûgakara ntukûûne cia mûthiro jwa nthî.

⁴¹Mûtaana wa Muntû agatûma araîka baawe beete Ûneneene bwaawe, boothûranie bonthe barîa batûmaga antû bangî beeyia na bonthe barîa bathithagia mantû jamaaî,

⁴²babagere mwankiine jwa kenya na kenya, kûrîa bakarîraga na gûkabakaba maîgo bakiigagua ûrûrû bûbwingî.

⁴³Rîu barîa baagîru bakathaara ta riûa Ûneneene bwa Îthe waao. Ûrîa ûrî na matû jakwigua nî aigue.”

⁴⁴“Ûnene bwa îgûrû bûkari ta ûtonga bwithi kîthakeene, bûrîa muntû oonere na arabûriinda kaîrî. Agwîrîîtue areeta areendia bionthe birîa aarî nabio areeta kûgûra kîthaka kîu.”

⁴⁵“Kaîrî Ûnene bwa îgûrû bûkari ta mûringi biashara ûrîa weetîre gûcwaa kaiga ka goro.

⁴⁶Rîrîa oonere kaiga kamwe ka goro mono, nî eetîre areendia bionthe birîa aarî nabio na arakagûra.”

⁴⁷“Kaîrî Ûnene bwa îgûrû bûkari ta neeti ya kûgwatia makûyû îrîa yaagererwe îrieene na îragwatia makûyû ja mîthemba îmingî.

⁴⁸Rîrîa neeti yoojûrîre makûyû, antû nî bamîkuucîrie mwanka rûteere rwa îria na barakara nthî gûtaara makûyû jarîa meega bagîkagîra ikabûûne biaao, na jarîa mathûûku bagîteejaga.

⁴⁹Ûu nîu gûgakara îgiita rîa mûthiro jwa nthîgûrû. Araîka bakeeja baathûrane antû barîa baagîru na barîa baaî.

⁵⁰Bakagera barîa baaî mwankiine jwa kenya na kenya, kûrîa bakarîraga na kûrîa maîgo bakiigagua ûrûrû bûbwingî.”

⁵¹Jesû arabooria atîrî, “Nî bûkûumba gûciûra mantû jau jonthe?” Nabo barauga, “Îî.”

⁵²Rîu arabeera, “Mûritani wa Waatho ûrîa weejaga mûthingati wa Ûnene bwa îgûrû, akari ta mwene nyomba ûrîa ûritaga into birîa bierû na birîa ikûrû kuuma nchukuune yaawe.”

⁵³Rîrîa Jesû aathirîrie kweejana ngerekano iu, arauma au aarî,

⁵⁴areeta ntûûreene îrîa aakûrîrîte yongwa. Arakara akîritanaga antû kîromberoone kîaao mwanka bararigara mono na barauga, “Ûûjû nîkû aritîte ûûme ta bûbû na inya ya kûringa biama bibi?

⁵⁵Uga ûûjû tî mûtaana wa mûbundi wa mbaaû? Aanga ng'ina tî Maria? Ataana ba ng'ina tî Jakubu na Simioni na Juda?

⁵⁶Aanga aarî ba ng'ina bonthe tî atûûri beetû? Rîu nîkû ûûjû aritîte mantû jau jonthe?”

⁵⁷ Tontû bûû, bararega kûmwîtîkia. Jesû arabeera, “Kîroria kîrî îgweta gûntû kûngî kunthe tîga ntûûreene yaao na mûciî jwaao.”

⁵⁸Tontû bwa kwaaga wîtîkio kwaao, ataringîre biama bibingî ku.