Read KIMERU BIBLE PROTESTANT EDITION Mat 14 Bible Online

Mat 14 - KIMERU BIBLE PROTESTANT EDITION bible

Mat 14

¹Îgiiteene rîu Herode ûrîa waathanaga Galili, nî aigîrue nkuma ya Jesû

²na areera nthûûmba ciaawe atîrî, “Ûu nî Johana Mûbatithania ûriûkîte kuuma kîrî akuû na kîu nîkîo gîgûtûma eethîrwa arî na inya ya kûringa biama biu.”

³ Nîkwîthîrwa Herode nî aarî akûgwatithia Johana amwiingîrithia ncheera, nîûntû bwa Herodia, mwekûrû wa mûtaana wa ng'ina Filipû.

⁴ Kûrî îgiita Johana Mûbatithania aarî akûîra Herode, “Waatho bûtîtîkîîrîtie ûjûkia Herodia aa mwekûrû waaku.”

⁵Herode nî eendaga kûûraga Johana îndî nî aakîraga Ayahudi nîûntû nî beetîkîtie Johana aarî kîroria.

⁶Rîrîa ntukû ya kûgwîrîrua gûciarwa kwa Herode yakinyîre, mwarî wa Herodia nî ainîîre ageni barîa beeti na Herode aragwîrua mono,

⁷mwanka areeka wîrane na mwarî ûu atî akamwaa kîonthe kîrîa ageetia.

⁸Mwarî ûu nî aarî akwathwa nî ng'ina auge, “Mpa mûtwe jwa Johana Mûbatithania jûrî thaaniine.”

⁹Mûnene araigua bûbûûî, îndî nîûntû bwa wîrane bûrîa eekîte nawe ageni bakiigagua, ararita waatho atî mwarî ûu anenkerwe kîrîa eetia.

¹⁰Tontû bûû, Johana aragiitwa mûtwe arî kûu ncheera.

¹¹Mûtwe jûu jûreekîrwa thaaniine na mwarî aranenkerwa, nawe araikîria ng'ina.

¹²Aritwa ba Johana nî beetîre barajûkia mwîrî jwaawe barajûthika. Rîu bareeta kûmenyithia Jesû mantû jau.

¹³Rîrîa Jesû eerîrwe ûrîa kwaarî gûgûkarîka, arauma antû au aarî na araitia gîtarû areeta antû gûtaarî na antû. Îndî antû bakûmenya kûrîa aarî agwîta, baramûthingata na magûrû baumîte ntûûreene.

¹⁴Rîrîa Jesû aumîre gîtarûûne nî eethîîre antû babaingî na arabaigîîrua kîaao, na arooria barîa baajîtue.

¹⁵Gwakinya ûgoro aritwa bareeta kîrî we na baramwîra, “Igûkwenda gûtuka na antû aja tûrî gûtîtûûri nî antû. Îra antû baane nîkenda beeta ntûûreene bakaigûrîre biakûrîa.”

¹⁶Jesû arauga, “Gûtî gîtûmi kîa beeta, baabuî baeeni biakûrîa barîe.”

¹⁷Aritwa baawe baramûcokeria atîrî, “Tûrî na mîgaate îtaano na makûyû jaîrî akî.”

¹⁸Nawe arabeera, “Ndetereni bio aja.”

¹⁹Areera antû bakare nthî nyakiine. Rîu arajûkia mîgaate îrîa îtaano na makûyû jaîrî na araraithîîria îgûrû, na arabîtharima. Aracoka arang'enyûranga na aranenkera aritwa, nabo baranenkera antû.

²⁰Antû bonthe bararîa baranyira. Nyûmene aritwa baroothûrania ikabû îkûmi na biîrî bia birîa biatigarîre.

²¹Antû bonthe barîa barîîre baarî akuî arûme ngiri ithaano, (5,000) tûtîgûtara aka na twaana.

²²Rîu Jesû areera aritwa baawe baitie gîtarûûne na baune rwongo rûrîa rûngî rwa îria, nawe atigwe athirie kwarîria antû.

²³Akwîra antû baane, araitia kîrîmeene kûromba arî wenka mwanka kûragîa muundu.

²⁴Îgiiteene rîu gîtarû nî kîaarî gîgûkinya akuî gatîgatî ka îria, îndî nî kîaûngaûngagua nî mîgombe nîûntû ruuo rûrwingî nî rwaurutanaga ruumîte ndeerîa beetîte.

²⁵Kûrî akuî gûkea, Jesû nî eetîrîre îgûrû rîa rûûjî eetîte kîrî aritwa baawe.

²⁶Îndî rîrîa aritwa baawe baamwonere eetîrîte îgûrû rîa rûûjî nî baamakîre mono na baraambîrîria kuuga mbu, bakiugaga “Îî tîu Nkoma!”

²⁷Jesû arabaarîria ntûti na arabeera, “Ûmîîrieni! Nî ni, bûkamakeeni.”

²⁸Rîu Peterû aramwîra, “Mwathani, këethîra nîgwe, mbîîra mbîje kîrî gwe mbîtîîrîte rûûjîîne.”

²⁹Jesû aramwîra, “Njû!” Tontû bûû, Peterû arauma gîtarûûne na arambîrîria gwîta kîrî Jesû eetîrîte îgûrû rîa rûûjî.

³⁰Îndî akûringwa nî rûûo araigua ûguaa na arambîrîria kworokera. Arakaya akiugaga, “Itû Mwathani, mbonokia!”

³¹Rîu Jesû aratambûrûkia njara yaawe aramûgwata na aramwîra, “Nîatîa ûrî na wîtîkio bûbûkai! Nîmbi yatûma ûgîa na nkaanja?”

³²Rîrîa baacokere gîtarûûne ruuo rûratiga kuurutana.

³³Barîa bonthe baarî gîtarûûne boona ûntû bûu baramûthaathayia bakiugaga, “Nî mma gwe ûrî Mûtaana wa Mûrungu.”

³⁴Bakuuna îria nî baakinyîre nthîgûrû ya Genesareti.

³⁵Rîrîa antû ba kûu baamûmenyere nî baatûmanîre nteere cionthe nîkenda antû barîa baajîtue bonthe baikua kîrî Jesû.

³⁶Nî bamwereencere etîkîîrie baringithie mîthia ya nguû yaawe, na bonthe barîa bamîringithîrie baroora.