Read KIMERU BIBLE PROTESTANT EDITION Mat 15 Bible Online

Mat 15 - KIMERU BIBLE PROTESTANT EDITION bible

Mat 15

¹Rîu Afarisayo na aritani ba Waatho nî baaumîre Jerusalemu na bareeta kîrî Jesû baramûûria,

²“Nîkî aritwa baaku batîthingataga nkuagaya irîa twatigîîrwe nî biûjûjû bieetû? Batîthambagia njara ciaao mbere ya kûrîa biakûrîa!”

³Jesû arabacokeria atîrî, “Nîkî buunaga Mawaatho ja Mûrungu na bûkathingata nkuagaya cieenu?

⁴ Nîkwîthîrwa Mûrungu augîîte: ‘Tîîyaga abaagu na nyakwe.’ ‘Ûrîa ûkaruma îthe kana ng'ina no mwanka ooragwe.’

⁵Îndî buî buugaga, muntû akëethîrwa arî na gîntû oomba gûteethia îthe kana ng'ina nakîo, na akauga ‘Gîntû kîu ndîngî bûnenkera nî nkîathûûrîrîte Mûrungu,’

⁶atîbûîrîte gûtîîa îthe kana ng'ina. Nî bûethetie Waatho bwa Mûrungu gîntû kîa ûtheri na gîtî na inya nîkenda bûmenyeera nkuagaya cieenu.

⁷Buî aciayia! Kîroria Isaya nî aarîrie bwega mantû jabwegiî rîrîa augîre:

⁸ ‘Antû baba, bankumagia na tûnyûa akî, îndî nkoro ciaao îrî kûraaja naani.

⁹Kûnthaathayia kwaao nî kwa ûtheri, nîkwîthîrwa baritanaga nkuagaya ciaao.’”

¹⁰Rîu Jesû areeta antû kîrî we na arabeera, “Thikîîreeni na bûciûre!

¹¹Gîntû kîrîa gîtonyaga na kanyua gîtîîkagîra muntû mûgiro, îndî kîrîa kiumaga na kanyua nîkîo kîmwîkagîra mûgiro.”

¹²Rîu aritwa baawe bareeta kîrî we na baramwîra, “Nî ûkûmenya atî Afarisayo nî baigîrue bûbûûî nîûntû bwa nteto irîa warîrie?”

¹³Jesû arabacokeria, “O mûtî jûrîa jûtîaandi nî Baaba ûrîa ûrî îgûrû jûgakûûrwa na mîriindo.

¹⁴ Tiganeni nabo! Nî atongeeria ntumuumu. Ntumuumu îkëeja gûtongeeria îngî bobaîrî bakagwa îrinyeene.”

¹⁵Îndî Peterû aramwîra, “Tûtaûrîre ngerekano îîu.”

¹⁶Jesû arabooria, “Kinya buî bûtîkûûmba gûciûra?

¹⁷Gîntû kîrîa gîtonyaga na kanyua gîîtaga kîuu na nyumeene gîkauma.

¹⁸ Îndî mantû jarîa jaumagîîra kanyua jeethagîrwa jaumîte nkoroone, na jau nîjo jeekagîra muntû mûgiro.

¹⁹Nîkwîthîrwa nkoroone ya muntû, nîku kuumaga mathûgaanio jamaaî: ûûragani na ûthûngîîri, na ûmaramari, na waamba, na ûkûûjî bwa ûrongo na nguutû.

²⁰Mantû jau nîjo jeekagîra muntû mûgiro. Îndî kûrîa na njara itîthambîtue gûtîîkagîra muntû mûgiro.”

²¹Rîu Jesû arauma gûntû kûu areeta gûkara nthîgûrû îrîa ntûûra cia Tiro na Sidoni irî.

²²Mûka ûmwe Mûkanaani ûrîa waatwîre gûntû kûu nî eetîre kîrî Jesû na aramûkaîra akiugaga, “Itû Mwathani, Mûtaana wa Daudi, mbigîîrua kîaao! Mwarî waakwa nî athaangîkîtue mono nî roho inthûûku.”

²³Îndî Jesû ataamûcokerie noo atîa. Tontû bûû, aritwa baawe bareeta kîrî we baramwîra, “Mwîre eete nîûntû nîka atûthingatîte agîtûrîragîra.”

²⁴Jesû aracokia, “Ndaatûmîrwe akî kîrî antû ba mûgongo jwa Israeli barîa bakari ta ng'ondu irîa ciûrîte.”

²⁵Îndî mûka ûu areeta na araturia maru mbere yaawe akiugaga, “Itû Mwathani nteethia.”

²⁶Jesû aramûcokeria, “Tî bwega kûjûkia irîo bia twaana na bigererwa kurû.”

²⁷Mûka ûu aracokia, “Ûu nîu kûrî Mwathani. Îndî kinya kurû nî irîîjaga tûng'enyua tûrîa tûgwîte kuuma metheene ya mweene cio.”

²⁸Rîu Jesû aramûcokeria atîrî, “Mwekûrû, wîtîkio bwaaku nî bûbûnene! Nî kûthithîke o ûu ûkwenda.” Kagiiteene o kau kongwa mwarî waawe arabua.

²⁹Jesû arauma au na areetîîra rûteere rwa irîa rîa Galili. Araitia karîmeene na arakara nthî.

³⁰Nabo antû babaingî mono nî beetîre kîrî we barî na ithua na atumuumu na bionje, na maamu na barîa bataigagua na antû bangî babaingî barîa baajîtue na barabeeka au mbere ya Jesû, nawe arabooria.

³¹Antû bau nî baarigarîre mono rîrîa boonere maamu ikîaria, na bionje bigîta na ithua bigîîta bwega na atumuumu bakîona. Nabo barakumia Mûrungu wa Israeli.

³²Rîu, Jesû areeta aritwa baawe arabeera, “Nî nkwigîîrua antû baba kîaao, nîûntû nandî nî bakarîte naani ntukû ithatû, na batî na gantû ga kûrîa. Ntîkwenda kûbeera beete barî na mpara, batîkeeje kûgwa njîreene.”

³³Aritwa baramûûria, “Nîkû tûkarita mîgaate ya kûng'ana kîrîndî gîkî kîonthe na gûtî antû batûûraga gûkû?”

³⁴Jesû arabooria, “Bûrî na mîgaate îng'ana?” Baramûcokeria, “Nî mûgwanja na tûkûyû tûtûkai.”

³⁵Rîu Jesû ararita waatho atî antû bakare nthî.

³⁶Arajûkia mîgaate îîu mûgwanja na tûkûyû tûu na aracokeria Mûrungu nkaatho, arabing'enyûranga na aranenkera aritwa nabo baragaîra antû.

³⁷Bonthe bararîa na baranyira. Rîu aritwa baroothûrania ikabû mûgwanja bia birîa biatigarîre.

³⁸Barîa baarîre baarî arûme ngiri inya tûtîgûtara aka na twaana.

³⁹Jesû akûthiria areera kîrîndî kîaane, na araitia gîtarûûne na arauna îria arakinya nthîgûrû ya Magadani.