Read KIMERU BIBLE PROTESTANT EDITION Mat 16 Bible Online

Mat 16 - KIMERU BIBLE PROTESTANT EDITION bible

Mat 16

¹ Afarisayo na Asadûkayo nî beetîre kîrî Jesû, na bakîenda kûmûgeria baramwîra abaringîre kîama kîrî rwano rwa kwonania atî arî na inya kuuma kîrî Mûrungu.

²Îndî Jesû arabacokeria, “Ûgoro bwakinya gûtî na matu, buî buugaga, ‘Rûûjû gûkeethîrwa kwarîte,’

³na rûûkîrî kûrî na matu jamairû, bûkauga, ‘Naarua gûkaura.’ Buî bwaraithîria îgûrû, nî bûmenyaga ûrîa gûgakarîka. Îndî kinya bwona mantû jarîa jakarîkaga o îgiita o îgiita, bûtîciûkagîrwa bûmenya ûrîa gûgûkarîka.

⁴ Buî nthukî îmbîî na îtiijî Mûrungu, bûrîcwaa kwonua kîama, îndî gûtî kîama bûkonua tiga kîrîa kîa Jona.” Rîu Jesû arabatiga na araciîtîra.

⁵Rîrîa aritwa baunîre îria bareeta rûteere rûrîa rûngî nî baarî bakûrîrua gûkamata mîgaate.

⁶ Jesû arabeera, “Imenyagîîreeni na buikarie mûtheega jwa kwimbithia mûgaate jwa Afarisayo na Asadûkayo.”

⁷Îndî barambîrîria kwaranîria bakiugaga, “Atwîra ûû nîûntû tûtîkamatîre mîgaate.”

⁸Jesû akûmenya mathûgaanio jaao arabeera, “Îbuî antû barî na wîtîkio bûbûkai! Nîmbi îgûtûma bwaranîria bûkiugaga bûtî na mîgaate?

⁹ Ka bûtîgûciûkîrwa kinya nandî? Ka bûtîkûririkana mîgaate îtaano îrîa yaarîîrwe nî antû ngiri ithaano (5,000)? Nî ikabû bing'ana bia matigi bwoothûranîrie?

¹⁰ Kana bûririkana mîgaate îrîa mûgwanja yagaîîrwe antû ngiri inya (4,000). Nî ikabû bing'ana bia matigi bwothûranîrie?

¹¹Nîatîa gûkarîte mwanka bûkarigwa atî ntîkûbwaragîria mantû jegiî mîgaate? Ikarieni mûtheega jwa kwimbithia mûgaate jwa Afarisayo na Asadûkayo!”

¹²Rîu aritwa baraciûra atî teeka abeeraga baimenyeere mûtheega jûrîa jwimbithia mûgaate, îndî nîka aabeeraga baimenyeere ûritani bwa Afarisayo na Asadûkayo.

¹³Rîrîa Jesû eetîre nthîgûrûûne ya Kaisaria Filipi nî oorîrie aritwa baawe atîrî, “Antû baugaga Mûtaana wa Muntû nîwe ûû?”

¹⁴ Baramûcokeria, “Bamwe baugaga ûrî Johana Mûbatithania, bangî bakauga ûrî Elija, na bangî bakauga ûrî Jeremia kana ûmwe wa iroria.”

¹⁵Jesû arabooria, “A buî buugaga ni nî ni ûû?”

¹⁶ Simioni Peterû aramûcokeria, “Gwe nîgwe Kristû, Mûtaana wa Mûrungu ûrîa ûtûûraga mwoyo.”

¹⁷Jesû aramwîra, “Nî ûtharimi gwe Simioni, mûtaana wa Johana! Nîkwîthîrwa tî muntû wakûguûrîra ûntû bûû, îndî nî Baaba ûrîa ûrî îgûrû.

¹⁸Ni ndîkwîra atî ûrî Peterû, na îgûrû rîa iiga rîrî, ngaaka kanisa yaakwa; na mainya ja Nkoma jatîminainia.

¹⁹ Ngakûnenkera mbungûro cia Ûnene bwa îgûrû na o kîrîa ûkatheeka aja nthîgûrû gîkatheekwa îgûrû. Ningî kîrîa ûkathaûra aja nthîgûrû, kinya îgûrû gîkathaûrwa.”

²⁰Rîu arakaania aritwa batîkeere muntû kinya ûrîkû atî nîwe Kristû.

²¹Kuuma îgiita rîu Jesû nî aambîîrie kwaria na aritwa baawe carûrûkû akiugaga atî, “No mwanka mbîte Jerusalemu na ndeeta ku nkathangîkua mono nî akûrû na athînjîri-Mûrungu barîa anene na aritani ba Waatho. Ningî nkooragwa na ntukû ya îthatû nkariûka kuuma gîkuûne.”

²²Rîu Peterû aramwikia rûteere na arambîrîria kûmûkania akiugaga, “Ûntû bûu bûkorokarika kîrî gwe Mwathani!”

²³Îndî Jesû areera Peterû, “Ûmaûma kîrî ni Nkoma! Gwe nî ûkûngitaria nîkwîthîrwa mathûgaanio jau ûrî najo tî ja kuuma kîrî Mûrungu îndî nî ja kîûmuntû.”

²⁴ Rîu Jesû areera aritwa baawe atîrî, “Muntû ûrîa ûkëenda kûnthingata, nî atige gûcienda na ajûkie mûtharaba jwaawe anthingate.

²⁵ Nîkwîthîrwa muntû ûrîa ûkeenda kwonokia ûtûûro bwaawe akaûrîrwa nîbu na ûrîa ûgaciata ûtûûro nîûntû bwaakwa akabûtûûria.

²⁶Nî umîthio bûrîkû muntû akoona, këethîra akaa mwene wa into bia nthîgûrû bionthe îndî aage ûtûûro bwa kenya na kenya?

²⁷ Tontû bûû, Mûtaana wa Muntû akeeja arî na araîka baawe barî na mwago kuuma kîrî Îthe, na arîee o muntû kûringana na mathithio jaawe.

²⁸Ndîbwîra na mma atî kûrî bamwe barî aja batîkua mbere ya boona Mûtaana wa Muntû akîîja arî mûnene.”