Read KIMERU BIBLE PROTESTANT EDITION Mat 17 Bible Online

Mat 17 - KIMERU BIBLE PROTESTANT EDITION bible

Mat 17

¹ Ntukû ithanthatû ikûthira, Jesû nî aitîrie kîrîmeene gîkîraaja arî na Peterû na Jakubu na Johana, mûtaana wa ng'ina wa Jakubu, barî bonka.

²Bamûtegeete o ûu baroona agarûka. Ûthiû bwaawe bûrakengakenga ta riûa, na nguû ciaawe îraa injerû ta îra.

³Musa na Elija barabaumîîra na baraaria na Jesû.

⁴Tontû bûû, Peterû areera Jesû, “Nî bwega kwithîrwa tûrî aja! Ûkëeja kwenda, ndaaka tûgaanda tûthatû aja tûrî, kamwe gaaku, na kangî ka Musa na kangî ka Elija.”

⁵ Peterû akîaragia o ûu, îtu rîrîerû rîrabakunîkîra, na kajû karaigîgua kaumîte îtuune rîu gakiugaga, “Ûjû nî Mûtaana waakwa ûrîa mpendeete na nî ngwîragua nîwe, mûthikagîîreni.”

⁶Aritwa bakûigua ûu nî baagwîre nthî na kîuu nîûntû bwa ûguaa.

⁷Îndî Jesû areeta arabaringithia akîbeeraga, “Ûkîîreeni, na bûgákîra.”

⁸Rîrîa bookîîrîre gûtî muntû ûngî boonere tiga Jesû wenka.

⁹Rîrîa beenamîte kuuma kîrîmeene, Jesû arabeera, “Bûkéera muntû kinya ûrîkû mantû jarîa bwona kîonekiine kîu, mwanka rîrîa Mûtaana wa Muntû akariûkua kuuma kîrî akuû.”

¹⁰ Rîu aritwa baramûûria, “Nîkî îndî aritani ba Waatho baugaga atî no mwanka mbere kîroria Elija aambe eeje?”

¹¹Jesû aracokia, “Îî bûrio, Elija akamba kwîja mbere nîkenda acokanîîria mantû jonthe.

¹² Îndî ndîbwîra na mma atî Elija nî athirîtie kwîja na antû batamûmenyere na gûtî ûthûûku batamûthithîria. O ûu nîu bakathangîkia Mûtaana wa Muntû.”

¹³Rîu aritwa baramenya atî aaragia nteto ciegiî Johana Mûbatithania.

¹⁴Rîrîa baakinyîre kîrî ntundu, muntû ûmwe nî eetîre kîrî Jesû na aramûturîria maru aramwîra,

¹⁵“Mwathani, igîrua mûtaana waakwa kîaao! Nî agwatagwa nî mûrimo jwa kîbaba, na akathangîka mono. Nî agwîte mwankiine magiita jamaingî na ringî akagwa rûûjîîne.

¹⁶Nî mûretere kîrî aritwa baaku îndî batîûmbîre kûmworia.”

¹⁷Jesû arauga, “Îbuî nthuukî îtî wîtîkio na yaangaratanîte! Ngakara naabuî mwanka rî? Ngeteera mwanka rî bûgîa na wîtîkio? Ndetereni mwana ûu aja.”

¹⁸Jesû aragondokera roho îîu, nayo îrauma kîrî mwana ûu o rîu.

¹⁹Nyumeene aritwa bareeta kîrî Jesû barî bonka, baramûûria, “Nîkî tuî tûremerwe kwînga roho îîu?”

²⁰ Jesû arabacokeeria, “Nîkwîthîrwa wîtîkio bweenu nî bûbûkai. Ndîbwîra na mma atî, bûkëethîrwa bûrî na wîtîkio bûng'ana ta gapîndî ka mûthandûkû, bwoomba kwîra kîrîma gîkî, ‘Kûûka uume aja, na wîte arîa!’ Nakîo gîgaakûûka na gîte. Gûtî ûntû kinya bûmwe bûkabûrema kûthithia. [

²¹Roho ya mûthemba jûu îtîngîka tiga na njîra ya maromba na gûciata biakûrîa.”][1]

²²Aritwa bakûthûûrana amwe kûu Galili Jesû arabeera, “Mûtaana wa Muntû agakunyanîrwa na anenkanîrwe kîrî antû.

²³Nabo bakamûûraga, îndî ntukû ya ithatû akariûka.” Aritwa baraigua bûûbûî mono.

²⁴ Rîrîa baakinyîre Kaperinaumu aritithia ûgoti bwa kîûrû nî beetîre kîrî Peterû na baramûûria atîrî, “A mûritani weenu nî aritaga ûgoti bwa kîûrû?”

²⁵Peterû arabacokeria, “Îî nî aritaga.” Rîrîa Peterû aakûrûkîre nyomba, mbere ya auga noo atîa Jesû aramûûria, “Simioni, ûriona atîa? Anene ba nthîgûrû îîjî beetagia ûgoti kuuma kîrî antû ba nthîgûrû yaao kana beetagia kuuma kîrî ageni?”

²⁶Peterû aramûcokeria, “Beetagia ûgoti kuuma kîrî ageni.” Jesû aramwîra, “Nîu ni, antû ba nthîgûrû njene batîbuîri kûritaga ûgoti.

²⁷Îndî nîkenda tûtîkathûûrie antû, îta îrieene na ûgere ndwano ku. Gîkûyû kîrîa ûkagwatia kîrî kîa mbere, ûrîte mbeecha kanyueene ga kîo na ûnenkanîre kîûrûûne îrî ûgoti bwaakwa na bwaaku!”