Read KIMERU BIBLE PROTESTANT EDITION Mat 19 Bible Online

Mat 19 - KIMERU BIBLE PROTESTANT EDITION bible

Mat 19

¹Jesû akûthiria kweejana ngerekano îîu, nî aumîre Galili, areeta nthîgûrûûne ya Judea, rwongo rûrîa rûngî rwa mûuro jwa Jorodani.

²Antû babaingî nî bamûthingatîre nawe arabooria mîrimo.

³Afarisayo bamwe nî beetîre kîrî we na bakîenda kûmûgeria baramûûria, “Waatho nî bûgwîtîkîîria ntomûrûme eenga mwekûrû waawe nîûntû bwa gîtûmi kinya kîrîkû?”

⁴ Jesû arabacokeria, “Ka bûtathoma maandîko bwona atî Mûrungu ûrîa waaboombîre, oombîre ntomûrûme na mûka?

⁵ Ningî nî kwaandîki, ‘Tontû bwa gîtûmî kîu ntomûrûme agatiga îthe na ng'ina, na agwatane na mwekûrû waawe, na bobaîrî baee mwîrî jûmwe?’

⁶Tontû bûû, batîkoroaa baîrî kaîrî, îndî bagakara barî mwîrî jûmwe. Tontû bûû, gûkágîta muntû waathûûrana kîrîa Mûrungu agwatîthanîtie.”

⁷ Afarisayo baramûûria, “Îndî nîkî Musa aeere ntomûrûme waatho bwa kwaandîkîra mwekûrû waawe barûga ya kwonania akûmwînga?”

⁸Jesû arabacokeria, “Musa abwîtîkîrîrie kwîngaga eekûrû beenu nîûntû bwa ûrîa bwomîtie biongo bieenu. Îndî ûu tîu gwakari kuuma nthîgûrû îkûûmbwa.

⁹ Ndîbwîra atî, o muntû ûrîa ûkeenga mwekûrû waawe, nîûntû bwa gîtûmi kîngî tiga kîa ûthûngîîri, na nyumeene agûre mwekûrû ûngî, muntû ûu nîka akûthûngîîra.”

¹⁰Aritwa baawe baramwîra atîrî, “Gûkëethîrwa ûu nîu mantû jegiî ntomûrûme na mwekûrû waawe jakari, nî kaaba kûrega kûgûrana.”

¹¹Jesû arabeera, “Tî antû bonthe boomba kûgwata ûritani bûbû, tiga barîa Mûrungu aete ûmenyo bonka.

¹²Nîkwîthîrwa kûrî na itûmi mwanya mwanya birîa bigiragia antû bagûrana: bamwe batîgûranaga nîûntû baaciarîrwe bakari ta antû baakûri, bangî batîgûranaga nîûntû nî baakûrîrwe na bangî batîgûranaga nîûntû bwa kwirita gûtumîkîra Mûrungu. Ûrîa ûkoomba gwîtîkîîria ûritani bûbû nî abwîtîkîîrie.”

¹³Rîu antû bamwe nî baikîrie Jesû twaana tûnyi nîkenda atûrîkîîra njara na atûrombera; îndî aritwa barabarigîîria.

¹⁴Jesû arauga, “Rekeeni twaana twîje kîrî ni, na bûgatûrigîîria nîkwîthîrwa Ûnene bwa îgûrû nî bwa twaana ta tûtû.”

¹⁵Rîu athiria kûrîîkîra twaana tûu njara araciîtîra.

¹⁶Muntû ûmwe nî eetîre kîrî Jesû na aramûûria atîrî, “Mûritani, nî ûntû bûrîkû bûbwega mbwîrîte kûthithia nîkenda nkoona ûtûûro bwa kenya na kenya?”

¹⁷Jesû aramwîra, “Nîkî ûkûmbûûria mantû jegiî ûntû bûbwega? Kûrî ûmwe akî ûrî ûmwega. Ûkëenda kwona ûtûûro bwa kenya na kenya, thingata Maathana.”

¹⁸ Muntû ûu aramûûria, “Jarîkû?” Jesû aramwîra, “Ûkóragana na ûkáthûngîîra na ûkáiya na ûgátwîrîîra muntû ûkûûjî bwa ûrongo.

¹⁹ Tîîyaga abaagu na nyakwe, na weendage muntû ûngî ta ûrîa ûciendeete.”

²⁰Muntû ûu aramwîra atîrî, “Nî ntwîre kûthingata Maathana jau jonthe. Nî bûrîku bûngî mbwîrîte kûthithia?”

²¹Jesû aramwîra, “Ûkëenda kwaa ûmwagîru buru, îta wendie into biaaku na ûgaîre nkîa mbeecha iu, naagwe ûkeethîrwa ûrî na ûtonga îgûrû; rîu wîîje ûnthingate.”

²²Rîrîa aigîrue ûu araciîtîra aigîtue bûbûûî, nîûntû nî aarî gîtonga gîkînene mono.

²³Rîu Jesû areera aritwa baawe atîrî, “Gankûbwîra na mma atî gûkeethîrwa kûrî na inya mono gîtonga gûkûrûka Ûneneene bwa îgûrû.

²⁴Kaîrî ndîbwîra atîrî, bûrî inya mono gîtonga gûkûrûka Ûneneene bwa Mûrungu, o ta ûrîa bûrî inya nkamîîra gûkûrûkîîra gakuthoone ga cindano.”

²⁵Rîrîa aritwa baigîrue ûu bararigara mono na baramûûria, “Nûû îndî ûûmba kwonoka?”

²⁶Jesû arabaraithîîria arauga, “Kîrî antû, ûntû bûu bûtîûmbîka, îndî kîrî Mûrungu mantû jonthe nî jombîkaga.”

²⁷Rîu Peterû arauga, “Baatuî nî tûtigîte into bionthe na twakûthingata, nîmbi tûkoona?”

²⁸ Jesû arabeera, “Ndîbwîra na mma atî, rîrîa Mûtaana wa Muntû agakarîra gîtî kîaawe kîa Ûnene, kîrîa kîrî mwago, ntukû ya mûthiro jwa nthîgûrû, baabuî barîa bwanthingatîre bûgakarîra itî îkûmi na biîrî bia ûnene, bûkîgambithagia antû ba mîîrîga îkûmi na îîrî ya Israeli.

²⁹O muntû ûrîa ûtîgîte nyomba yaawe, kana agatiga îthe na ng'ina kana agatiga ataana na aarî ba ng'ina, kana aana baawe kana agatiga miuunda nîûntû bwaakwa, akarîwa mainda îgana, na aewe ûtûûro bwa kenya na kenya.

³⁰ Îndî babaingî barîa barî mbere bakaa ba mûthia, na barîa barî ba mûthia bae ba mbere.”