Read KIMERU BIBLE PROTESTANT EDITION Mat 2 Bible Online

Mat 2 - KIMERU BIBLE PROTESTANT EDITION bible

Mat 2

¹Rîrîa Jesû aaciarîrwe ntûûreene ya Bethlehemu nthîgûrûûne ya Judea, mûnene Herode nîwe waathanaga. Kagiita gagakai nyuma ya Jesû agûciarwa, antû baboome nî beetîre ntûûra ya Jerusalemu baumîte bwa gaiti.

²Nabo barooria, “Nîkû kaana karîa gakaa mûnene wa Ayahudi gaciarîîrîtwe? Nîkwîthîrwa nî twonete njota yaawe kuuma bwa gaiti, naatuî twîjîte kûmûthaathayia.”

³Rîrîa mûnene Herode na antû bonthe barîa baatûûraga Jerusalemu baigîrue mantû jau, nî baigîrue bûbûûî mono.

⁴Tontû bûû, areeta athînjîri-Mûrungu barîa anene bonthe na aritani ba Waatho na arabooria atîrî, “Kristû agaciarîrwa kû?”

⁵Nabo baramûcokeria, “Nî Bethlehemu ntûûra îrîa îrî nthîgûrû ya Judea, nîkwîthîrwa nî kwaandîkîtwe nî kîroria ûjû:

⁶ ‘Î gwe Bethlehemu ntûûra îrîa îrî nthîgûrû ya Judea, gwe ûrî ûmwe wa ntûûra irîa irî îgweta nthîgûrûûne ya Judea; nîkwîthîrwa mûnene akauma kîrî gwe, ûrîa ûkathaga antû baakwa ba Israeli.’”

⁷Rîu Herode areeta antû bau boome na witho, arabooria rîrîa rîongwa boonere njota îîu.

⁸Tontû bûû, arabatûma Bethlehemu arabeera, “Îteeni bûûrithîrie bwega mantû jegiî kaana kau na bwakoona, bwîje bûmenyîthie nîkenda kinya ni mbîta gûkathaathayia.”

⁹Bathiria kwigua ûrîa mûnene aabeeraga, baraambîrîria rûgendo. Kûrakara atîrî, njota îrîa baarî bakwona kuuma bwa gaiti îrabatongeeria mwanka îrarûngama îgurû rîa arîa kaana kaarî.

¹⁰Rîrîa boonere njota îîu baragwîrua mono.

¹¹Rîu, barakûrûka nyomba na baroona mwana ûu arî na ng'ina, baraturia maru na baramûthaathayia. Baramwaa biewa bia thaabu na ubaani na manemane.

¹²Mûrungu arabakaania barî kîrootoone bagácokeera kwa Herode. Tontû bûû, baracoka kwaao na njîra îngî.

¹³Rîrîa antû bau boome beetîre mûraîka wa Mwathani nî aumîrîîre Josefu arî kîrootoone aramwîra atîrî, “Ûkîîra ûjûkie mwana na ng'ina bûûre bwîte Misri. Bûkare kû mwanka rîrîa nkabwîra, nîûntû Herode nî agûcwaa mwana ûûjû amûûraga.”

¹⁴Rîu Josefu arookîîra na arajûkia mwana na ng'ina bareeta ûtukû mwanka Misri.

¹⁵ Nabo barakara ku mwanka rîrîa Herode aakuîre. Mantû jau jaathithîkîre nîkenda rûteto rûrîa kîroria kîa Mwathani kîaarîtie rûûjûra: “Nî ndeetîre Mûtaana waakwa kuuma Misri.”

¹⁶Rîrîa Herode aamenyere atî antû bau boome ba kuuma bwa gaiti ka bamwaîrie nî aathûûrîre mono. Tontû bûû, ararita Waatho atî tûîjî tunthe tûrîa tûtîkinyîtie mîaka îîrî twa kuuma ntûûra ya Bethlehemu na ntûûra irîa ciamîthîûrûkîrîte tûûragwe. Augîre twaana tûrîa tûtakinyîtie mîaka îîrî tûûragwe nîkwîthîrwa nî mîaka îîrî yaarî îkûthîra kuuma rîrîa antû bau boome baarî bakwona njota.

¹⁷Tontû bûû, nteto irîa ciarîîtue nî kîroria Jeremia irojûûra:

¹⁸ “Kajû gakwigîîgua kuuma Rama, kîrîro na gûkaya gûkwingî. Raeli akîrîrîra aana baawe, nawe nî aregeete gûkirua. Tontû bonthe nî bathirîtie gûkua.”

¹⁹Nyumeene, Herode agûkua, mûraîka wa Mwathani nî aumîrîîre Josefu arî kîrootoone kûu Misri

²⁰aramwîra atîrî, “Ûkîîra ûjûkie kaana na ng'ina, bûcoke nthîgûrû ya Israeli, nîûntû barîa baracwaga kûûraga kaana nî barakuîre.”

²¹Tontû bûû, Josefu arookîîra, arajûkia kaana na ng'ina, baracoka nthîgûrû ya Israeli.

²²Îndî rîrîa aigîrue atî Arikelaû nîwe ûkwaathana nthîgûrû ya Judea nyuma ya îthe, Herode agûkua, arakîra gwîta ku. Aathiria gûkaanua arî kîrootoone areeta nthîgûrû ya Galili.

²³ Areeta gûtûûra ntûûreene îrîa îtagwa Nazarethi. Ûu nîu nteto irîa ciarîîtue nî iroria ciojûrîre: “Ageetagwa Mûnazarethi.”