Read KIMERU BIBLE PROTESTANT EDITION Mat 21 Bible Online

Mat 21 - KIMERU BIBLE PROTESTANT EDITION bible

Mat 21

¹Jesû amwe na aritwa baawe nî beetîre barakinya Bethifage, karîmeene ka mîzeituni, karîa kaarî akuî na Jerusalemu. Rîu aratûma aritwa baîrî na arabeera,

²“Îteeni ntûûreene îrîa bûkwona mbere yeenu, na bûkeethîra ntigiri na gatigiri kaayo itheeki. Thaûreeni na bûndeetere cio.

³Muntû akëeja kûbûûria nîkî bûkûthaûra ntigiri, bûmwîre, ‘Mwathani nî agûcienda.’ Nawe akabûrekeeria bûndetere o rîo.”

⁴Ûntû bûû bwaathithîkîre nîkenda nteto irîa ciarîîtue nî kîroria ikoojûra:

⁵ “Îîreeni ntûûra ya Zaiûni atîrî, raithîîria mûnene waaku nî eejîte kîrî gwe! Nî ainyiîtie na nî akamati nî ntigiri, arî mûgongo jwa gatigiri, nako nî kaanaana ga ntigiri.”

⁶Rîu aritwa bagwîta barathithia o ûrîa beeri.

⁷Baraikia ntigiri na kîanaana kîaayo, baraara nguû mîgongo yaacio, nawe aracikarîra.

⁸Antû babaingî nî baarîre nguû ciaao njîreene na bangî barauna mathîgî bakîmwaragîra njîreene.

⁹ Kîrîndî kîrîa kîaarî mbere yaawe na kîrîa kîaarî nyuma nî kîaugaga na kajû, “Mûtaana wa Daudi arokumagua! Nî atharimi ûrîa wîjîte riîtweene rîa Mwathani, Arokumagua îgûrû mono!”

¹⁰Rîrîa aakûrûkîre Jerusalemu, antû bonthe nî baamatûkîre kîrî we bakîûragia, “Ûjû nûû?”

¹¹Barîa beetanîtie nawe barabacokeria, “Ûjû nî Jesû, kîroria kuuma ntûûra ya Nazarethi kûu nthîgûrû ya Galili.”

¹²Jesû arakûrûka kîûrûûne na areenga antû barîa bendagia na barîa bagûraga into ku. Araturûra meetha cia barîa baakûranagia mbeecha irîa ciatumagîrwa kîûrûûne na irîa itatumagîrwa kîûrûûne. Ningî araturûra itî bia barîa beendagia ijea.

¹³ Arabeera, “Nî kwaandîki atî, ‘Nyomba yaakwa îgeetagwa nyomba ya maromba,’ îndî buî bûmîethetie giiciitho kîa atuunyani.”

¹⁴Bionje na atumuumu nî beetîre kîrî Jesû kûu kîûrûûne, nawe arabooria.

¹⁵Rîrîa athînjîri-Mûrungu barîa anene na aritani ba Waatho boonere mantû ja kûrigaria jarîa Jesû aathithîrie, na baigua ûrîa twaana twatûmîîragia na kajû kûu kîûrûûne tûkiugaga, “Mûtaana wa Daudi arokumagua,” nî baathûûrîre mono.

¹⁶ Tontû bûû, baramûûria, “Nî ûkwigua ûrîa twaana tûtû tûkuuga?” Jesû aracokia, “Îî nî nkwigua! Ka buî bûtathoma ûrîa kwaandîki atî, ‘Gwe nî ûtûmîte twaana tûnyi na tûkenke tûgûkumia ûrîa kwagîrîte.’”

¹⁷Rîu arabatiga na arauma ntûûreene îîu areeta kûrara Bethania.

¹⁸Rûûneene rûûkîrî kainda, arî njîreene acokeete Jerusalemu nî aigîrue mpara.

¹⁹Aroona mûkûû rûteere rwa njîra, na areeta akuî naju. Îndî areethîra jûtî na matuunda tiga mabûûra akî. Tontû bûû, arajûruma, “Ûgáciara matuunda kaîrî.” Mûkûû jûu jûrooma o rîo.

²⁰Rîrîa aritwa boonere ûu nî baarigarîre mono bakîûragia, “Nîatîa mûkûû jwooma na mpwîî?”

²¹ Jesû arabeera, “Ndîbwîra na mma atî bûkeethîrwa bûrî na wîtîkio na bûtî na nkaanja no aniini, bwoomba kûthithia ûntû ta bûû ndathithîria mûkûû jûjû na kinya nkûrûki. Bwoomba kwîra kîrîma gîkî: ‘Kûûka wîte ûkagwe îrieene,’ na gûgakara u.

²²Naabuî bwaromba gîntû kinya kîrîkû bwîtîkîtie bûkaewa.”

²³Jesû nî aakûrûkîre kîûrûûne na arambîrîria kûritana. Rîu athînjîri-Mûrungu barîa anene na akûrû barîa atongeeria baramûûria, “Nî Waatho bûrîkû ûrî nabu bwa kûthithia mantû jaja? Nûû ûkûete inya îîu?”

²⁴Jesû arabacokeria, “Kinya ni nkabûûria kîûria na bwancokeria, nkabwîra nîkû nditîte inya ya kûthithia mantû jaja.

²⁵Johana aaritîre waatho bwa kûbatithia antû kû? Bwaumîte îgûrû kana bwaumîte kîrî antû?” Nabo barakararania bakiugaga, “Twauga, bwaumîte îgûrû, agatûûria, ‘Nîmbi îndî yaagirîrie bûmwîtîkia?’

²⁶Îndî twauga, ‘Bwaumîte kîrî antû, nî tûgûkîra antû, nîkwîthîrwa bonthe nî beetîkîtie atî Johana aarî kîroria.’”

²⁷Tontû bûû, baramûcokeria, “Tuî tûtiijî!” Nawe Jesû arabeera, “Kinya ni ntîbwîra nîkû nditaga inya ya kûthithia mantû jaja.”

²⁸“Thikîîreeni bwega nîkenda bûncokeria: Kûrî muntû ûmwe waarî na ataana baîrî. Areera ûrîa wa mbere, ‘Mûtaana waakwa, naarua îta ûkarîme mûûndeene jwa mîzabibû.’

²⁹Nawe aramwîra, ‘Ntîîta!’ Îndî nyumeene araigwata na areeta muundeene kûrîma.

³⁰Mûkûrû ûu areeta kîrî mûtaana waawe wa baîrî na aramwîra o ta ûrîa eerîte ûrîa ûngî. Mûtaana ûu areera îthe atîrî, ‘Îî baaba, ngeeta!’ Îndî ateetîre.

³¹Nî ûrîkû kîrî ataana bau bobaîrî wathithîrie ûrîa îthe eendaga?” Nabo baramûcokeria, “Nî mûtaana ûrîa eerîre mbere.” Jesû arabeera, “Nî nkûbwîra na mma atî, aritithia ûgoti na maraya bagakûrûka Ûneneene bwa Mûrungu îndî buî bûtîkûrûka.

³² Nîkwîthîrwa Johana nî eejîre kûbwonia ûrîa muntû abuîri gûtûûra arî ûmwagîru îndî buî bûtamwîtîkîrie. Îndî aritithia ûgoti na maraya nî baamwîtîkîrie. Kinya rîrîa bwonere ûu buî bûtairira na bûmwîtîkia.”

³³ Jesû arauga atîrî, “Thikîîreeni ngerekano îngî: muntû ûmwe nî eetîre araanda mîzabibû muundeene jwaawe na arajwirigîra na rûthingo rwa maiga. Aracoka areenja îrinya rîa gwiitagîra nzabibû na araaka kîrîngo muundeene jûu. Arakomborithania muunda na areeta nthî îngî.

³⁴Îgiita rîa maketha, aratûma nthûûmba ciaawe kîrî arîmi bau nîkenda bakamûretera maketha jarîa jaarî jaawe.

³⁵Arîmi bau baragwata nthûûmba iu; baraûûra ûmwe, na barooraga ûûngî, na bararinga ûûngî na maiga.

³⁶Mwene muunda aratûma nthûûmba ingî inyingî nkûrûki ya irîa aatûmîte mbere. Arîmi barabathithîria o ta ûrîa baathithîrîtie barîa bangî.

³⁷Mûthieene aratûma mûtaana waawe akîthûgaanagia bakamûgwatîra nthoni.

³⁸Rîrîa arîmi bau boonere mûtaana ûu bareerana atîrî, ‘Ûjû nîwe mûrîaûkua! Njûûni tûmûûrage nîkenda tûkajûkia rûgai rwaawe.’

³⁹Rîu, baramûgwata na baramuumagaria muundeene jûu jwa mîzabibû na baramûûraga.”

⁴⁰Tontû bûû, Jesû arabooria, “Rîrîa mwene muunda jûu akeeja akathithia arîmi bau atîa?”

⁴¹Nabo baramûcokeria, “Ka akooraga arîmi bau baaî na anenkanîre muunda jûu jwa mîzabibû kîrî arîmi bangî barîa bakamûnenkagîra maketha jarîa jarî jaawe îgiita rîa maketha.”

⁴² Rîu Jesû arabeera, “Ka buî bûtathoma maandîkoone atî: ‘Îîga rîrîa rîongwa aaki baaregere, nîrîo rîeete rîa koona. Nî Mwathani ûthithîtie ûntû bûû, nabu nî ûntû bwa kûrigaria mono kîrî tuî!’

⁴³“Tontû bûû, ndîbwîra atî Ûneene bwa Mûrungu bûkajûkua buume kîrî buî na bûnenkerwe antû barîa bakaathîkagîra Mûrungu. [

⁴⁴Ûrîa ûkagwîra iiga rîu akaunîkanga, Îndî ûrîa rîkagwîra rîkamûthethera.”][3]

⁴⁵Rîrîa athînjîri-Mûrungu barîa anene na Afarisayo baigîrue ngerekano iu ciaawe, baraciûra atî nî mantû ja begiî aaragia.

⁴⁶Tontû bûû, baracwaa ûrîa bamûgwata, îndî barakîra kîrîndî, nîûntû nî gîetîkîtie atî Jesû aarî kîroria.