Read KIMERU BIBLE PROTESTANT EDITION Mat 22 Bible Online

Mat 22 - KIMERU BIBLE PROTESTANT EDITION bible

Mat 22

¹Jesû nî aarîrie kîrîndî kaîrî agîtumagîra ngerekano akiugaga:

²“Ûneene bwa îgûrû bwoomba kûng'uananua na mûnene ûrîa wathithîrie kîatho kîa mûranû nîûntû bwa mûtaana waawe.

³Nî aatûmîre nthûûmba ciaawe nîkenda ciîta gwîta barîa beeti kîathoone kîa mûranû, îndî antû barareega gwîta kîathoone.

⁴Aracoka aratûma nthûûmba ingî na araciîra atîrî, ‘Îteeni bwîre barîa bagwîti ûjû: kîatho gîaakwa nî kîthirîtie kûthuranîrwa; ndeegwa irîa noru nî ithînji na mantû jonthe nî jathuranîri. Bereeni beeje kîathoone kîa mûranû.’

⁵Îndî antû bau batatindanîre na mantû jau ja mûranû. Ûmwe areeta muundeene jwaawe, na ûngî areeta ngûgîîne ciaawe,

⁶na barîa bangî baragwata nthûûmba iu ciatûmi na baraciûûra na barabooraga.

⁷Mûnene ûu nî aathûûrîre mono, na aratûma asikarî barooraga ooragani bau na baraîîthia ntûûra yaao.

⁸Rîu areera nthûûmba ciaawe, ‘Ndîbwîra na mma atî kîatho kîa mûranû nî gîkûthuranîri buru, îndî bau bagwîti batîkwagîri gwîtwa.

⁹Tontû bûû, îteeni njîreene na bwîte bonthe barîa bûkoona bûbeere beeje kîathoone.’

¹⁰Tontû bûû, nthûûmba iu ireeta njîreene na ireeta bonthe barîa cionere: babeega na babaaî. Nyomba îrîa yaathuranîri îroojûra antû ndoo.

¹¹“Rîrîa mûnene aakûrûkîre nyomba kîrî ageni, nî oonere muntû ûteekîrîte nguû ya mûranû.

¹²Mûnene ûu aramûûria atîrî, ‘Mûcoore, nîatîa ûûmbîre gûkûrûka aja ûtî na nguû ya mûranû?’ Muntû ûu atoonere bwa kûmwîra.

¹³ Rîu mûnene areera nthûûmba ciaawe atîrî, ‘Mûtheekeni njara na magûrû, bûmûgere oome kûrîa kûrî na muundu. Kûu nîku antû bakarîraga na gûkabakabaga maîgo.’

¹⁴Nîkwîthîrwa babaingî nî beeti îndî barîa bathuuri nî babakai.”

¹⁵Rîu Afarisayo bareeta na baraireba ûrîa bakagwata Jesû kuumania na rwaria rwaawe.

¹⁶Tontû bûû, baramûtûmîra athingati baao, amwe na antû barîa baagwataga Herode mbaru. Beeta barooria Jesû atîrî, “Mûritani, tuî nî tûkûmenya atî ûrî muntû waragia ûûma, na ûritanaga mantû ja Mûrungu ûrîa kwagîrîte. Gûtî muntû ûkîraga nîûntû ûtîûragia këethîra muntû arî na îgweta kana atî na îgweta.

¹⁷Nandî twîre ûrîa ûkûthûgaania. Waatho bweetû nî bûgwîtîkîîria tûrita ûgoti kîrî Kaisarî, mûnene wa Roma?”

¹⁸Îndî nîûntû Jesû nî aamenyaga ûûî bûrîa baarî nabu, arabeera, “Îbuî aciayia, nîkî bûkwenda kûngeria?

¹⁹Mbonieni mbeecha irîa bûrîaga ûgoti nacio.” Nabo baramûnenkera mbeecha irîa ciatumagîrwa îgiita rîu.

²⁰Jesû arabooria, “Mbicha îîjî na maandîko jaja nî jaû?”

²¹Baramûcokeria, “Nî bia Kaisarî.” Rîu Jesû arabeera, “Nenkagîreeni Kaisarî birîa birî biaawe, na bûnenkagîre Mûrungu birîa birî biaawe.”

²²Rîrîa baigîrue ûrîa aabacokerie nî baarigarîre mono na baraciîtîra.

²³ Ntukû o îîu Asadûkayo barîa batetîkagia atî antû baakuû bakariûka, nî beetîre kîrî Jesû na baramwîra atîrî,

²⁴ “Musa nî augîre atî muntû akëeja gûkua atî na twaana, no mwanka mûtaana wa ng'ina ajûkie ntigwa îîu nîkenda agaciarîra mûtaana wa ng'ina twaana.

²⁵Nandî aja gweetû nî kwaarî na ataana mûgwanja ba muntû ûmwe. Wa mbere nî aagûranîre îndî arakua atî na twaana, na mûtaana wa ng'ina arajûkia ntigwa îîu.

²⁶Kinya we arakua atî na twaana, na wa bathatû arathithia o ûu mwanka wa mûgwanja.

²⁷Ataana bau bonthe bagûkua kinya ntigwa îîu nî yakuîre.

²⁸Nandî rî, rîrîa akuû bakariûka mûka ûu akeethîrwa arî mwekûrû waaû, nîkwîthîrwa ataana bau bonthe mûgwanja nî baamûgûrîte?”

²⁹Jesû arabacokeria, “Nî mma bûtiijî mantû jau nîûntû bûtiijî Maandîko kana bûmenya Mûrungu arî na inya.

³⁰Nîkwîthîrwa rîrîa akuû bakariûkua bakeethîrwa bakari ta araîka barîa barî îgûrû, bo batîgûranaga kana bagûrwa.

³¹Îndî ka bûtathoma ûrîa Mûrungu augîîte bwegiî kûriûka kwa barîa bakuîte?

³² Augîîte, ‘Ûûni nî ni Mûrungu wa Abrahamu, na wa Isaaka na wa Jakubu.’ Tontû bûû, we tî Mûrungu wa barîa bakuîte, îndî we nî Mûrungu wa barîa barî mwoyo.”

³³Rîrîa ntundu yaigîrue ûu îrarigarua nî ûritani bwaawe.

³⁴Rîrîa Afarisayo baigîrue atî Jesû nî aathirîrie nkaanja cia Asadûkayo, nî boothûranîre amwe.

³⁵ Mûgambi ûmwe waao, ûrîa waijî Waatho bwega akîgeria Jesû aramûûria atîrî,

³⁶“Mûritani, nî rîathana rîrîkû rîrîa rînene nkûrûki ya jangî jonthe kîrî Waatho bwa Musa?”

³⁷ Jesû aracokia, “Endaga Mwathani Mûrungu waaku na nkoro yaaku yonthe, na mwoyo jwaaku junthe, na mathûgaanio jaaku jonthe.

³⁸Rîrî nîrîo rîathana rîrîa rînene buru na rîa mbere.

³⁹ Rîathana rîa jaîrî rîng'uanene na rîo. Narîo nî: ‘Endaga muntû ûngî o ta ûrîa ûciendeete gwengwa!’

⁴⁰Waatho bunthe bwa Musa na mooritani ja iroria jaumanîtie na maathana jau jo jaîrî.”

⁴¹Rîrîa Afarisayo boothûranîte amwe, Jesû nî aaboorîrie atîrî,

⁴²“Babuî bûthûgaanagia atîa mantû jegiî Kristû? We nî mûtaana waû?” Baramûcokeria, “Nî mûtaana wa Daudi.”

⁴³Jesû arabeera, “Îndî nîkî Daudi oojûri Roho Ûmûtheru aamwîtaga ‘Mwathani?’ rîrîa augîre:

⁴⁴ ‘Mwathani nî eerîre Mwathani waakwa: Kara nthî rûteere rwaakwa rwa ûrîo, mwanka rîrîa nkaethia anthû baaku gîkinyithio kîa magûrû jaaku.’

⁴⁵“Rîu këethîra Daudi arîîta Mesia ‘Mwathani’ rî, nîatîa Mesia ûu oomba kwîthîrwa arî mûtaana waawe?”

⁴⁶Gûtî muntû kinya ûmwe woombîre kûmûcokeria noo atîa. Kuuma ntukû îîu gûtî muntû woomîîrîrie kûmûûria kîûria kaîrî.