Read KIMERU BIBLE PROTESTANT EDITION Mat 23 Bible Online

Mat 23 - KIMERU BIBLE PROTESTANT EDITION bible

Mat 23

¹Rîu Jesû areera ntundu amwe na aritwa baawe ûjû,

²“Aritani ba Waatho na Afarisayo nîbo beetîkîrîtue kûritana Waatho bwa Musa.

³Tontû bûû, thithagieni na bûthingatage jarîa bakabûritana, îndî bûkáthithagieni ûrîa bakûthithia nîûntû jarîa baritanaga tîjo bathithagia.

⁴Bakamatithagia antû bangî mîrigo îmîrito mono, îndî bo batîendaga kûbateethia kûmîkamata.

⁵ Bathithagia mantû jonthe nîkenda boonwa nî antû. Baogaga mîcibi îrî na Maandîko biongo na njareene ciaao, na bakoongeera ûraaja bwa nguû, nîkenda bonania nî babaagîru.

⁶Beendeete gûkaragîra itî birîa biîki nîûntû bwa antû baanene biathoone na gûkaragîra itî birîa biega iromberoone.

⁷Beendeete gûkethagîrua thokoone na gwîtwa nî antû: ‘Mûritani.’

⁸Îndî buî bûtîbuîrîte gwîtwa ‘Mûritani’ nîûntû bwinthe bûrî ba mûûrû jûmwe na bûrî na Mûritani ûmwe akî.

⁹Ningî aja nthîgûrû bûgéeta muntû kinya ûrîkû ‘Baaba,’ nîkwîthîrwa Abaagu weenu nî ûmwe akî, nawe nî ûrîa ûrî îgûrû.

¹⁰Ningî bûgéetwa ‘Mûtongeeria,’ nîkwîthîrwa mûtongeeria weenu nî ûmwe akî, na nîwe Kristû.

¹¹ Ûrîa mûnene buru kîrî buî abuîri kwîthîrwa arî nthûûmba yeenu.

¹² Ûrîa wineneagia akanyiiua, na ûrîa winyiiagia akaneneua.

¹³“Wûûi kîrî buî aritani ba Waatho na Afarisayo; buî bûrî aciayia! Ûritani bweenu bûrigîrîtie antû batîgakûrûke Ûneneene bwa îgûrû nîûntû bûi bûtîkûrûkaga kana bwîtîkîîria antû bakûrûka ku. [

¹⁴Wûûi kîrî buî aritani ba Waatho na Afarisayo; buî bûrî aciayia! Buî bwaîîragia ntigwa bûkabatuunya into biaao, kinya këethîra nî bûrombaga maromba jamaraaja. Tontû bûû, bûgatuîrwa na bûkanûkue bûbûthûûku mono.][4]

¹⁵“Wûûi kîrî buî, aritani ba Waatho na Afarisayo, buî aciayia! Bwîtanagia na îria na nthî înjûmo bûgîcwaa muntû wa kûthingata ndini yeenu, na bwamwona, bûgatûma aa wa gwîta mwankiine jwa kenya na kenya mainda jaîrî nkûrûki yeenu bwingwa.

¹⁶Wûûi kîrî buî atongeeria bûrî atumuumu! Buugaga muntû akëeja gûciîtia akîgwetaga kîûrû, gûtî u gûkara. Îndî muntû akëeja gûciîtia akîgwetaga thaabu îrîa îrî kîûrûûne, na akarega kûûjûria mûciîtio jûu, jwamûthûûkia.

¹⁷Îbuî atumuumu biaa! Nî kîrîkû kînene nkûrûki ya kîngî: nî thaabu kana nî kîûrû kîrîa gîtûmaga thaabu îîu yaa întheru?

¹⁸Ningî nî buugaga atî muntû akëeja gûciîtia akîgwetaga kîritîro kîa igongwana, gûtî u akara arega kûûjûria mûciîtio jûu. Îndî akëeja gûciîtia akîgwetaga biewa birîa birî kîritîroone, na akarega kûûjûria mûciîtio jûu, jwamûthûûkia.

¹⁹Îbuî atumuumu! Nî kîrîkû kîrî na gîtûmi nkûrûki ya kîngî: nî kîewa kîrîa kîrî kîritîroone kana nî kîritîro kîrîa gîtûmaga kîewa kîaa gîkîtheru?

²⁰Ûrîa ûciîtagia akîgwetaga kîritîro, aciîtagia na kîritîro na kinya gîntû kîonthe kîrîa kîrî kîritîroone kîu.

²¹Ningî ûrîa ûciîtagia akîgwetaga kîûrû, aciîtagia na kîûrû kîu na kinya agaciîtia na Mûrungu ûrîa ûtûûraga ku.

²² Ningî ûrîa ûciîtagia akîgwetaga îgûrû, aciîtagia na gîtî kîa Ûnene kîa Mûrungu na agaciîtia na ûrîa ûgîkaragîra.

²³ Wûûi kîrî buî aritani ba Waatho na Afarisayo, buî aciayia! Bûritagîra Mûrungu gîchunchî kîmwe kuuma kîrî îkûmi kîa twinto tûrîa twîkagîra irio mûchemo, tûrîa tûkari ta ndania kana nchini kana itûngûrû îndî bûtîtindanagîra na mantû jarîa jarî gîtûmi waathoone ta: îota na kîaao na wîtîkio. Mantû jaja nîjo bûbuîri kûûjûria jarî ja mbere na bûtîkûûrîrua nî jau jangî.

²⁴Îbuî atongeeria atumuumu! Bûkembaga ngi kuuma chaiine, îndî bûkameria nkamîîra.

²⁵“Wûûi kîrî buî aritani ba Waatho na Afarisayo, buî aciayia! Bûcionanagia bûrî babeega îndî ndeene yeenu bûûjûri ûtuunyani na ngoga.

²⁶Îbuî Afarisayo atumuumu, ambeni bûthongomie mîîtîre yeenu, nîkenda bwîthîrwa bûrî babaagîru o ta ûrîa bûkwonekana bûkari.

²⁷ Wûûi kîrî buî aritani ba Waatho na Afarisayo, buî aciaayia! Bûkari ta tûburi tûgemetue bwa oome, îndî ndeene ya tu kûrî na mîîrî îmîoru îkûnuunka.

²⁸O ûu nîu kinya buî bwonekanaga bûrî babaagîru bwa oome, îndî ndeene bûûjûri ûciaayia na ûthûûku.

²⁹“Wûûi kîrî buî aritani ba Waatho na Afarisayo, buî aciaayia! Iroria biakua bûbiakagîra tûburi tûtwega na bûkagemia tûburi twa antû barîa baarî babaagîru.

³⁰Ningî nî buugaga, ‘Këethîra nî twaarî o îgiita rîa ba biûjûjû, tûtîngîgwatanîra nabo tûûraga iroria.’

³¹Tontû bûû, nî bûgwîtîkîîria atî bûrî nchiarwa cia antû bau booragîre iroria.

³²Rîu thirîkîrieni ngûgî îrîa biûjûjû bieenu biaambîrîrie!

³³ Îbuî njoka, buî rûciara rwa njoka irî thumu! Nîmbi îkagiria bûgerwa mwankiine jwa kenya na kenya?

³⁴Kîu nîkîo gîtûmîte mbûtûmîra iroria, na antû baboome na kinya aritani ba Waatho. Bûkooraga bamwe baao, na bwambe bangî, na bûûre bangî ibooko barî iromberoone na bûthangîkie bangî bûkîînganaga nabo kuuma ntûûra îmwe mwanka ntûûra îngî.

³⁵ Tontû bûû, bûgakanûkua nîûntû bwa kûûraga antû bonthe barîa baagîru: kuuma Abeli mwanka Zekaria mûtaana wa Barakia, ûrîa bwooragîîre gatîgatî ga kîûrû na kîritîro kîa igongwana.

³⁶Ndîbwîra na mma atî, nthûkî îîjî îgakanûkua nîûntû bwa ûûragani bûu bunthe.

³⁷“Jerusalemu, gwe Jerusalemu! Gwe ûûragaga iroria na ûkaûûra barîa Mûrungu aatûmîte kîrî gwe na maiga! Nî jang'ana ngeretie gûcokanîîria antû baaku amwe ta ûrîa ngûkû îcokanagîîria ichui biaayo mathaguune jaayo, naagwe ûtîîtîkagîîria.

³⁸ Atîrî, nyomba yaaku îkeerûkîrwa îtigwe îrî îgaanjo.

³⁹ Ndîkwîra na mma atî, ûtîmbona kaîrî, mwanka rîrîa ûkauga: ‘Nî atharimi ûrîa wîjîte riîtweene rîa Mwathani.’”