Read KIMERU BIBLE PROTESTANT EDITION Mat 24 Bible Online

Mat 24 - KIMERU BIBLE PROTESTANT EDITION bible

Mat 24

¹Rîrîa Jesû aaumagarîre kîûrûûne akîendaga gwîta, aritwa baawe nî baamwonerie nyomba irîa ciaagwateene na kîûrû.

²Jesû arabeera atîrî, “Îî, nî nkwona. Buî nî bûgûcîona? Ndîbwîra na mma atî, gûtî iiga kinya rîmwe rîaacio rîgatîgwa rîrî îgûrû rîa rîngî.”

³Rîrîa Jesû aakarîre nthî kîrîmeene kîa Mîzeituni, aritwa baawe nî beetîre kîrî we barî bonka na baramwîra, “Twîre rîrîa mantû jaja jakathithîka, na ûtwîre nî rwano rûrîkû rûkoonania rîrîa ûkeeja kaîrî na rîrîa mûthia jwa nthîgûrû jûgakinya.”

⁴Jesû arabacokeria, “Imenyagîîreni bûtîkeeje kwaîrua nî muntû kinya ûrîkû.

⁵Antû babaingî bakeeja bakîgwetaga riîtwa rîaakwa bakiugaga atî nîbo Mesia. Nabo bakaaîria antû babaingî.

⁶Bûkaigua nî gûkûrûûwa ndwaa akuî na kinya kûraaja, îndî bûkámaka. Mantû ta jau no mwanka jakarîke, îndî mûthiro jûtîrakinya.

⁷Nthîgûrû îkarwaa na îngî, na ûnene bûrwee na bûngî. Gûkeethîrwa kûrî na mpara na kwinaina kwa nthîgûrû gûntû gûkwingî.

⁸Mantû jaja jonthe jakeethîrwa jakari ta mûrîmo jûrîa mûka aigagua mbere ya agîa na mwana.

⁹ “Îgiita rîu bakabûnenkanîîria bûthangîkue na bûûragwe. Bûkathûûrwa nî antû bonthe nîûntû bwa riîtwa rîaakwa.

¹⁰Ningî nî babaingî bagatîga gwîtîkia Mûrungu, na baambîîrie gûkunyananîra na kûthûûrana bongwa.

¹¹Iroria bibingî bia ûrongo bikeeja nabio bikaaîria antû babaingî.

¹²Ûthûûku bûkaingîa na bûtûme wendo bwa babaingî bûnyiie.

¹³ Îndî ûrîa ûkomîîria mwanka mûthia nîwe ûkoonokua.

¹⁴Ningî Nteto Injega cia Ûnene bwa Mûrungu igatûmîîrua nthîgûrûûne yonthe irî ûkûûjî kîrî mîgongo yonthe. Rîu mûthiro jwa nthîgûrû jûgakinya.

¹⁵ “Rîrîa bûkoona gîntû kîrîa Mûrungu athwîre, taju mûrungu jwa mûng'uanano, jweekwa kîûrûûne o ta ûrîa kîroria Danieli augîre, (ûrîa ûkûthoma nî aciûre).

¹⁶Îgiita rîu barîa barî Judea nî bamatuke irîmeene.

¹⁷ Ûrîa ûrî îgûrûgûrû rîa nyomba akéenama kûjûkia gîntû nyomba yaawe.

¹⁸Ûrîa ûrî muundeene agácoka nyomba kûjûkia nguû yaawe.

¹⁹Wûûi kîrî aka barîa bakeethîrwa barî baarito na kîrî barîa bakeethîrwa bagîonkagia îgiiteene rîu.

²⁰Rombeeni Mûrungu nîkenda îgiita rîrîa bûkamatûka rîtîkeethîrwe rîrî rîa mpio kana rîîthîrwa rîrî ntukû ya sabatû.

²¹ Nîkwîthîrwa îgiita rîu gûkeethîrwa kûrî na mîthangîko îmingî na îmîthûûku mono, ûntû îtoonekana kaîrî kuuma rîrîa nthîgûrû yoombîrwe mwanka nandî, na îtîkoronekana kaîrî.

²²Këethîra Mûrungu atîthîrwa akuîîtie îgiita rîu, gûtî muntû ûkonoka. Îndî Mûrungu agakuîîa îgiita rîu nîûntû bwa antû barîa athuurîte.

²³Îgiiteene rîu muntû akëeja kûbwîra: ‘Mesia arî aja’ kana akabwîra, ‘Mesia arî aarîa,’ bûkámwîtîkia.

²⁴Nîkwîthîrwa Mesia ba ûrongo na iroria bia ûrongo bikeeja. Bikariinga biama bibinene na bathithie mantû ja kûrigaria nîkenda këethîra kwombîka batûma antû barîa Mûrungu athuurîte bangaratana wîtîkioone bwaao.

²⁵Thikîîreeni, ndabwîra mantû jaja mbere ya jakarîka.

²⁶ Tontû bûû, bakëeja kûbwîra, ‘Mesia, arî rwanda,’ bûgeteni nao; ningî bakëeja kûbwîra ‘Arî nyomba cia ndeene,’ bûgéetîkia ûntû bûu.

²⁷Nîkwîthîrwa Mûtaana wa Muntû akeeja oonewe kunthe o ntûti, o ta ûrîa rweni rwenagîria bwa gaiti, na o ntûti rûkoonerwa bwa rûgûrû.

²⁸ Arîa kiimba kîrî, nîo nderi ciûthûranaga.

²⁹ “Îgiita rîa mîthangîko rîathîra o rîo, riûa rîkaaga weerû kûgîe muundu, na mweri jûtige kûthaara na njota igwe kuuma îgûrû, na bingî birîa bikaraga îgûrû biinainue.

³⁰ Rîu nîrîo rwano rwa Mûtaana wa Muntû rûkoonekana îgûrû, na antû bonthe ba nthîgûrû bakaithikîîra rîrîa bakoona Mûtaana wa Muntû enamîte arî îgûrû rîa matu, arî na inya na mwago jûmûnene.

³¹Tarumbeta îkaringwa îgambe na kajû gakanene na atûme araîka baawe boothûranie antû bonthe barîa Mûrungu athuurîte kuuma nthîgûrûûne yonthe.

³²“Rîu iritaneeni kuuma kîrî mûkûû: O rîrîa mpang'i ciaaju ciambagîîria kûtheûka, na mabûûra jakambîrîria kûriiba nî bûmenyaga atî, thano îrî akuî.

³³O ûu naabuî rîrîa bûkoona mantû jaja jonthe jakarîka, bûmenye atî Mûtaana wa Muntû arî akuî mono.

³⁴Ndîbwîra na mma atî, nthukî îîjî yonthe îtîthira mantû jaja jonthe jatîrakarîka.

³⁵Îgûrû na nthî bikathira, îndî nteto ciaakwa igatûûra kenya na kenya.

³⁶“Gûtî muntû wiijî ntukû kana thaa irîa mantû jaja jagakarîka. Araîka na kinya Mûtaana batiijî îndî nî Baaba wenka wiijî.

³⁷ Rîrîa Mûtaana wa Muntû akeeja gûkeethîrwa gûkari ta ûrîa gwakari îgiita rîa Noa.

³⁸Mbere ya ngai ya maburiko yuura, antû nî barîîjaga na bakanyua, na bakagûrana na bakagûrwa, mwanka ntukû îrîa Noa aakûrûkîre sabineene.

³⁹ Antû batamenyaga jarîa jeetaga na mbere, mwanka rîrîa mûguû jweejîre jûrabakondoria bonthe. O ûu nîu gûgakara rîrîa Mûtaana wa Muntû akeeja.

⁴⁰Îgiita rîu antû baîrî bakeethîrwa bakîrîmaga muundeene, ûmwe ajûkûe na ûngî atîgwe.

⁴¹Aka baîrî bakeethîrwa bakîthiaga, ûmwe ajûkûe na ûngî atîgwe.

⁴²Tontû bûû, kareni bwithuranîrîte, nîûntû bûtiijî ntukû îrîa Mwathani weenu agacoka.

⁴³ Îndî menyeni atî, këethîra mwene nyomba nî ethagîrwa akîmenyaga thaa irîa mwamba akeeja, atîmama, na atîrekeeria mwamba auna nyomba yaawe.

⁴⁴Tontû bûû, kinya buî kareni bwithuranîrîte nîkwîthîrwa Mûtaana wa Muntû akeeja thaa irîa bûtîmwîrîgîrîte.”

⁴⁵Jesû areeta na mbere kûbeera, “Nthûûmba îrîa mbîtîkua na înjûme nî îrîkû? Nî îrîa mûnene waayo aethetie mûrûngamîîri wa bangî, abaejage biakûrîa îgiita rîrîa rîagîrîte.

⁴⁶Kûgwîrua nî kîrî nthûûmba îîu, këethîra mwathi waayo rîrîa agacoka, akamîîthîra îkîritaga ngûgî o îîu.

⁴⁷Ndîbwîra na mma atî akaethia nthûûmba îîu mûrûngamîîri wa into biaawe bionthe.

⁴⁸Îndî nthûûmba îîu îkëethîrwa îrî îmbîî, îgacîîra yongwa atî, ‘Mwathi waakwa agakara îgiita rîrîraja atîracoka.’

⁴⁹Rîu akaambîrîria kûûra nthûûmba irîa arûngamîrîte, na akaambîrîria kûrîa na kûnyua arî amwe na oogiti bangî.

⁵⁰Mwathi waayo akeeja ntukû na thaa irîa îtîmwîrîgîrîte.

⁵¹Mwathi ûu akamîkanûkia bûbûuî, na amîgere kûrîa aciayia bakeethîrwa barî. Kûu bagakaraga bakîrîraga na gûkabakaba maîgo.