Read KIMERU BIBLE PROTESTANT EDITION Mat 25 Bible Online

Mat 25 - KIMERU BIBLE PROTESTANT EDITION bible

Mat 25

¹ “Îgiiteene rîu Ûnene bwa îgûrû bûkang'uananua na aarî îkûmi barîa baajûkîrie taawa ciaao na bareeta kûthagana mûjûkania.

²Bataano kîrî bo baarî biaa, na bataano baarî baboome.

³Bau biaa baajûkîrie taawa ciaao irî na maguta îndî bataakamatîre maguta ja kwongeera.

⁴Bau boome nî baajûkîrie taawa ciaao irî na maguta na barakamata maguta ja kwongeera.

⁵Rîrîa mûjûkania aathaîre atîrakinya, aarî bau bonthe nî baagwatîrwe nî toro, na baramama.

⁶Thathita cia ûtukû ciakinya baraigua kajû gakiugaga: ‘Mûjûkania akwîja! Njûûni bûmûthagaane.’

⁷Rîu aarî bonthe barookîîra, na baragwatia taawa ciaao.

⁸Barîa biaa bareera barîa boome atîrî, ‘Tûkûndieni tûgûta, nîûntû taawa cieetû ga ikwoora.’

⁹Îndî bau boome barabacokeria: ‘Jatîtûng’ana na jabûng'ana! Nî kaaba bwîte ndûkeene bûkagûre jeenu.

¹⁰Rîrîa aarî bau biaa beetîre kûgûra maguta, mûjûkania arakinya. Aarî barîa baithuranîrîte barakûrûkania nawe nyomba ya mûranû na mwari jûraingwa.

¹¹ Nyumeene, aarî bau bangî bareeja na baraambîrîria gwîtana: ‘Itû mwathi weetû, tûrûgûrîre!’

¹²Îndî we arabacokeria, ‘Ndîbwîra na mma atî, ni ntîbwijî.’

¹³Tontû bûû, bûkaaueni nî toro bûmama nîkwîthîrwa bûtiijî ntukû kana thaa.”

¹⁴ “Ûnene bwa Mûrungu bwoomba kûng'uananua na muntû ûrîa waagaîre nthûûmba ciaawe mbeecha na areeta rûgendo rûrûraaja.

¹⁵Nî aanenkeere o muntû kûringana na ûrîa oombaga kûrita ngûgî. Ûmwe aranenkerwa mbeecha cia thaabu ngiri ithaano, na ûngî aranenkerwa mbeecha cia thaabu ngiri ijîîrî na ûngî aranenkerwa mbeecha cia thaabu ngiri îmwe. Akûthiria kûbagaîra, araambîrîria rûgendo rwaawe.

¹⁶Ûrîa waanenkeerwe mbeecha cia thaabu ngiri ithaano, areeta araringa nacio biashara mwanka iroongereka ngiri ingî ithaano.

¹⁷Kinya ûrîa waanenkeerwe mbeecha cia thaabu ngiri ijîîrî nî aaringîre nacio biashara mwanka iroongereka ngiri ingî ijîîrî.

¹⁸Îndî ûrîa waanenkeerwe mbeecha cia thaabu ngiri îmwe, nî eetîre areenja îrinya na arariinda mbeecha cia mwathi waawe ku.

¹⁹Nyuma ya îgiita rîrîraaja, mwathi ûu aracoka, na arabeeta nîkenda bamwîra ûrîa baritithîtie mbeecha ciaawe ngûgî.

²⁰Nthûûmba îrîa yaanenkeerwe mbeecha cia thaabu ngiri ithaano nî yeetîre îrî na ngiri ingî ithaano, na îramwîra: ‘Mwathi waakwa, waanenkeere ngiri ithaano, na nî ndîrathûnkûmîre ngiri ingî ithaano, ka cio.’

²¹Mwathi waayo aramîîra atîrî, ‘Nî bwega mono, ûrî muntû ûmwega na mwîtîkua. Tontû nî ûraeere mwîtîkua, na ûramenyeera mbeecha inkai, ngakûnenkera mbeecha inyingî ûmenyeere. Njû ûgwîrue amwe naani.’

²²Nthûûmba îrîa yaanenkeerwe mbeecha cia thaabu ngiri ijîîrî nî yeetîre îrî na ngiri ingî ijîîrî, na îramwîra: ‘Mwathi waakwa, waanenkeere ngiri ijîîrî, na nî ndîrathûnkûmîre ngiri ingî ijîîrî, ka cio.’

²³Mwathi waayo aramîîra atîrî, ‘Nî bwega mono, ûrî muntû ûmwega na mwîtîkua. Tontû nî ûraeere mwîtîkua, na ûramenyeera mbeecha inkai, ngakûnenkera mbeecha inyingî ûmenyeere. Njû ûgwîrue amwe naani.’

²⁴Nthûûmba îrîa yaanenkeri ngiri îmwe îreeta na îrauga, ‘Mwathi waakwa, nî mbijî ûgwe ûrî muntû ûmûûmû na ûkeethaga arîa ûtîaandîte, na ûkoothûrania arîa ûtîminyîîte.

²⁵Tontû bûû, nî ndaakîrîre na ndîrariinda mbeecha ciaaku îriinyeene. Tontû bûû, ka mbeecha irîa waanenkeere.’

²⁶Mwathi waayo aramîîra, ‘Gwe nthûûmba îmbîî na mûthao! Nî waijî atî nkeethaga arîa ntîaandîte, na nkoothûrania arîa ntîminyîte.

²⁷Nîkî îndî ûteekîre mbeecha ciaakwa mbanki nîkenda rîrîa ngaacoka mbîthîra irî na maciara?’

²⁸Mûtuunyeeni mbeecha iu, na bûnenkere ûrîa ûrî na ngiri îkûmi.

²⁹ Nîkwîthîrwa ûrîa ûrî na cio akoongeerwa ciingîe. Îndî ûrîa ûtî na cio, kinya irîa nkai arî na cio agaatunywa.

³⁰ Gereeni nthûûmba îîjî ya ûtheri oome muunduune! Kûu nîku akarîraga na gûkabakaba maîgo.

³¹ “Rîrîa Mûtaana wa Muntû akeeja arî na mwago amwe na araîka bonthe barî nawe, agakarîra gîtî kîaawe kîa ûnene.

³²Mîgongo yonthe ya nthîgûrû îkoothûrana mbere yaawe, nawe akaathûrana antû ta ûrîa mûrîîthi aathûranaga ng'ondu na mbûri.

³³Ageeka ng'ondu rûteere rwaawe rwa ûrîo, na eeke mbûri rûteere rwaawe rwa ûmotho.

³⁴Rîu mûnene akeera barîa barî rûteere rwaawe rwa ûrîo, ‘Njûûni buî bûtharimi nî Baaba na bûjûkie Ûnene bûrîa bûtwîre bûthûranîri nîûntû bweenu kuuma rîrîa nthîgûrû yoombîrwe.

³⁵Nîkwîthîrwa nî ndaarî na mpara naabuî bûrandûmia biakûrîa; nî ndaarî na nyoonta naabuî bûrankundia rûûjî; nî ndaarî mûgeni naabuî bûrangwata ûgeni;

³⁶Nî ndaarî kîthûnû naabuî bûrambîkîra nguû; nî ndaajîtue naabuî bûreeja kûndaitha; nî ndaarî ncheera naabuî bûreeja kûndaitha.’

³⁷Rîu antû barîa baagîru bakamûcokeria, ‘Mwathani, nîrî twakwonere ûrî na mpara na tûrakûrûmia biakûrîa kana ûrî na nyoonta na tûragûkundia rûûjî?

³⁸Nîrî twakwonere ûrî mûgeni na tûrakûgwata ûgeni kana ûtî na nguû na tûragwîkîra nguû?

³⁹Nîrî twakwonere waajîtue kana ûrî ncheera na tûreeja gûkûraitha?’

⁴⁰Nawe mûnene akabacokeria abeere, ‘Nî nkûbwîra na mma atî o ûntû bûrîa bwathithîîrie ûmwe wa ataana baba batî îgweta, nî ni bwathithîîrie.’

⁴¹“Rîu eere barîa barî rûteere rwaawe rwa ûmotho, ‘Umeeni kîrî ni buî barîa bûrumi! Îteeni mwankiine jwa kenya na kenya jûrîa jwakîîrue Nkoma na araîka baawe.

⁴²Nîkwîthîrwa nî ndaarî na mpara naabuî bûtaandûmîrie biakûrîa; nî ndaarî na nyoonta naabuî bûtaankundîrie rûûjî;

⁴³Nî ndaarî mûgeni naabuî bûtaangwatîre ûgeni; nî ndaajîtue na nî ndaabuungi ncheera, naabuî bûteejîre kûndaitha.’

⁴⁴Rîu nabo bagacokia, ‘Mûnene, nîrî twakwonere ûrî na mpara kana ûrî na nyoonta kana ûrî mûgeni kana ûtî na nguû kana waajîtue kana ûbuungi ncheera, na tûrarega kwîja gûgûteethia?’

⁴⁵Nawe akabacokeria, ‘Ndîbwîra na mma atî, mantû jonthe jarîa bwaregere kûthithîria ûmwe wa baba batî îgweta, nî ni bwaregere kûthithîria.’

⁴⁶ Tontû bûû, barîa baaregere gûteethia barîa batî îgweta, bagakanûkua kenya na kenya. Îndî barîa baagîru bakaewa ûtûûro bwa kenya na kenya.”