Read KIMERU BIBLE PROTESTANT EDITION Mat 26 Bible Online

Mat 26 - KIMERU BIBLE PROTESTANT EDITION bible

Mat 26

¹Rîrîa Jesû aathirîrie kûritana mantû jau jonthe, nî eerîre aritwa baawe atîrî,

² “Nî bûkûmenya atî nyuma ya ntukû ijîîrî tûkeethîrwa tûrî na thîgûûnkû ya Pasaka, na Mûtaana wa Muntû akagwatwa nîkenda aambwa mûtharabeene.”

³Îgiiteene rîu athînjîri-Mûrungu barîa anene amwe na akûrû barîa atongeeria nî baatirimanîre kwa Kaifa, ûrîa waarî mûthînjîri-Mûrungu ûrîa mûnene,

⁴na barabanga ûrîa bakaagwatithia Jesû na witho na bamûûrage.

⁵Îndî baratua atî batîmûgwata îgiita rîa thigûûnkû, antû batîkeeje kûringa gîtuma.

⁶Rîrîa Jesû aarî Bethania, nyomba ya Simioni ûrîa waarî akûajua nî mûtigiri,

⁷ rîrîa Jesû aarîjaga biakûrîa arî metheene, mûka ûmwe nî eetîre kîrî we akamatîte chuuba yaathithîtue na iiga rîa goro rîetagwa alabasta. Nî aamwîtûûrîrie maguta jarîa jaarî chuubeene îîu mûtwe. Najo jaarî ja goro na nî jaeraga bwega mono.

⁸Rîrîa aritwa booneere ûu, nî baigîrue bûbûûî barauga, “Nî akwînyangia maguta jaja?

⁹Maguta jaja jarîngîkwendua jakauma mbeecha inyingî igateethia nkîa.”

¹⁰Jesû akûmenya ûrîa baugaga, areera aritwa bau ûjû, “Nîkî bûgûtûma mûka ûûjû aigua bûbûthûûku? We akunthithîria bûbwega mono.

¹¹ Bûrî na nkîa îgiita rîonthe îndî bûtîîthîrwa bûrî naani îgiita rîonthe.

¹²Mûka ûjû ambîtûûrîria maguta nîkenda athûranîra mwîrî jwaakwa nîûntû bwa kûthikwa.

¹³Ndîbwîra na mma atî, kûrîa Nteto iji Njega îgatûmagîîrua nthîgûrûûne yonthe, ûrîa mûka ûûjû athithia bûkeeranagwa nîkenda aririkanagwa.”

¹⁴Rîu Judasi Iskarioti, ûmwe wa aritwa barîa îkûmi na baîrî, areeta kîrî athînjîri-Mûrungu barîa anene

¹⁵ arabooria, “Ndabûteethia bûgwata Jesû rî, nîmbi bûgaampa?” Nabo baramûnenkera ciringi mîrongo îthatû cia fetha.

¹⁶Kuuma îgiita rîu Judasi arakara agîcwaga kaanya ga kûmûgwatithia.

¹⁷Ntukû ya mbere ya Thigûûnkû ya Mîgaate îtîkîri mûtheega jwa kwimbithia, aritwa nî beetîre kîrî Jesû na baramûûria, “Nîkû ûkwenda twîta gûkûthuranîîra nîkenda ûrîîra thigûûnkû ya Pasaka ku?”

¹⁸Jesû arabacokeria, “Kûrûkeeni ntûûreene, na bwîte kwa muntû ng'ania na bûmwîre ‘Mûritani ariuga îgiita rîaakwa rîrî akuî gûkinya nani amwe na aritwa baakwa tûkarîîra thigûûnkû ya Pasaka gwaaku.’”

¹⁹Aritwa nî baathithirie o ta ûrîa beeri nî Jesû, na barathuranîra kîatho kîa Pasaka.

²⁰Gwakinya ûgoro, Jesû arakara nthî amwe na aritwa baawe îkûmi na baîrî.

²¹Rîrîa baarîîjaga, Jesû arauga, “Ndîbwîra na mma atî, ûmwe weenu agaankunyanîra.”

²²Aritwa nî baigîrue bûbûûî mono na o ûmwe waao arambîrîria kunga, “Mwathani, nkîaragia na mma tî ni.”

²³ Jesû aracokia, “Ûrîa waarûma mûgaate mpakûriine rîrîa nkûrûmaga, nîwe ûgankunyanîra.

²⁴Mûtaana wa Muntû akooragwa o ta ûrîa kwaandîki, îndî wûûi kîrî muntû ûrîa ûgatûma Mûtaana wa Muntû agwaatwa! Nî kaaba muntû ûu atîngîciarwa.”

²⁵Judasi ûrîa waarî akamûkunyanîra aramûûria, “Mûritani ka ûkûthûgaania nî ni?” Jesû aramûcokeria, “Ûu wauga nîu.”

²⁶Rîrîa baarîjaga, Jesû nî aajûkîrie mûgaate, aracokeria Mûrungu nkaatho, na arajûng'enyûranga, na aranenkera aritwa baawe akiugaga, “Jûkieni bûrîe; jûjû nî mwîrî jwaakwa.”

²⁷Ningî arajûkia gîkombe, na aracokeria Mûrungu nkaatho, na arabanenkera akiugaga, “Kuundeeni bwinthe;

²⁸ îîjî nî tharike yaakwa ya kûrikithia kîrîkanîro kîrîa Mûrungu eekîre na antû. Tharike îîjî îgeetûûrwa nîkenda antû bonthe barekerwa meeyia.

²⁹Ndîbwîra, ntînyua ndibei kaîrî mwanka rîrîa nkaanyua ndibei injerû amwe naabuî Ûneneene bwa Baaba.”

³⁰Rîu, bakuina rwîmbo rwa gûkumia Mûrungu, barauma au na bareeta karîmeene ka Mîzeituni.

³¹ Barî kûu Jesû arabeera atîrî, “Ûtukû bûbû, buî bwinthe bûkambîrûkîra, nîûntû Maandîko jaugîîte, ‘Ngacûnia mûrîîthi, nacio ng'ondu ciaragane.’

³² Îndî ndariûkua, ngeeta Galili mbere yeenu.”

³³Peterû areera Jesû, “Kinya bonthe bagûtiga, ni ntîkorogûtiga kinya rî.”

³⁴Jesû aramwîra, “Ndîkwîra na mma atîrî, ûtukû bûbû mbere ya nchamba ya ngûkû îgamba ûgankaana maita jathatû.”

³⁵Peterû areera Jesû, “Kinya nkooragwa ûkîûragwa, ntîgûkaana.” Aritwa bangî bonthe kinya bo barauga o ûu.

³⁶Jesû nî eetanîrie na aritwa baawe antû eetagwa Gethisemane, na arabeera, “Karageeni aja, mbîte arîa gataaria nkarombe.”

³⁷Areetania na Peterû na ataana ba Zebedii bobaîrî. Arambîrîria kwigua kîeba na kûthangîka nkoro mono.

³⁸Rîu arabeera, “Nkoro yaakwa îrî na kîeba gîkiingî, ndiigua teeka ngakua. Kareeni aja na bûkamama nîûntû kinya ni ntîmama.”

³⁹Rîu areetaita mbere aniini aramama nthî na kîuu na araromba ûjû, “Baaba, këethîra kwombîka, mpebeeria gîkombe gîkî kîa mîthangîko. Îndî tî ûrîa ni nkwenda, ka weendi bwaaku bûthithîke.”

⁴⁰Aracoka kîrî aritwa barîa bathatû, na areethîra bamami toro na areeta Peterû arauga, “Keeke! Ka bûtîûmba gûkara kinya antû a îthaa rîmwe bûtîmami?

⁴¹Bûkéeja kûmama, bûrombe nîkenda bûtîkeeje kûgwa magerioone. Nkoro nî îkwenda îndî mwîrî jûtîkûûmba.”

⁴²Nî eetîre gataaria rîa jaîrî na araromba ûjû, “Baaba, këethîra gîkombe gîkî gîtîebaeberua, no mwanka nkînyue, ka weendi bwaaku bûthithîke.”

⁴³Aracoka kîrî aritwa o barîa bathatû areethîra bamami ta mîgogo.

⁴⁴O kaîrî arabatiga, na areeta kûromba rîa jathatû agîtumagîra mîgambo o îrîa arombaga nayo.

⁴⁵Rîu aracoka kîrî aritwa na arabeera, “Kinya nandî no bûmami bûnogokeete? Ciûkieni meetho bwoone! Îgiita rîongwa rîgûkinya rîrîa Mûtaana wa Muntû akagwatwa nî eeyia.

⁴⁶Ûkîîreeni twîte! Ûrîa ûgûnkunyanîra tîwe ûrîa wîîjîte.”

⁴⁷O Jesû akîaragia na aritwa, ûmwe wa aritwa bau îkûmi na baîrî, weetagwa Judasi, nî aakinyîre arî na antû babaingî barî na nchiû na nchûgûma. Antû bau baatûmi nî athînjîri-Mûrungu barîa anene na akûrû barîa atongeeria.

⁴⁸Judasi ûrîa waakûnyanîîre Jesû nî aarî akûîra antû bau atî, “Ûrîa ngacûnca nîwe bûgûcwaa, mûgwateeni.”

⁴⁹Rîu Judasi areeta kîrî Jesû na aramwîra, “Muuga Mûritani,” na aramûcûnca.

⁵⁰Jesû aramwîra, “Mûcoore, thithia na mpwîî ûrîa ûkwîjîte kûthithia.” Rîu antû bau baragwata Jesû.

⁵¹Ûmwe wa antû barîa baarî amwe na Jesû araconora rûchiû na aragiita gûtû kwa nkombo ya mûthînjîri-Mûrungu ûrîa mûnene.

⁵²Rîu Jesû aramwîra, “Cokia rûchiû rwaaku kîûene, nîkwîthîrwa bonthe barîa booraganaga na rûchiû bakooragwa na rûchiû.

⁵³Ka bûtîkûmenya atî ndomba kûromba Baaba na agantûmîra o ntûti nkûrûki ya njûûrî îkûmi na ijîîrî cia araîka?

⁵⁴Îndî nkëeja kûthithia ûu rî, ûrîa Maandîko jaugîîte joojûra?”

⁵⁵ Îgiita o rîu rîongwa areera ntundu îîu, “Ka bwîjîte kûngwata bûkamatîte nchûgûma na nchiû teeka ndî mûtuunyani? Anga ntîraritanaga kîûrûûne ntukû cionthe na bûtîrangwataga?

⁵⁶Îndî mantû jaja jonthe jaathithîka nîkenda Maandîko ja iroria joojûra.” Rîu aritwa baawe bonthe baramatûka na baramwîrûkîra.

⁵⁷Barîa baagwete Jesû baramwikia kwa Kaifa, mûthînjîri-Mûrungu ûrîa mûnene, kûrîa aritani ba Waatho na akûrû barîa atongeeria boothûranîte.

⁵⁸Peterû aramûthingata arî gataaria mwanka arakinya oome ya nyomba ya mûthînjîri-Mûrungu ûrîa mûnene. Nyumeene arakûrûka ndeene na arakara nthî amwe na asikarî, nîkenda oona ûrîa gûgaakara.

⁵⁹Mûthînjîri-Mûrungu ûrîa mûnene na Kîama kîonthe baracwaa ûkûûjî bwa ûrongo bûrîa bakaandîra Jesû nîkenda bamûûraga.

⁶⁰Kinya këethîra akûûjî babaingî nî baaritîre ûkûûjî, batoona ûkûûjî bûng'ani bwa gûtûma ooragwa. Îndî mûthieene akûûjî baîrî barairita na barauga,

⁶¹ “Muntû ûjû nî aaugîre, ‘Ndomba kûtharia kîûrû gîkî na ngagîaka na ntukû ithatû.’”

⁶²Mûthînjîri-Mûrungu ûrîa mûnene ararûngama na arooria Jesû, “Ka gûtî u ûgûcokia bwegiî mantû jaja ûkûthitangwa najo?”

⁶³Îndî Jesû arakira ki. Mûthînjîri-Mûrungu ûrîa mûnene aramwîra, “Nîngûkûûria riîtweene rîa Mûrungu ûrîa ûtûûraga mwoyo, ûtwîre këethîra nîgwe Kristû, Mûtaana wa Mûrungu!”

⁶⁴ Jesû aramwîra, “Nîgwe ûkuuga! Îndî ndîbwîra kuuma nandî, bûkoona Mûtaana wa Muntû akari nthî rûteere rwa ûrîo rwa Mweneinya Mûrungu na eejîte arî îgûrû rîa matu.”

⁶⁵ Rîu mûthînjîri-Mûrungu ûrîa mûnene aratambûranga nguû ciaawe na arauga, “Akûruma Mûrungu! Nî baî akûûjî bangî tûgûcwaa? Bûkwigua bwingwa akîruma Mûrungu!

⁶⁶Bûrî mûtwîra atîa?” Nabo baramûcokeria, “Nî abuîri kûûragwa.”

⁶⁷ Rîu baramûtwîra mata ûthiû na baramûûra na bamwe baramûringa mpîî,

⁶⁸bakiugaga, “Mesia, tûrorerie ûtwîre nûû wakûringa!”

⁶⁹Peterû aakari nthî au oome. Rîu mwarî ûmwe ûrîa waarî nthûûmba ya mûthînjîri-Mûrungu ûrîa mûnene nî eetîre kîrî Peterû na aramwîra, “Kinya gwe nî ûraarî amwe na Jesû wa kuuma Galili.”

⁷⁰Îndî Peterû arakaana mbere ya antû bonthe akiugaga, “Ntiijî ûrîa ûkuuga.”

⁷¹Peterû aumagarîte mpingîroone, mwarî ûngî waarî nthûûmba, aramwona na areera antû barîa baarî au atîrî, “Muntû ûjû nî araarî amwe na Jesû wa kuuma Nazarethi.”

⁷²Peterû arauga kaîrî, “Nî ngûciîtia na mma atî ni ntiijî muntû ûu.”

⁷³Nyuma ya kagiita gagakai antû bangî barîa baarûngi akuî na Peterû baramwîra, “Mûrûme! No mwanka ûgwe wîîthîrwe ûrî ûmwe waao! Tontû kinya mwarîrie jwaaku nî jûgûkûmenyithania.”

⁷⁴Rîu Peterû araambîrîria gûciîtia akiugaga, “Nî ngwatwe nî kîrumi, këethîra ûûni nî mbijî muntû ûu!” Akûthiria kuuga ûu, nchamba ya ngûkû îragamba.

⁷⁵Rîu Peterû araririkana nteto irîa Jesû aamwîrîte atî: “Mbere ya nchamba ya ngûkû îgamba ûgankaana maita jathatû.” Nawe araumagara na ararîra mono.