Read KIMERU BIBLE PROTESTANT EDITION Mat 27 Bible Online

Mat 27 - KIMERU BIBLE PROTESTANT EDITION bible

Mat 27

¹Rûûneene rûkîîrî kainda athînjîri-Mûrungu barîa anene bonthe amwe na akûrû barîa atongeeria bareetîkanîîria kûûraga Jesû.

²Baramûtheeka na baramwikia kîrî Pilatû, ûrîa waatûmi kuuma Roma aa mûrûngamîîri wa nthîgûrû îîu.

³ Rîrîa Judasi ûrîa wamûkûnyanîîre oonere Jesû agûtuîrwa kûûragwa, nî airirîre na aracokeria athînjîri-Mûrungu barîa anene na akûrû barîa atongeeria mbeecha irîa mîrongo îthatû cia fetha.

⁴“Nî mbîîtie gûkunyanîra muntû ûtî na maatia ooragwa.” Îndî baramwîra atîrî, “Bûu tî ûntû kîrî tuî! Jau nî mantû jaaku.”

⁵Judasi aragera mbeecha iu kîûrûûne, na areeta araicuuria.

⁶Athînjîri-Mûrungu barîa anene barajûkia mbeecha iu na barauga, “Waatho bûtîtîkîîrîtie tûringanîra mbeecha iji na mbeecha cia kîûrû nîûntû nî itûmîte muntû ooragwa.”

⁷Tontû bûû, bararîîkania na bareeta kûgûra kîthaka kîa mûûmbi wa nyongû nacio nîkenda bathikaga ageni ku.

⁸Kîu nîkîo gîtûmi kinya naarua tûrî, kîthaka kîu gîtagwa Kîthaka kîa Tharike.

⁹ Rîu nteto irîa kîroria Jeremia augîîte iroojûra: “Nî baajûkîrîe mbeecha irîa mîrongo îthatû cia fetha. Mbeecha iu nîcio antû ba Israeli beetîkîîrîtie kûrîaa nîûntû bwaawe.

¹⁰Baragûra nacio kîthaka kîa mûûmbi wa nyongû o ta ûrîa Mwathani aambîrîte.”

¹¹Jesû ararûngama mbere ya mûrûngamîîri ûrîa waathaga nthîgûrû îîu. Mûrûngamîîri ûu aramûûria atîrî, “Ûgwe nîgwe mûnene wa Ayahudi?” Jesû aramwîra, “Ûkuuga u.”

¹²Îndî rîrîa athînjîri-Mûrungu barîa anene na akûrû barîa atongeeria baamûthitangîre, Jesû arakira ki.

¹³Tontû bûû, Pilatû aramûûria, “Ningî nî ûkwigua mantû jarîa bagûkûthitangîra?”

¹⁴Îndî Jesû arakira ki na ararega kûmûcokeria noo atîa. Bûu bûrarigaria mûrûngamîîri ûu mono.

¹⁵Nî kwaarî wîîthîre mûrûngamîîri wa nthîgûrû îîu kûthaûra mûbungwa ûmwe ûrîa kîrîndî kîaugaga athaûrwe îgiita rîa thîgûûnkû ya Pasaka.

¹⁶Îgiiteene rîu nî kwaarî muntû ûmûthûûku mono ncheera weetagwa Baraba.

¹⁷Tontû bûû, rîrîa antû boothûranîre amwe, Pilatû nî aaboorîrie atîrî, “Nûû bûkûenda mbûthaûrîra: Nî Baraba kana nî Jesû ûrîa wîtagwa Kristû?”

¹⁸Aboorîrie ûu nîûntû nî aamenyaga bwega atî nî rûriitho rwatûmîte banenkanîra Jesû ooragwa.

¹⁹Rîrîa Pilatû aarî akuî kûgiita îgamba, mwekûrû waawe nî aatûmanîre kîrî we arauga atîrî, “Ûgátonyeera mantûûne jegiî muntû ûu ûtî na maatia, nîûntû ûtukû nî ndîrathangîkîre mono kîrootoone nîûntû bwaawe.”

²⁰Athînjîri-Mûrungu barîa anene na akûrû barîa atongeeria bareerenca antû bauge nî bathaûrîrwe Baraba na bauge Jesû ooragwe.

²¹Mûrûngamîîri ûu, tawe Pilatû arabooria kaîrî, “Nî ûrîkû kîrî baba bobaîrî bûkwenda mbûthaûrîra?” Baramûcokeria, “Nî Baraba!”

²²Pilatû arabooria, “Nî atîa nthithia na Jesû ûrîa wîtagwa Kristû?” Bonthe barauganîria, “Mwambithie!”

²³Pilatû arabooria, “Nîkî bûkwenda aambwa? Nî ûthûûku bûrîkû athithîtie?” Îndî bararinga gîtuma nkûrûki bakiugaga, “Mwambithie!”

²⁴ Rîrîa Pilatû oonere atî mantû nîka jagwîta na mbere jakîthûûkaga, na gîtuma ka gîkwongeereka, nî aajûkîrie rûûjî na arathamba njara mbere yaao akiugaga, “Ûûni tî ni ndaatûma muntû ûûjû ooragwa, akua nî îgûrû rîeenu!”

²⁵Antû bonthe baramûcokeria, “Îî, nî akuee u atî nî tuî na nchiarwa cieetû twamûûraga!”

²⁶Rîu Pilatû arareekeria Baraba kuuma ncheera, na aranenkanîra Jesû beeta kûmwamba.

²⁷Rîu asikarî ba Pilatû barakûrûkia Jesû gîkaroone kîa mûtongeeria, na njûûrî ya asikarî îroothûûrana akuî nawe.

²⁸Baramûrita nguû na baramwîkîra rwambambio rûrûtuune.

²⁹Ningî baratuma thirû ya miigua na baramwîkîra mûtwe, baramûgwatithia rûturo njareene yaawe ya ûrîo. Rîu baraturia maru mbere yaawe na baramûkurunga bakiugaga, “Ûrotûûra matukû jamaingî Mûnene wa Ayahudi!”

³⁰Baramûtuîra mata na barajûkia rûturo baramûringa kîongo naru.

³¹Rîrîa baathirîrie kûmûkurunga nî baamûritîre rwambambio rûrîa baamwîkîrîte, na baramwîkîra nguû ciaawe. Rîu bareeta kûmwamba.

³²Rîrîa beetîte, nî baatirimanîre na muntû ûmwe weetagwa Simioni, wa kuuma Kurene na baramûkinyîîria gûkamata mûtharaba jwa Jesû.

³³Bagûkinya antû arîa eetagwa Goligotha, kûrîa gweetagwa kaîrî “Gûntû kwa mûrûitû jwa kîongo,”

³⁴ baramûkundia ndibei yaungenue na nyongo. Îndî Jesû akûmîcema ararega kûmînyua.

³⁵ Bakûmwamba bararinga kuura nîkenda boona ûrîa ûgeeta na nguû ciaawe.

³⁶Rîu barakara nthî au, baramûkaria.

³⁷Îgûrû rîa mûtwe jwaawe nî baandîkîte jarîa baamûthitangîrîte, najo jaarî, “Ûjû nî Jesû Mûnene wa Ayahudi.”

³⁸Nî kwaarî atuunyani baîrî barîa baambi akuî na Jesû, ûmwe aarî rûteere rwa ûmotho na ûngî aarî rûteere rwa ûrîo.

³⁹ Antû barîa baakûrûkagîîra antû au nî bainainagia biongo biaao na kûmûruma bakiugaga,

⁴⁰ “Gwe ûrîa ûreendaga kûtharia kîûrû na ûgîaka na ntukû ithatû, cionokie nandî! Këethîra ûrî Mûtaana wa Mûrungu, kinya nthî uume mûtharabeene!”

⁴¹Ningî kinya athînjîri-Mûrungu barîa anene na aritani ba Waatho amwe na akûrû barîa atongeeria, nî baamûkurungîre bakiugaga,

⁴²“Nî aroonokagia bangî îndî we wengwa atîkûûmba gûcionokia! Ûjû nîwe Mûnene wa Israeli! Nî aakinye nthî aume mûtharabeene naatuî tûkamwîtîkia!

⁴³ Nî areetîkagia Mûrungu na akauga atî we nîwe Mûtaana wa Mûrungu, rîu këethîra Mûrungu ûu nî akwenda nî amwonokie nandî.”

⁴⁴Atuunyani barîa baambi akuî nawe kinya bo nî baamûrumangaga.

⁴⁵Nthîgûrû yonthe nî yaagîîre muundu kuuma thaa thita cia mûthenya mwanka thaa kenda.

⁴⁶ Gwakinya akuî thaa kenda Jesû nî aakaîre na kajû gakanene akîugaga: “Eloi, Eloi, lama Sabakithani?” Ûû nî kuuga, “Mûrungu waakwa, Mûrungu waakwa, nîkî wambîrûkîra?”

⁴⁷Antû barîa barûngi au baigua ûu barauga, “Nî agwîta Elija.”

⁴⁸ Ûmwe waao aroogîa arajûkia kînyaguthi, na aragîtombeka kîrî ndibei yaarî na nchechû na arakîogera mûthia jwa karûturo na aramûkundithia.

⁴⁹Bangî barauga, “Tigana nawe, ga twoone këethîra Elija akeeja kûmwonokia.”

⁵⁰Rîrîa Jesû aakaîre kaîrî na kajû gakanene, arakua.

⁵¹ O rîu gîtambaa kîrîa gîacuurîîtue kîûrûûne ndeene kîratambûka kuuma îgûrû mwanka nthî, biraa biîrî. Nthîgûrû îrainaina na maiga jaratûkanga,

⁵²na tûbûri tûrakunûka na mîîrî ya antû babaingî barîa baakuîre barî babaagîru îrariûkua.

⁵³Jesû akûriûka, antû bau baariûkîrue barauma tûbûriine, na bareeta ntûûreene întheru, na antû babaingî baraboona.

⁵⁴Rîrîa mûtongeeria wa asikarî amwe na asikarî barîa baakarîtie Jesû, baigîrue nthîgûrû îkinaina na boona ûrîa gwakarîkîre, nî baigîrue ûguaa mono na barauga, “Gûtî nkaanja atî muntû ûûjû araarî Mûtaana wa Mûrungu.”

⁵⁵ Ningî nî kwaarî na eekûrû babaingî baategerete barî kûraaja. Bau nîbo baarî bakûmûthingata kuuma Galili nîkenda bamûtumîkîra.

⁵⁶Bamwe ba eekûrû bau baarî Maria Magidalina, na Maria ng'ina wa Jakubu na Josefu amwe na ng'ina wa ataana ba Zebedii.

⁵⁷Gwakinya ûgoro gîtonga kîmwe gîetagwa Josefu, kuuma ntûûreene ya Arimathea, nî gîaakinyîre. Kinya kîo kîaarî mûritwa wa Jesû.

⁵⁸Josefu ûu nî eetîre kîrî Pilatû na araromba eetîkîîrue ajûkie mwîrî jwa Jesû. Rîu Pilatû ararita waatho atî eetîkîîrue ajûkie mwîrî jûu.

⁵⁹Josefu arajûjûkia na arajûkûûnja na chuka înjerû ya bamba,

⁶⁰na arajwîka kabûriine kaawe karîa eenjîte iigeene na gatarî gagûtumîrwa. Rîu araingiritia iiga rîrînene arakûnîka kabûri narîo na araciîtîra.

⁶¹Maria Magidalina na Maria ûrîa ûngî nî baakari nthî bategeete kaburi.

⁶²Athînjîri-Mûrungu barîa anene na Afarisayo nî beetîre gûcemania na Pilatû, rûûnene, kûrî ntukû ya sabatû. Beeta baramwîra,

⁶³ “Mwathi weetû, nî tûkûririkana mwaaîrania ûrîa nî aaugîre aarî mwoyo atî, ‘Nyuma ya ntukû ithatû akariûka.’

⁶⁴Tontû bûû, rita waatho atî kaburi gakarue bwega mwanka ntukû ya ithatû nîkenda aritwa baawe batîkeeje kwiya mwîrî jwaawe na beera antû atî nî arariûkîre kuuma kîrî akuû. Ûrongo bûu bûkeethîrwa bûrî bûbûthûûku nkûrûki ya bûrîa bwa mbere.”

⁶⁵Pilatû arabeera, “Nkûbûa asikarî ba gûkaria; karieni kaburi bwega ûrîa bûkoomba.”

⁶⁶Tontû bûû, bareeta na bareekîra rwaano iigeene rîrîa rîaingîte kaburi. Rwaano rûu rwarî rwa gûteetheeria kûmenya këethîra iiga rîu rîkûritaritwa o. Ningî baratiga asikarî bakaria kaburi kau.