Read KIMERU BIBLE PROTESTANT EDITION Mat 28 Bible Online

Mat 28 - KIMERU BIBLE PROTESTANT EDITION bible

Mat 28

¹Ntukû ya sabatû îkûthira, kûrî akuî gûkea ntukû ya mbere ya kiumia, Maria Magidalina na Maria ûrîa ûngî nî beetîre kaburiine.

²O ntûti nthîgûrû îrainaina mono nîkwîthîrwa mûraîka wa Mwathani nî aarî akwinama kuuma îgûrû na aingiritia iiga rîrîa rîaingîte kaburi na ararîkarîra.

³Aatharaga ta rweni, na nguû ciaawe ciaarî injerû ta îra.

⁴Barîa baakarîtie kaburi nî bainainîre mono nî ûguaa, mwanka barakara teeka baakuîte.

⁵Îndî mûraîka ûu areera eekûrû bau atîrî, “Bûgákîra! Nîkwîthîrwa nî mbijî nî Jesû ûrîa ûraambîrwe bûgûcwaa.

⁶Atî aja, nîûntû nî ariûkîre o ta ûrîa aaugîîte. Njûûni bwoone antû arîa areeki.

⁷Tontû bûû, îteeni na mpwîî bûkeere aritwa baawe atî nî ariûkîte kuuma gîkuûûne, na nandî nî etîte Galili arî mbere yeenu. Kûu nîku bûkamwona. Bûkórîrua nî nteto iu ndabwîra.”

⁸Rîu eekûrû bau barauma kaburiine na mpwîî barî na ûguaa îndî bagwîrîtue mono, na baroogîa kwîra aritwa baawe.

⁹Jesû arabaumîîra o rîmwe na arabeera, “Gîeeni na thîîrî!” Eekûrû bau bareeta na baraturia maru mbere yaawe baramûgwata magûrû na baramûthaathayia.

¹⁰Rîu Jesû arabeera, “Bûgakîreeni! Îteeni bûkeere aritwa baakwa beete Galili na kûu nîku bakambona.”

¹¹Rîrîa eekûrû bau baaciîtîrîte, asikarî bamwe barîa baakarîtie nî beetîre ntûûreene kwîra athînjîri-Mûrungu barîa anene mantû jarîa jaarî jagûkarîka.

¹²Athînjîri-Mûrungu barîa anene baraireba amwe na akûrû barîa atongeeria bareetîkanîîria ûrîa bakathithia. Barakukuma asikarî barîa na mbeecha inyingî na barabeera,

¹³“Îreeni antû ûjû: ‘Aritwa baawe nî bareejîre ûtukû, na baiya mwîrî jwaawe tûmami.’

¹⁴Mûrûngamîîri wa nthîgûrû îîjî akëeja kwigua mantû jau, tuî tûkaaria nawe na bûtîtonya nthîîneene.”

¹⁵Tontû bûû asikarî bau barajûkia mbeecha na barathithia o ta ûrîa beerîtûe. Mantû jau no jaaragua nî Ayahudi mwanka naarua tûrî.

¹⁶ Aritwa barîa îkûmi na ûmwe nî beetîre kîrîmeene kîrîa Jesû aabathîîrîte kûu Galili.

¹⁷Rîrîa baamwonere baramûthaathayia kinya këethîra bamwe baao nî baarî na nkaanja.

¹⁸Jesû areeta akuî nabo na arabeera, “Nî mpeei waathani bunthe îgûrû na nthî.

¹⁹ Rîu, îteeni bweethie antû ba mîgongo yonthe aritwa baakwa, bûkîbabatithagia riîtweene rîa Baaba, na rîa Mûtaana na rîa Roho Ûmûtheru,

²⁰na bûbaritanage kwathîkagîra mantû jonthe jarîa mbwaathîte. Naani nkeethîrwa ndî amwe naabuî ntukû cionthe mwanka mûthiro jwa nthîgûrû.”