Read KIMERU BIBLE PROTESTANT EDITION Mat 3 Bible Online

Mat 3 - KIMERU BIBLE PROTESTANT EDITION bible

Mat 3

¹Îgiita nî rîakinyîre rîrîa Johana Mûbatithania aambîrîrie gûtûmîîria arî rwanda rwa Judea akiugaga:

² “Irireeni, nîkwîthîrwa ûnene bwa îgûrû bûrî akuî.”

³ Johana nîwe ûrîa kîroria Isaya aarîrie mantû jamwegiî akiugaga: “Kajû ka muntû nî gakwigîîgua rwanda gakiugaga, ‘Thuranîreni njîra ya Mwathani, erekanieni tûjîra twaawe.’”

⁴ Johana eekagîra nguû yaatumi na guee ya nkamîîra na aikundîkaga mûcibi jwa mûgûûta kauna kaawe. Biakûrîa biaawe biaarî ngigî na nainchû kuuma ithakeene.

⁵Antû ba kuuma Jerusalemu na nthîgûrû yonthe ya Judea na ba kuuma nthîgûrû cionthe irîa ciaarî rûteere rwa mûuro jwa Jorodani, nî beetaga kîrî we,

⁶nabo bakaumbûra meeyia jaao na akababatithia kûu mûuroone jwa Jorodani.

⁷ Îndî rîrîa oonere Afarisayo na Asadûkayo babaingî beejîte kûbatithua, arabeera atîrî, “Îbuî rûciara rwa njoka! Nûû ûbwîrîte bûmatûke îkanûkia rîa Mûrungu rîrîa rîîjîte?

⁸Mîîtîre yeenu na mathithio jeenu nî joonanie na mma atî nî bwirirîte.

⁹ Bûgaciîreni atî, ‘Tuî tûrî nchiarwa cia Abrahamu.’ Nîkwîthîrwa ndîbwîra na mma atî Mûrungu oomba gûtûma maiga jaja jakauma nchiarwa cia Abrahamu.

¹⁰ Choka nî yûkîrîîtue îrîîka mîtî kuuma mîriine. O mûtî jûrîa jûtîciaraga matuunda jameega, jûkarîkwa na jûgerwe mwankiine.

¹¹Ni ndîbûbatithia na rûûjî kwonania atî nî bwirirîte. Îndî ûrîa wîjîte nyuma yaakwa arî na inya nkûrûki yaakwa. Ûûni ntîagîrîte gûkamata iraatû biaawe. Ûu nîwe ûkabûbatithia na Roho Ûmûtheru na mwanki.

¹²We arî na gîtaarû gîa kûûnga nkano aciathûrane na maûngo îtîriine nîkenda ageeka nkano nchukuune yaawe na maûngo ajaakîîrie na mwanki jûtîûmba kwoorua.”

¹³Rîu Jesû nî aumîre Galili areeta mûuro jwa Jorodani kûbatithua nî Johana.

¹⁴Îndî Johana nî aagererie ûrîa oomba kûrega kûmûbatithia akiugaga, “Gwe nîgwe ûbuîrîte kûmbatithia na rîu nîka wîjîte kîrî ni?”

¹⁵Îndî Jesû aramûcokeria, “Reka gûkare ûu nandî, nîûntû ûû nîu tûkoojûria waagîru bunthe.” Rîu Johana areetîkîîria kûmûbatithia.

¹⁶O rîu Jesû abaatithua araumîra rûûjîîne na o rîo îgûrû rîrarugûka na aroona Roho wa Mûrungu eenamîte ta kîjea aramûkinya.

¹⁷ Kajû karauma îgûrû karauga, “Ûjû nîwe Mûtaana waakwa ûrîa mpendeete, nî ngwîragua nîwe.”