Read KIMERU BIBLE PROTESTANT EDITION Mat 4 Bible Online

Mat 4 - KIMERU BIBLE PROTESTANT EDITION bible

Mat 4

¹ Rîu Roho aratongeeria Jesû mwanka rwanda nîkenda agerua nî Nkoma.

²Araciata biakûrîa ntukû mîrongo îna, mûthenya na ûtukû. Rîrîa ntukû iu ciathirîre araigua mpara.

³Rîu Nkoma areeta kîrî we aramwîra, “Ûkëethîrwa nîgwe Mûtaana wa Mûrungu, atha maiga jaja jaee mîgaate.”

⁴ Îndî Jesû aracokia, “Nî kwandîkîtwe Maandîkoone; ‘Muntû atîtûûragua nî mûgaate junka îndî atûragua nî rûteto rûrîa ruumaga kîrî Mûrungu.’”

⁵Rîu Nkoma aramûjûkia bareeta mwanka kathûmbî ga kîûrû kîrîa kîaarî ntûûreene îrîa ntheru ya Jerusalemu,

⁶ aramwîra, “Ûkëthîrwa nîgwe Mûtaana wa Mûrungu, ciarûkie nthî, nîûntû nî kwaandîkîtwe maandîkoone atî: ‘Mûrungu agatûma araîka baawe, bakûambîîrie na njara ciaao, ûtîkeeje kûringwa magûrû jaaku nî maiga.’”

⁷Nawe Jesû aramwîra, “Ningî nî kwaandîki: ‘Ûkágeria Mwathani Mûrungu waaku.’”

⁸Rîu Nkoma aramûjûkia baraitia kîrîmeene gîkîraaja na aramwonia moonene jonthe ja nthîgûrû na mîago yaayo

⁹aramwîra, “Ngakûnenkera bibi bionthe këethîra ûgaturia maru ûnthathayie.”

¹⁰ Rîu Jesû aramwîra, “Îta buru Nkoma! Nîkwîthîrwa nî kwaandîki: ‘Ûkathaathagia Mwathani Mûrungu waaku na ûmûtumîkagîre wenka.’”

¹¹Rîu Nkoma aratiga Jesû, na araîka bareeta baramûmenyeera.

¹² Rîrîa Jesû aigîrue atî Johana nî aingîri ncheera, nî eetîre nthîgûrû ya Galili.

¹³ Nî aumîre Nazarethi na areeta Kaperinaumu, ntûûra îrîa yaarî rûteere rwa îria rîa Galili rîrîa rîaarî mwankeene jwa nthîgûrû ya Zebuloni na Nafutali na arakara ku.

¹⁴Tontû bûû, rûteto rûrîa rwaarîtue nî kîroria Isaya rûroojûûra:

¹⁵ “Îîgwe nthîgûrû ya Zebuloni na nthîgûrû ya Nafutali, buî bûrî bwa rûgûrû rwa mûuro jwa Jorodani, jûrîa jwînamîte nthîgûrû ya Galili, mûgongo jwa antû barîa batî Ayahudi.

¹⁶Antû barîa batûûraga muunduune, bakwona weerû bûbûnene, na barîa batûûraga nthîgûrû îîu na batûûraga muunduune jwa gîkûû, weerû nî bûbatharîrîte.”

¹⁷ Kuuma îgiita rîu Jesû arambîrîîria gûtûmîîria akiugaga, “Irireeni, tontû ûnene bwa îgûrû bûrî akuî.”

¹⁸Rîrîa Jesû eetîrîte rûteere rwa îria rîa Galili nî oonere antû baîrî ba ng'ina ûmwe bakîgwatagia makûyû bagîtumagîra ngara. Nabo baarî Simioni ûrîa weetagwa Peterû na Anderea.

¹⁹Rîu arabeera, “Nthîngateni naani nkabweethia agwatia ba antû”

²⁰O rîo baratiga ngara ciaao, baramûthingata.

²¹Agwîtaîta mbere aroona ataana bangî baîrî ba ng'ina ûmwe. Nabo baarî Jakubu na Johana, ataana ba Zebedii. Nabo baarî gîtarûûne amwe na îthe Zebedii bagîtumaga ngara ciaao cia kûgwatia makûyû, nawe Jesû arabeeta.

²²Nabo baratiga gîtarû amwe na îthe o rîo, baramûthingata.

²³ Jesû nî eetîre gûntû kunthe nthîgûrûûne ya Galili akîritanaga iromberoone biaao na agîtûmagîîria Nteto Injega cia ûnene bwa îgûrû. Ningî areeta akîoragia mîrimo ya mîthemba yonthe na woonje bunthe bûrîa antû baarî nabu.

²⁴Nkuuma yaawe îroojûra nthîgûrû yonthe ya Sîria. Tontû bûû, baramwikîria antû bonthe barîa baarî na mîrimo ya mîthemba yonthe: barîa bathangîkagua nî thîîna cia mîthemba mwanya mwanya na barîa baarî na nthû na antû barîa baarî na kîbaba na bionje. Nawe arabooria bonthe.

²⁵Antû babaingî barîa baumîte Galili na Dekapoli na Jerusalemu na Judea na rwongo rûrîa rûngî rwa mûuro jwa Jorodani baramûthingata.