Read KIMERU BIBLE PROTESTANT EDITION Mat 6 Bible Online

Mat 6 - KIMERU BIBLE PROTESTANT EDITION bible

Mat 6

¹ “Imenyagîîreni bûtîkathithie mantû jamaagîru nîkenda bwonwa nî antû. Nîkwîthîrwa bûkëeja kûthithia ûu, bûtîewa îtuui nî Abaagu weenu ûrîa ûrî îgûrû.

²Tontû bûû, rîrîa ûkwaa nkîa gîntû, ûgeieta kûmenyithia antû ta ûrîa aciayia bathithagia barî kîromberoone na njîreene nîkenda bakumwaa nî antû. Ndîbwîra na mma atî nî bathirîtie kuewa îtuui rîaao.

³Îndî rîrîa ûgûteethia muntû ûrîa ûrî na ûbatu, ûkáreka kinya mûcoore waaku amenya ûrîa ûkûthithia.

⁴Tontû bûû, ritaga ûteethio bwaaku na witho, nawe Abaagu waaku ûrîa woonaga mantû jarîa jarî withoone agakwaa îtuui.”

⁵ “Rîrîa bûkûromba, bûkathithagieni ta aciayia. Bo beendaga kûromba barûngami barî kîromberoone, na barî macemanîrioone ja njîra, nîkenda bwonwa nî antû. Ndîbwîra na mma atî, bau nî bathirîtie kûewa îtuui rîaao.

⁶Îndî rîrîa ûkwenda kûromba, tonya nyomba yaaku, na ûiinge mwari, rîu ûrombe Abaagu ûrîa ûrî withoone. Nawe Abaagu ûrîa woonaga jarîa jarî withoone agakwaa îtuui.

⁷Rîrîa bûkûromba bûgátumagîreni mîgambo îmingî îtîna gîtûmî ta ûrîa antû barîa batiijî Mûrungu bathithaagia. Nîkwîthîrwa bathûgaanagia bakaigîîgua nîûntû bwa gûtumîra mîgambo îmingî.

⁸Bûkathithagieni tabo nîkwîthîrwa Abaagu nî aijî kîrîa bûkwenda, kinya mbere ya bûmûromba.

⁹Tontû bûû, rombageni ûjû: ‘Baaba weetû ûrîa ûrî îgûrû: Riîtwa rîaakû rîathûrwe,

¹⁰ûnene bwaaku bûroeja, wendi bwaaku bûrothithagua nthîgûrû, o ta ûrîa bûthithagua îgûrû.

¹¹Twee naarua biakûrîa bia gûtûng'ana.

¹²Tûrekere meeyia jeetû, o ta ûrîa tûrekagîra barîa batwîagia.

¹³Ûgatwikia magerioone, îndî twonokie kuuma kîrî ûrîa Mûûî.’

¹⁴ “Tontû bûkëethîra nî bûrekagîra antû maatia jaao, Abaagu ûrîa ûrî îgûrû akabûrekera.

¹⁵Îndî bûkëethîra bûtîrekagîra antû bangî maatia jaao, kinya Abaagu atîbûrekera maatia jeenu.”

¹⁶“Rîrîa bûciatîte biakûrîa bûgatukieni moothiû jeenu ta aciayia. Nîkwîthîrwa batukagia moothiû jaao nîkenda antû boona atî nî baciatîte biakûrîa. Ndîbwîra na mma atî nî bathirîtie kûewa îtuui rîaao.

¹⁷Îndî rîrîa gwe ûciatîte biakûrîa, thaambia ûthiû bwaaku na waake mûtwe jwaaku maguta,

¹⁸nîkenda antû batîkameenye atî nî ûciatîte biakûrîa îndî ûmenyekane atî nî ûciatîte nî Abaagu ûrîa ûrî withoone wenka. Nawe Abaagu ûu wonaga jarîa jarî withoone agakwaa îtuui.”

¹⁹ “Bûgaciîkîreeni ûtonga aja nthîgûrû, kûrîa nungu cia irîo na kutu biînyangagia, na aamba bakaunaga nyomba na bakaiya.

²⁰Îndî îîkageeni ûtonga bweenu îgûrû, kûrîa nuungu cia irîo kana kutu bitîîûmba kwînyangia kana aamba bauna nyomba na baiya.

²¹Nîkwîthîrwa arîa ûtonga bwaaku bûrî, nîo nkoro yaaku îthagîrwa îrî.”

²²“Riitho nîrîo taawa ya mwîrî. Riitho rîaaku rîkëethîrwa rîkîonaga bwega, mwîrî jwaaku junthe jwîthagîrwa jûûjûrîte weerû.

²³Îndî riitho rîaaku rîkëethîrwa rîtîbui, mwîrî jwaaku junthe jwîthagîrwa jûûjûri muundu. Tontû bûû, gûkëethîrwa weerû bûrîa bûrî ndeene yaaku nî muundu rî, jwîthîrwa jûrî muundu jûmûtumanu atîa!”

²⁴“Gûtî muntû ûûmba gûtumîkîra athani baîrî. Tontû akeenda ûmwe na athûûre ûngî; kana agwatanîre na ûmwe na amene ûngî. Ûtîûmba gûtumîkîra Mûrungu na ûtumîkîra mbeecha.”

²⁵“Tontû bûû, ndîbwîra bûgakîreni bûgîciûragia nîmbi bûkaarîa kana bûnyua nîkenda bûtûûra mwoyo. Ningî bûkainogieni bûgîciûragia nîmbi bûgeekîra. Anga ûtûûro tîbu bûrî gîtûmi nkûrûki ya biakûrîa, na mwîrî nkûrûki ya nguû?

²⁶Raithîrieni nyoni, itîandaga kana iketha kana ciîka irîo nchukuune. Îndî amwe na bûu Abaagu ûrîa ûrî îgûrû nî acireraga. Anga buî bûtî ba bata nkûrûki ya nyoni?

²⁷Nî ûrîkû kîrî buî ûûmbîkia gûciongeera ntukû kinya îmwe ûtûûroone bwaawe nîûntû bwa kwimakîra?

²⁸Ningî nîmbi îtûmaga bûnoga nkoro bûkîûragia nîmbi bûgeekîra? Raithîrieni ûrîa maûa jaumaga kîthakeene! Jatîritaga ngûgî, kana jatuma nguû.

²⁹ Îndî gankûbwîra kinya Solomoni, amwe na mwago jûrîa aarî naju nîûntû bwa nguû irîa eekagîra atathongoma ta rîmwe rîa maûa jaja.

³⁰Rîu këethîra Mûrungu athongomagia matî ja kîthaka ûu, naarua jakariiba na rûûnene jakagerwa mwankiine rî, akabûthongomia nkûrûki atîa? Îbûî antû barî na wîtîkio bûbûkai!

³¹Tontû bûû, bûkathangîkeni bûkîûragia, ‘Nîmbi tûkaarîa, kana tûûnyua, na nîmbi tûgeekîra?’

³²Nîkwîthîrwa antû barîa batiijî Mûrungu nî into o biu bacwaga. Abaagu ûrîa ûrî îgûrû nî akûmenya atî bûrî na ûbatu bwa into biu bionthe.

³³Îndî buî ambeni bûcwee ûnene bwa Mûrungu na waagîru bwaawe, na into biu bingî bionthe bûkaewa.

³⁴Tontû bûû, bûkamakîreni rûûjû. Rûûjû rûkaimakîra ruungwa. O ntukû îrî na mathîîna jaayo ja kûng'ana.”