Read KIMERU BIBLE PROTESTANT EDITION Mat 7 Bible Online

Mat 7 - KIMERU BIBLE PROTESTANT EDITION bible

Mat 7

¹“Bûgátuîra antû bangî îgamba bûtîkeeje kûgambithua nî Mûrungu.

² Nîkwîthîrwa Mûrungu agagûtuîra îgamba o ta ûrîa waatuîrîre bangî. Kîthimi o kîrîa waatumîîre nîkîo agatumîra.

³Nîkî woonaga gatî karîa karî riitho rîa muntû ûngî îndî ûtîonaga mûgogo jûrîa jûrî riitho rîaaku?

⁴Kana nîatîa ûûmba kwîra muntû ûngî, ‘Reka nkûrîte gatî riitho rîaaku,’ o rîrîa gwe ûrî na mûgogo riitho rîaaku?

⁵Mûciayia ûjû! Amba ûrîte mûgogo jûrîa jûrî riitho rîaaku, rîu nîrîo ûkoona bwega ûrîa ûkoomba kûrita gatî karîa karî riitho rîa muntû ûngî.

⁶“Bûkaeeni kurû into birîa itheru, kana bûgerera ngûrwe tuiga twa goro, twîtagwa lulu, itîkeeje gûkinyangîra tu nthî na ikûgarûkîra na ikûrûmanga.”

⁷“Rombeni naabuî bûkaewa; cweeni naabuî bûkoona; ringaringeni naabuî bûkarugûrîrwa.

⁸Nîkwîthîrwa o muntû ûrîa ûrombaga nî aejagwa, na ûrîa ûcwaga nî oonaga, ningî ûrîa ûringaringaga nî arugûragîrwa.

⁹Atîrî, nî ûrîkû weenu ûrombwa mûgaate nî mwana waawe, akamûnenkera iiga?

¹⁰Kana mwana ûu amûromba gîkûyû nawe amûnenkera njoka?

¹¹Rîu kinya këethîra buî bûrî babaaî, nî bwijî kwaa aana beenu biewa bibiega, nîatîa Abaagu weenu ûrîa ûrî îgûrû atîaa barîa bamûrombaga biewa bibiega nkûrûki?

¹² Thithagîrieni antû bangî ûrîa bwenda babûthithîria. Ûu nîu Waatho bwa Musa na mooritani ja iroria jakuuga.”

¹³“Kûrûkîîreeni mpingîroone îrîa ncheeke. Nîkwîthîrwa njîra îrîa îîtaga mwankiine jwa kenya na kenya nî îmbariî na nî bûbûûthû gwîtîîra njîreene îîu; mpingîro yaayo nî îmbariî, na barîa batonyagîîra mpingîroone îîu nî babaingî.

¹⁴Îndî mpingîro na njîra îrîa îîtaga ûtûûroone bwa kenya na kenya nî încheke na kûrî inya gwîtîîra njîreene îîu; nî antû babakai beetagîîra njîreene îîu.”

¹⁵“Imenyagîîreeni iroria bia ûrongo, birîa biîjaga kîrî buî biîkîrîte mîgûûta ya ng'ondu, îndî ndeene nî mbawa ing'eentu.

¹⁶Bûkabimenya kuumania na mathithio jaabio. Ka ûûmba gûketha nzabibû kuuma kîrî mîtongu kana nkûû kuuma kîrî mîgaa?

¹⁷Tontû mûtî jûmwega jûciaraga matuunda jameega na mûtî jûmûûî jûciaraga matuunda jamaaî.

¹⁸Mûtî jûmwega jûtîûmba gûciara matuunda jamaaî kana mûtî jûmûûî jûciara matuunda jameega.

¹⁹ O mûtî jûrîa jûtîciaraga matuunda jameega nî jûtemagwa na jûkagerwa mwankiine.

²⁰ Tontû bûû, bûkamenya iroria bia ûrongo kuumania na mathithio jaabio.”

²¹“Tî muntû wonthe ûrîa ûmbîtaga ‘Mwathani, Mwathani,’ ûgakûrûka ûneneene bwa îgûrû, Îndî ûrîa ûgakûrûka nî ûrîa ûthithagia ûrîa Baaba ûrîa ûrî îgûrû eendaga.

²²Ntukû îîu yakinya babaingî bakambîîra ‘Mwathani, Mwathani! Nî twaroragia tûgîtumagîra riîtwa rîaaku na tûkeenga roho inthûûku na tûkaringa biama tûgîtumagîra riîtwa rîaaku.’

²³ Rîu naani nkabeera: ‘Ni ntîbwijî. Umeni kîrî ni buî antû babaaî!’”

²⁴“Tontû bûû, o muntû ûrîa wigagua nteto iji ciaakwa na akathithia ûrîa ikuuga, akari ta muntû ûmûûme ûrîa waakîre nyomba yaawe iigeene.

²⁵Ngai îraura, na nyomba îîu îrariingwa nî mûguû na ruuo rûrûnene, îndî îtaagwîre nîûntû nî yaaki iigeene.

²⁶“Îndî o muntû ûrîa wigagua nteto iji ciaakwa na akarega kûthithia ûrîa ciugîte, akari ta muntû kîaa ûrîa waakîre nyomba yaawe mûthangeene.

²⁷Ngai îraura, na nyomba îîu îraringwa nî ruuo rûrûnene na îrakoondorua nî mûguû. Kûgwa kwaayo kwaarî gûkûnene.”

²⁸ Rîrîa aathirîrie kuuga nteto iu, kîrîndî nî kîarigarîrue nî ûritani bwaawe,

²⁹nîkwîthîrwa aaritanaga arî na inya, na tî ta ûrîa aritani ba Waatho baaritanaga.