Read KIMERU BIBLE PROTESTANT EDITION Mat 9 Bible Online

Mat 9 - KIMERU BIBLE PROTESTANT EDITION bible

Mat 9

¹Jesû araitia gîtarûûne, arauna îria arakinya ntûûra yaao yongwa.

²Antû bamwe baramûretera kîonje kîmami gîtandeene. Rîrîa Jesû oonere wîtîkio bwaao, areera kîonje kîu atîrî, “Gîa inya mûtaana waakwa. Ûkûrekerwa meeyia jaaku.”

³Rîu aritani bamwe ba Waatho baraambîrîria kwîrana, “Muntû ûjû nî akûruma Mûrungu!”

⁴Jesû akûmenya ûrîa baathûgaanagia arauga atîrî, “Nîkî bûkûthûgaania mantû jamathûûku?

⁵Nî bûrîkû bûûthû: nî kuuga, ‘Ûkerekerwa meeyia jaaku,’ kana nî kuuga, ‘Ûkîîra ûciîtîre?’

⁶Nandî nî nkwenda bûmenya atî, Mûtaana wa Muntû arî inya ya kûrekera antû meeyia aja nthîgûrû.” Tontû bûû, areera muntû ûu waarî kîonje atîrî, “Ûkîîra na ûjûkie gîtanda gîaaku na waane.”

⁷Muntû ûu waarî kîonje arokîîra, na araana kwaao.

⁸Rîrîa antû boonere ûu nî baamakîre. Barakumia Mûrungu ûrîa weete antû inya ya mûthemba jûu.

⁹Jesû arauma au eetaîtîte na njîra, aroona muntû weetagwa Mathayo akari nthî kanyomba karîa ûgoti bwothûranagîrua. Rîu Jesû aramwîra atîrî, “Nthingata.” Nawe Mathayo arookîîra na aramûthingata.

¹⁰ Rîrîa Jesû aarîjaga biakûrîa nyomba ya Mathayo, aritithia ûgoti babaingî amwe na eeyia, nî bakarîre nthî amwe na Jesû na aritwa baawe.

¹¹Rîrîa Afarisayo boonere ûu, barooria aritwa baawe atîrî, “Nîkî Mûritani weenu akûrîa arî amwe na aritithia ûgoti na eeyia?”

¹²Rîrîa Jesû aigîrue ûrîa bakwaria arauga atîrî, “Barîa baajîtue nîbo bacwaga ndagitarî, îndî barîa batîajîtue batîmûcwaga.

¹³ Îteeni bûkairitane gîtûmi kîa nteto iji, ‘Mpendaga barîa baigagîrua bangî kîaao, îndî ni ntî bata na kîgongwana kîa gwakîîria.’ Nteejîre gwîta barîa baagîru, îndî ndeejîre gwîta eeyia.”

¹⁴Rîu aritwa ba Johana Mûbatithania bareeta kîrî Jesû na baramûûria, “Nîkî tuî na Afarisayo tûciataga biakûrîa îndî aritwa baaku batîciataga?”

¹⁵Jesû arabeera, “Ka bûkwîrîgîîra antû barîa beeti mûranûûne baithikîîra rîrîa mûjûkania arî amwe nabo? Îgiita rîgaakinya rîrîa mûjûkania akeebua kuuma kîrî bo. Rîu nîrîo bagaciataga biakûrîa.

¹⁶Gûtî muntû wîkagîra kîraka gîkîerû nguûne înkûrû. Nîkwîthîrwa kîraka kîu gîgatûma nguû îîu îtambûka nkûrûki.

¹⁷Ningî gûtî we wîkagîra ndibei ya ndua ithiriine bithithîtue na mîgûûta îmîkûrû. Îkëeja gwîkîrwa ku, nîka kîthiri kîu gîtambûkaga na ndibei îgeetîka. Îndî ndua îkagîrwa ithiriine bithithîtue na mîgûûta îmîerû nîkenda ithiri biu na ndibei bigakara bwega.”

¹⁸Jesû akîaragia o ûu, mûtongeeria ûmwe nî eetîre kîrî we na araturia maru mbere yaawe arauga, “Mwarî waakwa agûkua o nandî. Îtû njû ûmûrîkîîre njara na akariûka.”

¹⁹Jesû arookîîra na aramûthingata na aritwa baawe kinya bo bareetania nawe.

²⁰Mwekûrû ûmwe ûrîa waathangîkîtue nî mûrimo jwa kuuma tharike kagiita ka mîaka îkûmi na îîrî, arathingata Jesû, na araringithia mîthia ya nguû yaawe.

²¹Nîkwîthîrwa mwekûrû ûû aaciîraga ûjû, “Nkëeja kûringithia nguû ciaawe akî, nkabua.”

²²Jesû aragarûka na akûmwona aramwîra atîrî, “Mwarî waakwa, gîa inya! Wîtîkio bwaaku bûgûtûma ûbua.” Mwekûrû ûu arabua îgiita o rîu rîongwa.

²³Rîrîa Jesû aakinyîre nyomba ya mûtongeeria ûu nî oonere barîa baaringaga mîtûrirû na barîa baithikîrîte

²⁴arauga atîrî, “Antû bonthe nî baumagare! Mwarî ûûjû atîkuîte îndî nîka amami.” Antû bonthe baramûthekera.

²⁵Rîrîa antû bonthe baumagarîre, Jesû aratonya nyomba ndeene na aragwata mwarî ûu njara, nawe ararûngama.

²⁶Ûntû bûu bûrataamba nthîgûrûûne îîu yonthe.

²⁷Jesû akuuma antû au nî athingatîrwe nî atumuumu baîrî bagîkayaga na kajû bakiugaga, “Mûtaana wa Daudi, twigîîrue kîaao!”

²⁸Rîrîa Jesû akûrûkîre nyomba, atumuumu bau bareeta kîrî we na arabooria ûjû, “Nî bûgwîtîkia ndoomba kûbworia?” Nabo baramûcokeria, “Îî Mwathani.”

²⁹Rîu Jesû araringithia meetho jaao, arauga, “Nî gûkare o ûu bwîtîkîtie!”

³⁰Meetho jaao jarambîrîria kwona. Nawe Jesû arabakaania na inya mono akîbeeraga, “Bûkéera muntû kinya ûrîkû mantû jaja.”

³¹Îndî bagûîta, barataambia nteto ciegiî Jesû nthîgûrû îîu baarî yonthe.

³²Rîrîa antû baanîîte, muntû waarî maamu nî aareterwe kîrî Jesû. Muntû ûu ataaragia nîûntû nî aarî na roho înthûûku.

³³Rîrîa roho îîu nthûûku yeengîîrwe, muntû ûu araambîîrîa kwaria. Antû bararigara bakiugaga, “Ûntû ta bûbû bûtoonekana kaîrî nthîgûrûûne ya Israeli!”

³⁴ Îndî Afarisayo barauga, “Engaga roho inthûûku agîtumagîra inya ya mûnene wa roho inthûûku.”

³⁵ Jesû arathiûrûkania na ntûûra na tûtûûra tunthe, akîritanaga kîromberoone, na agîtûmagîîria Nteto Injega ciegiî ûnene bwa Mûrungu. Ningî nî eetîre akîoragia antû mîrimo ya mîthemba yonthe na woonje bwa mîthemba yonthe.

³⁶ Rîrîa oonere antû babaingî, nî abaigîîrue kîaao mono, nîûntû bwa ûrîa baainyîîrîîtue na batoombaga guiteethia, ta ng'ondu itî na mûrîîthi.

³⁷ Rîu areera aritwa baawe, “Maketha nî jamaingî, îndî akeethi nî babakai.

³⁸Tontû bûû, rombeeni nîkenda mweene maketha atûma ariti ngûgî bamûkeethere maketha.”