Read KIMERU BIBLE PROTESTANT EDITION Mar 10 Bible Online

Mar 10 - KIMERU BIBLE PROTESTANT EDITION bible

Mar 10

¹Jesû akuuma au nî eetîre Judea. Akuuna mûuro jwa Jorodani antû babaingî baroothûrana kîrî we kaîrî na araambîrîria kûbaritana o ta ûrîa bwaarî wîthîre bwaawe kûthithia.

²Afarisayo bareeta kîrî we na bakîenda kûmûgeria baramûûria, “Waatho nî bûgwîtîkîîria muntû eenga mwekûrû waawe?”

³Jesû arabacokeria, “Nîatîa Waatho bwa Musa buugîîte?”

⁴ Nabo barauga, “Musa nî eetîkîrîîrie muntû aandîkîra mwekûrû waawe barûga ya kûmwînga rîu amwînge.”

⁵Jesû arabacokeria, “Musa aandîkîre Waatho bûu nîûntû bwa kûûma gwa nkoro cieenu.

⁶ Îndî kuuma nthî îkûûmbwa, ‘Mûrungu oombîre ntomûrûme na mûka.

⁷ Tontû bûû, ntomûrûme agatiga îthe na ng’ina agwatanithue na mwekûrû waawe,

⁸na bobaîrî bakaa mwîrî jûmwe. Tontû bûû, batîcoka kwaa baîrî kaîrî, îndî bakaa muntû ûmwe.

⁹Kîrîa Mûrungu agwatithanîtie muntû akoroathûrana.”

¹⁰Bagûkûrûka nyomba aritwa baawe baramûûria mantû jau kaîrî.

¹¹ Nawe arabeera, “Muntû ûrîa ûkeenga mwekûrû waawe na agûre ûngî, nîka akûthûngîîra.

¹²Mûka akeerûkîra mûkûrû waawe na ageeta kûgûrwa kûngî nîka akûthûngîîra.”

¹³Antû nî baikîrie twaana kîrî Jesû nîkenda aturîkîîra njara atûtharima îndî aritwa baawe barabagiria.

¹⁴Jesû akwona ûu, arathûûra mono na areera aritwa baawe, “Rekeeni twaana twîje kîrî ni. Bûkábarigîîria nîkwîthîrwa Ûnene bwa Mûrungu nî bwa twaana ta tûtû.

¹⁵ Ndîbwîra na mma atî, o muntû wonthe ûrîa ûtîtîkîîria Ûneneene bwa Mûrungu ta kaana kanyi, atîkorokûrûka ku.”

¹⁶Rîu Jesû aragwata twaana tûu na aratûrîkîîra njara aratûtharima.

¹⁷Rîrîa Jesû aambagîîria rûgendo rwaawe kaîrî, muntû ûmwe nî aamatûkîre kîrî we na araturia maru mbere yaawe aramûûria, “Mûritani ûmwega, nkathithia atîa nîkenda mboona ûtûûro bwa kenya na kenya?”

¹⁸Jesû aramûûria, “Nîkî ûkûmbîta ûmwega?

¹⁹ Gûtî we ûmwega tiga Mûrungu wenka. Nî ûkûmenya maathana: ‘Ûkóragana; ûkáthûngîîra; ûkáiya; ûgátwirîîra muntû ûngî ûkûûjî bwa ûrongo; ûkária ûrongo; tîîaga abaagu na nyakwe.’”

²⁰Nawe aramûcokeria, “Mûritani, nî ntwîre kwathîkîra maathana jau jonthe kuuma wîîthî bwaakwa.”

²¹Jesû aramûraithîîria na aramwenda na aramwîra, “Kûrî ûntû bûmwe bunka waagîte. Îta wendie into birîa ûrî nabio, na ûnenkere nkîa mbeecha iu, na ûkagîa mûthithû kûu îgûrû, rîu wîîje ûnthingate.”

²²Rîrîa aigîrue ûu, nî eetîre akiigagua bûbûûî na aithikîrîte nîûntû nî aarî na into bibingî.

²³Jesû araraithîîria aritwa baawe na arabeera, “Kûrî inya mono itonga gûkûrûka Ûneneene bwa Mûrungu.”

²⁴Aritwa nî barigarîre mono nî nteto iu ciaawe îndî Jesû arabeera, “Aana baakwa, kûrî inya mono itonga gûkûrûka Ûneneene bwa Mûrungu!

²⁵Nî bûbûûthû nkamîîra gûtonyeera gakuthoone ka cindano nkûrûki ya gîtonga gîkûrûka Ûneneene bwa Mûrungu.”

²⁶Aritwa baawe bararigara kinya nkûrûki na baroorania, “Nûû îndî ûûmba kwonoka?”

²⁷Jesû arabaraithîîria arabeera, “Ûntû ta bûu bûtîûmbîka kîrî antû, îndî nî bûûmbîkaga kîrî Mûrungu. Nîkwîthîrwa mantû jonthe nî joombîkaga kîrî Mûrungu.”

²⁸Peterû aramwîra, “Tuî nî tûtigîte into bionthe na twakûthingata!”

²⁹Jesû arauga, “Ndîbwîra na mma atî muntû kinya ûrîkû ûrîa ûtigîte nyomba kana ataana ba ng'ina kana aarî ba ng'ina kana ng'ina kana îthe kana twaana kana miuunda nîûntû bwaakwa na bwa gûtûmîîria Nteto Injega cia Mûrungu,

³⁰akarîwa maita îgana, arî aja nthî, ja birîa bionthe atigîte: ta nyomba na ataana ba ng'ina na aarî ba ng'ina na twaana na miuunda. Ningî akathangîka îndî îgiita rîrîa rîkeeja akoona ûtûûro bwa kenya na kenya.

³¹ Îndî babaingî barî mbere bakaa ba mûthia, na barî mûthia bakaa ba mbere.”

³²Jesû nî aatongeeretie aritwa baawe baitîtie Jerusalemu. Aritwa nî baarigari na barîa baabathingatîte nî baarî na ûguaa. Jesû areeta barîa îkûmi na baîrî rûteere na araambîrîria kûbeera mantû jarîa akaathithîrua.

³³Arabeera, “Nandî twitîtie Jerusalemu, na Mûtaana wa Muntû agakunyanîrwa na anenkanîrwe kîrî athînjîri-Mûrungu barîa anene na aritani ba Waatho, barîa bagaatua atî ooragwe, rîu bamûnenkanîre kîrî antû barîa batî Ayahudi.

³⁴Nabo bakamûcikûûra na bamûtuîre mata, na bamûûre ibooko rîu bamûûrage. Îndî nyuma ya ntukû ithatû akariûka.”

³⁵Jakubu na Johana, ataana ba Zebedii, nî beetîre kîrî Jesû baramwîra, “Mûritani, nî tûkwenda ûtûthithîrie ûrîa tûgakûromba.”

³⁶Jesû arabooria, “Nîatîa bûkwenda mbûthithîria?”

³⁷Baramwîra, “Îtîkîra ûmwe weetû akare rûteere rwaakû rwa ûrîo na ûngî rûteere rwaaku rwa ûmotho mwagoone jwaaku rîrîa ûgakarîra gîtî kîa Ûnene.”

³⁸ Îndî Jesû arabeera, “Bûtîkûmenya kîrîa bûkûromba. Bûkoomba kûnyua gîkombe kîa mîthangîko kîrîa nkaanyua kana kûbatithua na kîbatithio kîrîa nkabatithua?”

³⁹Baramwîra, “Tûkoomba.” Jesû arabeera, “Gîkombe kîrîa nkaanyua kinya buî bûkaanyua, na kîbatithio kîrîa nkabatithua kinya buî bûkabatithua nakîo.

⁴⁰Îndî, tî ngûgî yaakwa kûthuura ûrîa ûgakara rûteere rwaakwa rwa ûrîo kana rwa ûmotho. Twanya tûu tûkaeewa barîa baathuranîrîtwe tu.”

⁴¹Rîrîa aritwa barîa bangî îkûmi baigîrue ûntû bûu, barathûûra mono nî Jakubu na Johana.

⁴² Tontû bûû, Jesû arabeeta bonthe na bagwîta kîrî we arabeera, “Buî nî bwijî atî barîa babuîri kwîthîrwa baarî anene ba antû barîa batî Ayahudi nîka babainyîragia nîûntû barî na inya ya kûbaatha.

⁴³ Îndî buî bûgákara ûu. Ûrîa ûkwenda kwaa mûnene wa bangî, nî abatumîkîre.

⁴⁴Ûrîa ûkwenda kwaa wa mbere gatîgatî keenu nî ae nkombo ya bangî bonthe.

⁴⁵Nîkwîthîrwa Mûtaana wa Muntû ateejîre gûtumîkîrwa îndî eejîre nîkenda agatumîkîra antû na arita ûtûûro bwaawe nîkenda akûûra antû babaingî.”

⁴⁶Rîu Jesû na aritwa baawe barakinya Jeriko. Rîrîa baumagarîte, ntûûreene îîu bathingati nî antû babaingî, mûtumuumu ûmwe weetagwa Batimayo, mûtaana wa Timayo, nî aakari nthî rûteere rwa njîra akîrombaga ûteethio.

⁴⁷Akwigua nî Jesû ûrîa wa kuuma Nazarethi waakûrûkîrîîte au, araambîria gwîtana akiugaga, “Jesû! Mûtaana wa Daudi! Mbigîîrua kîaao!”

⁴⁸Antû babaingî baramûgondokera bakîmwîraga akire, îndî we arakaya nkûrûki akiugaga, “Mûtaana wa Daudi, mbigîîrua kîaao.”

⁴⁹Jesû ararûngama arauga, “Mwîteeni.” Bareeta mûtumuumu ûu, baramwîra, “Gwîrua! Rûngama, nî agûgwîta.”

⁵⁰Nawe aragera nguû ciaawe, arathûngûtha areeta kîrî Jesû.

⁵¹Jesû aramûûria, “Nîatîa ûkwenda nkûthithîria?” Mûtumuumu ûu aramwîra, “Mûritani, ni ndîenda kwona.”

⁵²Jesû aramwîra, “Ciîtîre, wîtîkio bwaaku bûgûtûma woona.” O rîo arambîrîria kwona na arathingata Jesû kûrîa eetîte.