Read KIMERU BIBLE PROTESTANT EDITION Mar 11 Bible Online

Mar 11 - KIMERU BIBLE PROTESTANT EDITION bible

Mar 11

¹Jesû na aritwa baawe nî beetîte Jerusalemu. Bagûkinya ntûûreeene cia Bethifage na Bethania, irîa ciaarî akuî na kîrîma kîa Mîzeituni, Jesû nî aatûmîre aritwa baawe baîrî

²arabeera atîrî, “Îteeni ntûûreene îrîa yerekeene naabuî. Bwakûrûka o rîo, bûkoona gatigiri gatakamata muntû katheeki. Kathaûreni na bûndetere ko.

³Muntû akëeja kûbûûria, ‘Nîkî bûkûthaûra gatigiri, mwîreeni atî Mwathani arî na ûbatu bwaako na agagacokia aja kaîrî ntûti.’”

⁴Nabo bareeta baroona gatigiri katheeki akuî na mpingîro ya ntûûra. Rîrîa baakathaûraga,

⁵antû bamwe barîa barûngi au barabooria, “Nîkî bûkûthaûra gatigiri?”

⁶Aritwa barabacokeria o ta ûrîa beeri nî Jesû; nabo barabarekeeria bareeta.

⁷Baraikia gatigiri kau kîrî Jesû, barakaara nguû ciaao mûgongo na Jesû aragakarîra.

⁸Antû babaingî nî baarîre nguû njîreene bangî baraara majau njîreene jarîa baatemete ithakeene.

⁹ Antû barîa baarî mbere yaawe na barîa baarî nyuma yaawe, nî baaugaga na kajû gakanene, “Mûrungu arokumagua! Nî atharimi ûrîa wîjîte riîtweene rîa Mwathani!

¹⁰Ûnene bwa baaba weetû Daudi, ûrîa wîjîte, nî bûtharimwe! Mûrungu arokumagua îgûrû mono.”

¹¹ Jesû agûkûrûka Jerusalemu areeta kîûrûûne na araraithîîria ûrîa mantû jeetaga na mbere. Îndî nîûntû nî kwaarî gûgûtuka, nî eetîre Bethania amwe na barîa îkûmi na baîrî kûrara ku.

¹²Rûûneene, baumîte Bethania, Jesû nî aigîrue mpara.

¹³Aroona mûkûû jwaarî na mabûûra jamaingî jûrî gataaria. Areeta akuî kwona këethîra jûrî na matuunda. Agûkinya araaga îtunda kinya rîmwe tiga mabûûra jonka, nîûntû gûtaarî îgiita rîa gûciara.

¹⁴Jesû areera mûkûû, “Gûtî muntû ûkaroorûma nkûû ciaaku kaîrî.” Aritwa baawe nî baigîrue akiuga ûu.

¹⁵Bagûkinya Jerusalemu, Jesû arakûrûka kîûrûûne na araambîrîria kwînga barîa beendagia na barîa bagûraga into ku. Araturûra meetha cia barîa baakûranagia mbeecha irîa ciatumagîrwa kîûrûûne na irîa itatumagîrwa kîûrûûne, na araturûra itî bia barîa beendagia ijea.

¹⁶Gûtî muntû kinya ûmwe eetîkîîrîrie akamata gîntû kuuma kîûrûûne.

¹⁷Rîu arabaritana akiugaga, “Nîkwaandîki atî, ‘Nyomba yaakwa îgeetagwa nyomba ya kûrombagîrwa nî antû ba mîgongo yonthe!’ Îndî buî bûmîethetie giiciitho kîa atûnyani!”

¹⁸Athînjîri-Mûrungu barîa anene na aritani ba Waatho baigua ûu, baracwaa ûrîa boomba kûmûûragithia îndî nî bamûkîraga nîûntû antû bonthe nî baarigarîtue mono nî ûritani bwaawe.

¹⁹Ûgoro bwakinya, Jesû na aritwa baawe baraumagara ntûûreene ya Jerusalemu.

²⁰Bakûrûkîte na njîra rûûneene rûkîîrî kainda, nî beethîîre mûkûû jûrîa jûûmîte mwanka mîriine.

²¹Peterû ararikana ûrîa gwakarîre na areera Jesû, “Mwathani, tega mûkûû jûrîa ûrarumîre nî jûromîre.”

²²Jesû areera aritwa baawe atîrî, “Îtîkieni Mûrungu.

²³ “Ndîbwîra na mma atîrî, muntû wonthe ûrîa ûkeera kîrîma gîkî, Kûûka na ûgwe îrieene, na eethîrwe atî na nkaanja nkoroone yaawe, îndî eetîkie atî bûrîa akuuga bûkathithîka, akathithîrua ûrîa auga.

²⁴Tontû bûû, ndîbwîra atîrî, into bionthe birîa bûkaromba bûewe, îtîkieni bûkûewa, na bikaa bieenu.

²⁵ Rîrîa bûkûrûngama kûromba, bûkëethîrwa bwîîrîtue nî muntû kinya ûrîkû, mûrekereeni, nîkenda Abaagu weenu ûrîa ûrî Îgûrû abûrekera meeyia jeenu.

²⁶Îndî bûkarega kûrekera bangî, kinya Abaagu weenu ûrîa ûrî Îgûrû atîbûrekera meeyia jeenu.”

²⁷Rîrîa baakinyîîre Jerusalemu kaîrî Jesû nî aariûngariûngîre kîûrûûne. Rîu athînjîri-Mûrungu barîa anene na aritani ba Waatho na akûrû barîa atongeeria bareeta kîrî we,

²⁸baramûûria, “Ûthithagia mantû jaja na Waatho bûrîkû? Nûû ûkweete waatho bwa kûthithia mantû jaja?”

²⁹Jesû arabeera, “Kinya ni nkabûûria kîûria kîmwe. Bwancokeria, nkabwîra kûrîa nditaga waatho bwa kûthithia mantû jaja.

³⁰Ûbatithio bwa Johana bwaumîre îgûrû kana bwaumîre kîrî antû? Ncokerieni!”

³¹Nabo baraambîrîria gûkararania bongwa bakiugaga, “Tûkëeja kuuga, ‘Bwaumîre îgûrû,’ agatûûria, ‘Nîkî tontû bûtamwîtîkîrie?’

³²Îndî twauga, ‘bwaumîre kîrî antû!’” (Nî baakîraga antû, nîûntû antû bonthe nî beetîkîtie atî Johana aarî kîroria kîa mma.)

³³Baracokeria Jesû barauga, “Tûtiijî.” Nawe Jesû arabeera, “Kinya ni ntîbwîra nî Waatho bûrîkû bûtûmaga nthithia mantû jaja.”