Read KIMERU BIBLE PROTESTANT EDITION Mar 12 Bible Online

Mar 12 - KIMERU BIBLE PROTESTANT EDITION bible

Mar 12

¹ Rîu Jesû nî aabeerîre ngerekano îîjî, “Muntû ûmwe nî aandîre mîzabibû muundeene jwaawe. Arajuirigîra na rûthingo rwa maiga, na areenja îrinya rîa gwitîîra nzabibû, na araaka kîrîngo gîkîraaja kû. Arakomborithia antû bangî muunda jûu na areeta nthî îngî.

²Îgiita rîa maketha rîakinya, aratûma nthûûmba yaawe kîrî barîa bakomborete nîkenda bamûnenkera maciara jarîa abuîri kûnenkerwa.

³Antû bau baramîgwata na baramîûûra na baramîînga îrî njara intheri.

⁴Aracoka aratûma nthûûmba îngî. Nabo baramîtûra mûtwe na baramîthithîria mantû ja nthao.

⁵Mwene muunda û aratûma nthûûmba îngî kaîrî, nabo baramîûraga. Ûu nîu babaingî barîa baatûmîrwe baathithîîrue, bamwe baraûûrwa na bangî barooragwa.

⁶Ûrîa waatigeere arîngîgûtûma, aarî mûtaana waawe ûrîa eendeete mono. Mûthieene aramûtûma akiugaga, ‘Bakagwatîra mûtaana waakwa nthoni.’

⁷Îndî antû bau bareerana, ‘Ûjû nîwe mûrîaûkua, njûûni tûmûûrage nîkenda rûgai rwaa rweetû.’”

⁸Rîu baramûgwata na baramûûraga na baramûgera oome ya muunda jûu jwa mîzabibû.

⁹Rîu Jesû arooria, “Nîatîa mwene muunda akathithia? Akeeja, oorage bau bakomborete muunda na akomborithie antû bangî.

¹⁰ A rîî, ka bûtathoma maandîko jaja: ‘Iiga o rîrîa rîaregerwe nî aaki, nîrîo rîaeere iiga rîa koona.

¹¹Mwathani nîwe wathithîrie ûntû bûu, nabu nî bwa kûrigaria kîrî tuî!’”

¹²Atongeeria ba Ayahudi nî baagererie kûmûgwata îndî barakîra kîrîndî. Nîkwîthîrwa nî baijî atî aarîrie ngerekano îîu nîûntû bwaao. Tontû bûû, baramûtiga na baraciîtîra.

¹³Ningî baratûma Afarisayo na antû barîa baagwataga Herode mbaru, nîkenda bagwata Jesû rwarieene rwaawe.

¹⁴Bareeta kîrî we, baramwîra, “Mûritani, nî tûkûmenya atî waragia mma na ûtîkîraga muntû kinya ûrîkû, arî na îgweta kana atî na rîo, îndî ûritanaga ûûma bwegiî Mûrungu. Nandî twîre, Waatho bweetû nî bûgwîtîkîîria kûritîra Kaisarî ûgoti kana arî? Twîte na mbere kûrita kana tûtigane nabu?”

¹⁵Îndî Jesû akûmenya ka beendaga kûmûgwatia rwariiene arabeera, “Nîkî bûkûngeria? Ndetereni ciringi mîone.”

¹⁶Bakûmwikîria, arabooria, “Ûthiû bûbû nî bwaaû na maandîko jaja nî jaaû?” Baramûcokeria, “Nî bwa Kaisarî.”

¹⁷Jesû nawe arabeera, “Nenkagîreni Kaisarî into birîa birî biaawe, na bûnenkagîre Mûrungu birîa birî biaawe.” Nabo bararigarua nîwe mono.

¹⁸ Bamwe ba Asadûkayo, barîa baugaga atî antû baakuû batîriûkaga bareeta kîrî Jesû na baramûûria,

¹⁹ “Mûritani, Musa nî aatwandîkîîre Waatho bûbû: ‘Muntû akëeja gûkua na agatiga mûka atî na kaana, mûtaana wa ng'ina nî agûre mûka ûu, na aciarîre mûtaana wa ng'ina ûrîa ûkuîte aana.’

²⁰Nî kwaarî na ataana mûgwanja ba ng'ina ûmwe. Wa mbere aragûra mwekûrû na arakua atî na mwana.

²¹Ningî wa baîrî aramûgûra îndî arakua atî na twaana. Wa bathatû aragûra mûka ûu îndî arakara o ta bau bangî.

²²Bonthe mûgwanja baragûra mwekûrû ûu na barakua batî na kaana ka mwekûrû ûu. Nyumeene mwekûrû ûu kinya we arakua.

²³Nandî rî, nîkwîthîrwa bonthe mûgwanja nî baamûgûrîte rî, rîrîa akuû bakariûka, mwekûrû ûu akeethîrwa arî mwekûrû waaû?”

²⁴Jesû arabeera, “Buî nî bûatîtie mono, nîûntû bûtiijî maandîko kana bûmenya inya ya Mûrungu.

²⁵Nîkwîthîrwa rîrîa akuû bakariûka, batîgûrana kana bagûrwa. Bagakara ta araîka ba îgûrû.

²⁶ Ûntû bwegiî kûriûka gwa akuû, ka bûtaathoma yukuune rîa Musa arîa kwaandîki nteto cia kîthaka kîrîa kîaîjaga? Mûrungu nî eerîre Musa atîrî, ‘Nî ndî Mûrungu wa Abrahamu, na wa Isaaka, na wa Jakubu.’

²⁷Tontû bûû, tî Mûrungu wa akuû, îndî nî Mûrungu wa barîa barî mwoyo. Buî nî bûatîtie mono mono.”

²⁸ Ûmwe wa aritani ba Waatho areeta akuî na araigua bakîaranîria. Rîrîa oonere atî Jesû akûbacokeria bwega, nawe aramûûria, “Kîrî maathana jonthe, nî rîathana rîrîkû rîrî gîtûmî nkûrûki ya jangî jonthe?”

²⁹ Jesû aramûcokeria, “Rîa mbere nîrîo rîrî: ‘Thikîîra gwe Israeli! Mwathani Mûrungu weetû nîwe Mwathani wenka.

³⁰Endaga Mwathani Mûrungu waaku na nkoro yaaku yonthe na mwoyo jwaaku junthe na mathûgaanio jaaku jonthe na inya yaaku yonthe.’

³¹ Rîa jaîrî nîrîo rîrî: ‘Endaga mûtûûri waaku ta ûrîa ûciendeete gwengwa!’ Gûtî rîathana rînene nkûrûki ya jau.”

³² Mûritani ûu wa Waatho aramwîra, “Nî mma Mûritani! Ûkuuga bwega atî Mûrungu nî ûmwe wenka na gûtî ûngî tiga we.

³³ Kwenda Mûrungu na nkoro yonthe na mathûgaanio jonthe na inya yonthe na kwenda mûtûûri waakû o ta ûrîa ûciendeete nî ûntû bûrî na gîtûmi nkûrûki ya igongwana bia gwakîîria na igongwana bingî bionthe.”

³⁴Jesû akwona muntû ûu amûcokeria bwega aramwîra, “Ûtî kûraaja na Ûnene bwa Mûrungu.” Kuuma au gûtî muntû womîrîîrîe kûmûûria kîûria kaîrî.

³⁵Jesû akîritanaga kîûrûûne nî oorîrie atîrî, “Nîkî aritani ba Waatho baugaga atî Mesia nî mûtaana wa Daudi?

³⁶ Daudi wengwa nî aarîrie arî na inya ya Roho Ûmûtheru arauga: ‘Mwathani nî eerîre Mwathani waakwa, kara nthî rûteere rwaakwa rwa ûrîo, mwanka rîrîa nkaethia anthû baaku, gîkinyithio kîa magûrû jaaku.’

³⁷Daudi wengwa arîîta Mesia Mwathani. Nîatîa Mesia ûu oomba kwîthîrwa arî mûtaana waawe?” Antû bonthe nî baamûthikîrîre bagwîrîtue.

³⁸Ningî Jesû akîritanaga nî eerîre antû atîrî, “Imenyagîîreni aritani ba Waatho. Bo beendaga gwîkîra ndwambambio indaaja bageeta thokoone nîkenda bakeethua ta antû barî na îgweta.

³⁹Beendeete gûkarîra itî birîa inthongi iromberoone na gûkarîra itî birîa biîki nîûntû bwa antû barî îgweta biathoone.

⁴⁰Bo baaîîragia ntigwa na bakabatuunya into biaao bakîrombaga maromba jamaraaja. Bo bagaakanûkua nkûrûki ya antû bangî bonthe.”

⁴¹Jesû nî aakarîre nthî akuî na Îthandûkû rîa gwîkîra biewa araithîrîtie ûrîa antû beekagîra mbeecha îthandûkûûne rîu. Itonga bibingî nî biekîîre mbeecha inyingî.

⁴²Îndî ntigwa îmwe nkîa îreeta, îreekîra ciringî ijîîrî ku.

⁴³Rîu Jesû areeta aritwa baawe arabeera atîrî, “Ga nkûbwîra na mma atî ntigwa îîjî nkîa, îgwîkîra mbeecha inyingî îthandûkûûne rîrî nkûrûki ya bonthe.

⁴⁴Nîkwîthîrwa bangî bonthe barita mbeecha imwe cia irîa barî nacio îndî ntigwa îîjî, kinya këethîra nî nkîa îkûrita cionthe irîa îgûkarî nacio, kîrîa kîonthe îgûkarî nakîo gîa kûmûtûûria.”