Read KIMERU BIBLE PROTESTANT EDITION Mar 13 Bible Online

Mar 13 - KIMERU BIBLE PROTESTANT EDITION bible

Mar 13

¹Rîrîa Jesû aumagarîte kîûrûûne, ûmwe wa aritwa baawe nî aamwîrîre, “Mûritani, tega ûrîa kîûrû na nyomba iji ingî ciaki na maiga jamathongi na ciaki na njîra ya kûrigaria!”

²Jesû aramwîra, “Nî ûkwona ûrîa nyomba iji inenei? Ikamomorangwa kwage iiga rîtigi îgûrû rîa rîngî.”

³Jesû akari nthî kîrîmeene kîa Mîzeituni araithîrîtie kîûrû, Peterû na Jakubu na Johana na Anderea nî baamûûrîrie barî bonka atîrî,

⁴“Twîre nîrî mantû jau jagakarîka na nîmbi îgatûmenyithia mantû jau jarî akuî kûûjûra?”

⁵Jesû araambîrîria kûbeera, “Imenyagîîreni bûtîkeeje kwaîrua nî muntû kinya ûrîkû.

⁶Antû babaingî bakeeja bakîgwetaga riîtwa rîaakwa bakiugaga, ‘Nî ni we!’ Nabo bakaîria antû babaingî.

⁷Rîrîa bûkaigua ndwaa kana bûigue antû bakîarîa na bioe bakiugaga kûrî na ndwaa, bûkámaka. Mantû jau noo mwanka jakarîke, îndî mûthiro jwa nthîgûrû jûtîrakinya.

⁸Nthîgûrû îkarwaa na nthîgûrû îngî na ûnene bûrwee na bûngî. Gûntû gûkwingî gûkeethîrwa kûrî na kwinaina kwa nthîgûrû na mpara înene. Mantû jau nî mwambîrîrio jwa mantû. Jakeethîrwa jakari ta mûrimo jûrîa mûka aigagua mbere ya kûewa mwana.

⁹ “Îndî buî imenyeereni nîkwîthîrwa antû bakabûgwata na babwikie kotini. Ningî bûkaûûrwa bûrî iromberoone. Bûgaikua kîrî athani na anene nîûntû bwaakwa nîkenda bûnkûjîîra kîrî bo.

¹⁰Mbere ya mûthiro jûkinya no mwanka Nteto Injega cia Mûrungu itûmîîrue nthîgûrûûne cionthe.

¹¹Rîrîa bakabûgwata na babwikie kotini, bûkaithangîkieni bûkîthûgaanagia ûrîa bûkauga. Îgiita rîu rîakinya, arieni jarîa jakauma kanyueene keenu nîûntû tî buî bûkeethîrwa bûkîaragia îndî nî Roho Ûmûtheru.

¹²Muntû akooragithia mûtaana wa ng'ina, na îthe ooragithie mwana waawe. Aana bakagarûkîra aciari baao na baboorage.

¹³ Naabuî bûkathûûrwa nî antû bonthe nîûntû bwa riîtwa rîaakwa. Îndî ûrîa ûkoomîîria mwanka mûthia nîwe ûkoonokua.”

¹⁴ “Rîrîa bûkoona gîntû kîrîa Mûrungu athwîre, taju mûrungu jwa mûng'uanano, jweekwa arîa jûtîbuîrîte kwîthîrwa jûrî, (ûrîa ûkûthoma nî aciûre) rîu antû barîa barî Judea nî bamatûke irîmeene.

¹⁵ Ûrîa ûrî îgûrûgûrû rîa nyomba agákinya nthî kana akûrûka nyomba yaawe kûjûkia gîntû ku.

¹⁶Ûrîa ûrî muundeene agácoka nja kûjûkia nguû ciaawe.

¹⁷Wûûi kîrî aka barîa bakeethîrwa barî na îu na barîa bakeethîrwa bagîonkagia twaana îgiita rîu!

¹⁸Rombeni nîkenda mantû jaja jatîgakarîke îgiita rîa mpio.

¹⁹ Nîkwîthîrwa îgiita rîu gûkeethîrwa kûrî na mîthangîko îmingî na îmîthûûku mono, ûntû îtoonekana kaîrî kuuma rîrîa nthîgûrû yoombîrwe mwanka nandî, na îtîkoronekana kaîrî.

²⁰Îndî Mwathani nî akuîîtie îgiita rîu. Këethîra teeka akuîîtie, gûtî muntû ûûmba gûteetha. Athithîtie ûu nîûntû bwa antû barîa athuurîte.

²¹“Îgiita rîu muntû akëeja kûbwîra, ‘Tegeeni, Mesia arî aja,’ kana akauga ‘Tegeeni, nîwe ûrîa!’ Bûkamwîtîkieni.

²²Nîkwîthîrwa Mesia ba ûrongo na iroria bia ûrongo bikairita na biringe biama na mantû ja kûrigaria nîkenda këethîra kwombîka baatithia barîa Mûrungu athuurîte njîra.

²³Tontû bûû, imenyagîîreni. Nkûbwîra mantû jonthe mbere ya jakinya.

²⁴ “Nyuma ya mîthangîko yaathira, riûa rîkagîa muundu na mweri jûtige kûthaara.

²⁵ Njota ikagûjaga ikiumaga îgûrû, na mainya ja îgûrû jakainainua.

²⁶ Rîu nîrîo antû bakoona Mûtaana wa Muntû eejîte arî matuune arî na inya înene na mwago.

²⁷Rîu atume araîka baawe boothûranie antû barîa athuurîte kuuma nteere cio inya cia nthîgûrû; kuuma mûthia jwa nthîgûrû mwanka mûthia jwa îgûrû.”

²⁸Jesû arabeera atîrî, “Iritaneeni kuumania na mûkûû: rîrîa mpang'i ciaaju ciambagîîria kûtheûka na kuuma mabûûra, nî bûmenyaga atî ngai îrî akuî kuura.

²⁹O ûu naabuî rîrîa bûkoona mantû jaja jonthe jagîkarîka menyeni atî Mûtaana wa Muntû arî akuî mono.

³⁰Ndîbwîra na mma atî, nthukî îîjî îtîthira mbere ya mantû jaja jonthe jakarîka.

³¹Îgûrû na nthî bikathira, îndî nteto ciaakwa itîkorothira.

³² “Îndî gûtî muntû wiijî ntukû kana thaa; araîka ba îgûrû na kinya Mûtaana batiijî; nî Baaba wenka wiijî.

³³Kareeni bwithuranîrîte na bûkámama nîkwîthîrwa bûtiijî rîrîa îgiita rîu rîgaakinya.

³⁴ Gûgakara ta ûrîa muntû eetîte rûgendo atigaga agaîra nthûûmba ciaawe ngûgî na akabeera bamenyeere ngûgî iu. Ningî akeera mûkaria wa mpingîro atî akarie mûciî bwega.

³⁵Tontû bûû, kareni bwigarîrîtie nîûntû bûtîkûmenya rîrîa mwene nyomba akeeja; oomba kwîja ûgoro kana ûtukû gatîgatî kana ngûkû îkîgamba kana rûkîîrî.

³⁶Kareni bûtîmami atîkeeje ntûti abwîthîra bûmami.

³⁷Jarîa nkûbwîra, nî bonthe nkwîra. Kareni bwîgarîrîtie!”