Read KIMERU BIBLE PROTESTANT EDITION Mar 14 Bible Online

Mar 14 - KIMERU BIBLE PROTESTANT EDITION bible

Mar 14

¹ Ciatigeere ntukû ijîîrî thigûûnkû ya Pasaka na mambura ja mîgaate îrîa îtiimbithîtue jakinya. Athînjîri-Mûrungu barîa anene na aritani ba Waatho nî baacwaga ûrîa bagwata Jesû na witho nîkenda bamûûraga.

²Îndî barauga, “Tûkámûgwata îgiita rîa thigûûnkû nîkenda antû batîkeeje kûrega Waatho na baringa gîtuma.”

³ Jesû nî aarî Bethania, nyomba ya Simioni ûrîa waajîtue nî mûtigiri, akîrîjaga biakûrîa. Mûka ûmwe areeta arî na chuuba ya alabasta îrî na maguta jaeeraga bwega ja goro, jeetagwa nado. Aratura chuuba îîu na aratûrîra Jesû maguta kîongo.

⁴Antû bamwe ba barîa baarî au nî baathûrîre na baraciîra, “Nîkî maguta jakwînyangua ûu?

⁵Maguta jaja jarîngîkwendua jakauma mbeecha inyingî nkûrûki ya ndinari magana jathatû, na ikanenkerwa nkîa!” Nabo baragondokera mûka ûu mono.

⁶Îndî Jesû arabeera, “Tiganeni nawe, nîkî bûkûmûthangîkia? Akûnthithîria îthithio rîrîega mono.

⁷ Bûrî na nkîa magiita jonthe na bwoomba gûciteethia o rîrîa bûkeenda, îndî bûtîîthîrwa bûrî naani magiita jonthe.

⁸Mûka ûjû akûthithia ûrîa arîngîûmba. Agwaka mwîrî jwaakwa maguta o mbere mma nîkenda ajûthuranîra nîûntû bwa kûthikwa.

⁹Ndîbwîra na mma atî o kûrîa Nteto Injega cia Mûrungu igatûmagîîrua nthîgûrûûne yonthe, ûrîa athithia gûkeeranagwa nîkenda ariikanagwa.”

¹⁰Rîu Judasi, ûmwe wa barîa îkûmi na baîrî, areeta kîrî athînjîri-Mûrungu barîa anene, nîkenda amûkunyanîra kîrî bo.

¹¹Rîrîa baigîrue nteto ciaawe, baragwîrua mono, na bareeka wîrane atî bakamûnenkera mbeecha. Judasi araambîrîria gûcwaa kaanya gakeega ga kûmûkunyanîra.

¹²Ntukû ya mbere ya kîatho kîa Mîgaate îtiimbîthitue, rîrîa gatûrûme ka Pasaka kaathînjagwa, aritwa baawe nî baamûûrîrie atîrî, “Nîkû ûkwenda twîta gûkûthuranîîra kîatho gîa Pasaka?”

¹³Rîu Jesû aratuma aritwa baawe baîrî na arabeera, “Îteeni ntûûreene na bwakûrûka ku bûgacemania na muntû ûmwe akamatîte mûtûngi jwa rûûjî. Mûthingateeni,

¹⁴mwanka bûkûrûke mûciî jûrîa muntû ûu agakûrûka. Bwîre mwene mûciî jûu atîrî, ‘Mûritani arîûria, îrîkû nyomba ya ageni, arîa nkarîîra biakûrîa bia Pasaka amwe na aritwa baakwa?’

¹⁵Muntû ûu akabwonia nyomba înene îrî ngorobeene na îîki into bionthe na îthongometue bwega. Auu nîo bûkathuranîra birîa bikwendekana.”

¹⁶Aritwa bareeta barakûrûka ntûûreene na bareethîra gûkari o ta ûrîa aabeerîte na barathuranîra Pasaka ku.

¹⁷Gwakinya ûgoro, Jesû areeta na aritwa baawe barîa îkûmi na baîrî ku.

¹⁸ Bakîrîjaga, Jesû arabeera, “Ga nkûbwîra na mma atî ûmwe weenu, ûrîa ûkûrîjanîra naani agankunyanîra.”

¹⁹Rîu aritwa baawe baraambîrîria kwigua bûbûûî na o ûmwe o ûmwe waao aramûûria, “Nî ni?”

²⁰Jesû arabeera, “Nî ûmwe weenu buî îkûmi na baîrî, nî ûrîa ûgûtombeka mûgaate jwaawe mpakûriine ngîtombeka.

²¹Nî mma Mûtaana wa Muntû akooragwa o ûrîa Maandîko jaugîîte bûmwegiî. Îndî wûûi kîrî muntû ûrîa ûgakunyanîra Mûtaana wa Muntû! Kûrîngîîthîrwa bûrî bûbwega nkûrûki këethîra muntû ûu ataciarîrwe!”

²²Rîrîa baarîjaga, Jesû nî aajûkîrie mûgaate na aracokeria Mûrungu nkaatho na arajûng'enyûranga, aranenkera aritwa baawe akiugaga, “Jûkieni, jûjû nî mwîrî jwaakwa.”

²³Ningî arajûkia gîkombe na aracokeria Mûrungu nkaatho arabanenkera na bonthe barakundana gîkombe kîu.

²⁴ Rîu arabeera, “Îîjî nî tharike yaakwa ya kûrikithia kîrîkanîro gîkîerû, îrîa îgwîtûûrwa nîûntû bwa babaingî.

²⁵Ga nkûbwîra na mma atî ûûni ntînyua ndibei, mwanka ntukû îrîa nkaanyua ndibei înjerû Ûneneene bwa Mûrungu.”

²⁶Rîu baraina rwîmbo na baraumagara bareeta kîrîmeene kîa Mîzeituni.

²⁷ Jesû areera aritwa baawe, “Bwinthe bûkambîrûkîra, nîkwîthîrwa nî kwaandîki, ‘Nkariinga mûrîîthi na ng'ondu ciaragane.’

²⁸ Îndî ndariûkua ngeeta Galili ndî mbere yeenu.”

²⁹Peterû aramwîra, “Kinya këethîra bonthe bagagûtiga, ûûni ntîgûtiga kinya rî.”

³⁰Jesû aramwîra, “Ndîkwîra na mma atîrî, ûtukû bûbû mbere ya nchamba ya ngûkû îgamba jaîrî, ûkeethîrwa ûgûnkaana maita jathatû.”

³¹Îndî Peterû araciîtia akiugaga, “Kinya këethîra nkooragwa ûkîûragwa, ntîgûkaana.” Kinya aritwa bangî bonthe barauga o ûu.

³²Rîu bagûkinya antû eetagwa Gethisemane, Jesû areera aritwa baawe, “Kareni aja mbîte nkarombe.”

³³Areetania na Peterû na Johana na Jakubu na araambîrîria kwigua bûbûûî na kûthangîka nkoroone.

³⁴Nawe arabeera, “nî nkwigua kîeba nkoroone ûntû mpûûmba gûkua. Kareni aja na bûkámama.”

³⁵Areetaîta gataaria na araigwithia nthî, araromba akiugaga këethîra kwombîka, eeberue kagiita kau ka mîthangîko.

³⁶Arauga, “Baaba, mantû jonthe nî joombîkaga kîrî gwe. Mpebeeria gîkombe gîkî, îndî tî ûrîa ni nkwenda, ka ûrîa ûkwenda bûthithîke.”

³⁷Rîu aracoka kîrî aritwa barîa bathatû areethîra bamami. Arooria Peterû, “Simioni, ka ûmami? Ûtîûmba gûkara noo îthaa rîmwe ûtîmami?”

³⁸Rîu arabeera, “Rombeni na bûkámama, bûtîkeeje kûgwa magerioone. Roho nî akwenda, îndî mwîrî jûtî na inya.”

³⁹Areeta kaîrî na araromba agîtumagîra mîgambo o îrîa arombaga nayo.

⁴⁰Agûcoka kaîrî areethîra bamami nîûntû nî baarî na toro înyingî. Nabo baraaga ûntû bwa kûmwîra.

⁴¹Agûcoka rîa jathatû areethîra bamami arabeera, “Noo bûmami kinya nandî bûnogoki? Nandî îîu îkûng'ana! Îgiita rîgûkinya! Mûtaana wa Muntû nî athirîtie gûkunyanîrwa na nî akûnenkanîrwa kîrî eeyia.

⁴²Ûkîîreeni twîte. Raithîrieni, ûrîa wankunyanîra arî akuî.”

⁴³Jesû o akîaragia, Judasi, ûmwe wa barîa îkûmi na baîrî, areejania na antû babaingî barî na nchiû na nchûgûma. Antû bau baatûmi nî athînjîri-Mûrungu barîa anene, na aritani ba Waatho na akûrû barîa atongeeria.

⁴⁴Judasi, ûrîa wamûkunyanîrîte nî aarî akûbeera atîrî, “Ûrîa ngacûnca, ûu nîwe; mûgwateeni na bwîte nawe bûmûkarîtie bwega.”

⁴⁵Judasi agûkinya, areeta kîrî Jesû o rîo na arauga, “Mûritani!” Na aramûcûnca.

⁴⁶Rîu antû bau baragwata Jesû baramûrikia ûrîa atîngîûmba kûthonoka.

⁴⁷Ûmwe wa barîa baarûngi amwe na Jesû arakûûra rûchiû na aratema nthûûmba ya mûthînjîri-Mûrungu ûrîa mûnene aramîgiita gûtû.

⁴⁸Jesû arabooria, “Ka bwîjîte kûngwata bûrî na nchiû na nchûgûma teeka ndî mwamba?

⁴⁹ O ntukû o ntukû nî ndîratindaga amwe naabuî kîûrûûne nkîritanaga na bûtîrangwataga. Îndî nandî no mwanka Maandîko joojûre.”

⁵⁰Kagiita kau aritwa bonthe baramûtiga na baramatûka.

⁵¹Mûthaka ûmwe waariingîte chuka nî aamûthingatîre arî nyuma. Nabo barageria kûmûgwata

⁵²îndî arathonoka aratiga chuka îîu aramatûka arî kîthûnû.

⁵³Baraikia Jesû kwa mûthînjîri-Mûrungu ûrîa mûnene, arîa athînjîri-Mûrungu barîa anene na aritani ba Waatho na akûrû atongeeria boothûranîte.

⁵⁴Peterû nî aathingatîre Jesû arî gataaria, na arakûrûka kîaragoone kîa mûthînjîri-Mûrungu ûrîa mûnene arakara nthî akuî na akaria agîotaga mwanki.

⁵⁵Athînjîri-Mûrungu barîa anene na kîama kîonthe baracwaa ûkûûjî bûrîa bathitangîra Jesû nabu nîkenda bamûûraga, îndî baraaga.

⁵⁶Antû babaingî nî baaritîre ûkûûjî bwa ûrongo bakîthitangaga Jesû îndî ûkûûjî bwaao bûtagwatanîîre.

⁵⁷Ningî antû bangî nî baumîîre bararita ûkûûjî bwa ûrongo bakiugaga,

⁵⁸ “Tuî nî twaigîrue akiuga, ‘Nkatharia kîûrû gîkî gîaki nî antû, na ngîake kaîrî mbere ya ntukû ithatû ithira.’”

⁵⁹Îndî kinya bo ûkûûjî bwaao bûtaagwatanîra.

⁶⁰Rîu mûthînjîri-Mûrungu ûrîa mûnene ararûngama mbere yaao na arooria Jesû, “Ka gûtî u ûgûcokia bwegiî jau antû baba bagûkûthitanga najo?”

⁶¹Îndî arakira ki, atiuge noo atîa. Mûthînjîri-Mûrungu ûrîa mûnene aramûûria kaîrî, “Nîgwe Mesia, Mûtaana wa Mûrungu ûrîa Mûtharime?”

⁶² Jesû aracokia, “Nî ni we. Naabuî bûkoona Mûtaana wa Muntû akari nthî rûteere rwa ûrîo rwa Mûrungu Mweneinya, eejîte arî matuune ja îgûrû.”

⁶³Mûthînjîri-Mûrungu ûrîa mûnene aratambûranga nguû ciaawe arauga, “Nî ûkûûjî bûngî bûrîkû tûgûcwa?

⁶⁴ Bûkwigua akîruma Mûrungu! Buî bûriuga atîa?” Baramûtwîra îgamba barî bonthe atî ooragwe.

⁶⁵Rîu bamwe baao baraambîrîria kûmûtwîra mata na kûmûkunîka meetho, na baramûringa bakîmwîraga, “Roria ûtwîre nûû wakûringa.” Asikarî baramûjûkia bareeta bakîmûringaga nkuundi.

⁶⁶Rîrîa Peterû akari nthî au kîaragoone, mwarî ûmwe mûriti ngûgî wa mûthînjîri-Mûrungu ûrîa mûnene areeta

⁶⁷na oroona Peterû agîota mwanki na aramûtega bwega arauga, “Kinya gwe ûraarî amwe na Jesû wa Nazarethi.”

⁶⁸Îndî Peterû arakaana akiugaga, “Ûûnî ntiijî na ntîkûmenya jau ûkuuga.”

⁶⁹Rîrîa mwarî ûu oonere Peterû kaîrî, arambîrîria kwîra antû barîa baarûûngi au atîrî, “Muntû ûjû nî ûmwe waao.”

⁷⁰Peterû arakaana kaîrî. Nyuma ya kagiita kaniini antû bangî barîa baarûûngi au bareera Peterû, “Nî mma ûrî ûmwe waao nîûntû kinya gwe ûrî wa kuuma Galili.”

⁷¹Îndî Peterû araambîrîria na gûciîtia akiugaga, “Mûrungu nî ambûrage këethîra nî mbîjî mantû ja muntû ûu bûkuugîra.”

⁷²O rîu nchamba ya ngûkû îragamba rîa jaîrî. Nawe Peterû araririkana ûrîa Jesû aamwîrîte atî, “Mbere ya nchamba ya ngûkû îgamba jaîrî ûkeethîrwa ûgûnkaana maita jathatû.” Peterû araambîrîria kûrîra atîgûkira.