Read KIMERU BIBLE PROTESTANT EDITION Mar 15 Bible Online

Mar 15 - KIMERU BIBLE PROTESTANT EDITION bible

Mar 15

¹Ningî rûkîîrî kainda, athînjîri-Mûrungu barîa anene, amwe na akûrû barîa atongeeria na aritani ba Waatho, na kîama kîonthe baraireba. Baratheeka Jesû na baramwikia kîrî Pilatû.

²Pilatû arooria Jesû, “Gwe nîgwe Mûnene wa Ayahudi?” Jesû aramûcokeria, “Ûkuuga.”

³Athînjîri-Mûrungu barîa anene baramûthitanga na mantû jamaingî.

⁴Pilatû arooria Jesû kaîrî, “Ka ûtî na bwa gûcokia? Ûtîraigua ûrîa bakûthitanga na mantû jamaingî?”

⁵Îndî Jesû ataamûcokeria no atîa, tontû bûû Pilatû ararigara mono.

⁶O îgiita rîa thigûûnkû ya Pasaka, nî kwaarî wîthîre Pilatû kûthaûra mûbungwa ûmwe ûrîa antû baugaga athaûrwe.

⁷Ûmwe wa barîa baarî ncheera eetagwa Baraba. Aatheeki nîûntû bwa kûûragana rîrîa antû baringaga gîtuma bakîregaga Waatho.

⁸Antû babaingî nî beetîre kîrî Pilatû baramûûria abathithîrie o ta ûrîa kwaarî wîthîre bwaawe kûthithia.

⁹Pilatû arabooria, “Nî bûkwenda mbûthaûrîra Mûnene wa Ayahudi?”

¹⁰Aabeerîre ûu nîûntû nî oonete atî nî rûriitho rwaatûmîte athînjîri-Mûrungu barîa anene baikia Jesû kîrî we.

¹¹Îndî athînjîri-Mûrungu barîa anene baraujîîra antû beere Pilatû abathaûrîre Baraba antû a kûthaûra Jesû.

¹²Pilatû arooria antû kaîrî, “Nîatîa îndî bûkwenda nthithîria muntû ûûjû bûgwîta Mûnene wa Ayahudi?”

¹³Antû bonthe baragondoka barauga, “Mwambe!”

¹⁴Îndî Pilatû arabooria, “Tontû bwaî? Nî ûthûûku bûrîkû athithîtie?” Îndî antû bareeta na mbere kûringa gîtuma gîkînene bakiugaga, “Mwambe!”

¹⁵Pilatû akîenda kûgwîria kîrîndî, arakîthaûrîra Baraba na araûrîthia Jesû ibooko na aramûnenkanîra eeta kwambwa.

¹⁶Asikarî baramwikia kîaragoone kîa gîkaro kîa mûnene kîrîa geetagwa Praetoria na baroothûrania asikarî ba gîkundi kîonthe.

¹⁷Bareekîra Jesû rwambambio rwa rangi ya mûkû na baratuma thirû ya miigua na baramwîkîra mûtwe.

¹⁸Rîu baraambîrîria kûmûcikûûra bakiugaga, “Ûrotûûra matukû jamaingî gwe Mûnene wa Ayahudi!”

¹⁹Baramûringa mûtwe na rûturo na baramûtwîra mata. Baramûturîria maru teeka bakûmûthaathayia.

²⁰Bathiria kûmûkurunga, baramûrita rwambambio rûu baamwîkîrîte na baramwîkîra nguû ciaawe. Baramuumagaria beeta kûmwamba.

²¹ Beetîte, baracemania na muntû ûmwe weetagwa Simioni, wa kuuma ntûûreene ya Kureene, aumîte muundeene na baramûkinyîîria akamate mûtharaba jwa Jesû. Simioni aarî îthe wa Alexanda na Rufasi.

²²Rîu baraikia Jesû antû eetagwa Goligotha, (nî kuuga, “Gûntû kwa mûrûitû jwa kîongo”).

²³Barageria kûmûkuundithia ndibei yaunganîtue na manemane, îndî ararega kûnyua.

²⁴ Rîu baramwamba na bararinga kuura nîkenda boona o muntû ageeta na nguû îrîkû ya Jesû.

²⁵Baamwambîre thaa ithatû cia rûkîîrî.

²⁶Nî baandîkîre jarîa baamûthitangîte najo îgûrû rîa mûtwe jwaawe atî: “Ûûjû nîwe Mûnene wa Ayahudi.”

²⁷Aamba baîrî nî baambanîrîtue nawe. Ûmwe rûteere rwaawe rwa ûrîo na ûngî rwa ûmotho. [

²⁸ Maandîko jarîa jaugaga, “Nî aagiitîîrwe îgamba ta ûmwe wa antû babaaî,” jakûûjûra.][4]

²⁹ Antû barîa baakûrûkagîîra au nî bainainagia mîtwe yaao na bakamûcikûûra bakiugaga, “Îgwe ûraarî ûtharie kîûrû na ûgîake na ntukû ithatû,

³⁰nandî cionokie uume mûtharabeene.”

³¹Kinya athînjîri-Mûrungu barîa anene amwe na aritani ba Waatho baramûcikûûra bakîîranaga: “Nî aroonokagia antû bangî îndî atîkûûmba gûcionokia wengwa.

³²Ka twoone Mesia, Mûnene wa Israeli, akiuma mûtharabeene nîkenda tûmwîtîkia.” Aamba barîa baambi amwe nawe kinya bo baramûrumanga.

³³Nthîgûrû yonthe nî yaagîîre muundu kuuma thaa thita mwanka thaa kenda.

³⁴ Thaa kenda igûkinya, Jesû arakaya na kajû gakanene arauga, “Eloi, Eloi, lama sabakithani?” Ûu nî kuuga, “Mûrungu waakwa, Mûrungu waakwa, nîkî wambîrûkîra?”

³⁵Rîrîa bamwe ba barîa baarûngi au baigîrue ûu, barauga, “Thikîîreeni agîîta Elija.”

³⁶ Muntû ûmwe nî ogîîre arajûkia kînyaguthi aragîtombeka ndibeiine îrî na ng'ana, na arakîogeera kamûrangiine aramûkundithia akiugaga, “Twetereni twoone këethîra Elija akeeja kûmûrita mûtharabeene.”

³⁷Jesû arakaya na kajû gakanene, rîu arakua.

³⁸ Gîtambaa kîrîa gîacûûrîtue kîûrûûne kîratambûka kuuma îgûrû mwanka nthî, biraa biîrî.

³⁹Rîrîa mûnene wa asikarî ûrîa waarûngi au mbere yaawe aigîrue Jesû agîkaya na kajû gakanene na oona atî agûkua nî augîre, “Nî mma ûûjû araarî Mûtaana wa Mûrungu!”

⁴⁰ Ningî nî kwaarî na eekûrû baaraithîîrîtie barî gataaria. Bamwe baabo baarî Maria Magidalina na Maria ng'ina wa Jakubu ûrîa mwanake na Josesi na Salome.

⁴¹Bau nîbo eekûrû barîa baathingatanaga nawe bakîmûmenyagîîra rîrîa aarî Galili. Ningî nî kwaarî kinya aka bangî barîa baamûthingatîre mwanka Jerusalemu.

⁴²Ûgoro bwa ntukû ya Jumaa bûgûkinya, antû bakiithuranagîra nîûntû bwa sabatû,

⁴³Josefu wa kuuma Arimathea, ûmwe wa kîama gîa atongeeria, ûrîa waaei gîtîîo mono, na weteerete Ûnene bwa Mûrungu bwîja, nî oomîrîrie gwîta kîrî Pilatû na araromba anenkerwe mwîrî jwa Jesû.

⁴⁴Pilatû nî aarigarîre mono kwigua atî Jesû agûkua. Tontû bûû, areeta mûnene wa asikarî na aramûûria këethîra Jesû agûkarakara îgiita rîrîraaja agûkua.

⁴⁵Pilatû akûmenyithua nî mûnene ûu wa asikarî atî Jesû nî aarî agûkua, areetîkîîria Josefu ajûkia mwîrî jwaawe.

⁴⁶Josefu aragûra chuka, na ararita mwîrî jwaawe mûtharabeene, na arajûkûnja na chuka îîu arajwîka kaburiine karîa keenji iigeene. Aracoka araingiritia iiga rîrînene rîrainga mûromo jwa kaburi.

⁴⁷Maria Magidalina na Maria ng'ina wa Josesi nî booneere arîa eekîrwe.