Read KIMERU BIBLE PROTESTANT EDITION Mar 16 Bible Online

Mar 16 - KIMERU BIBLE PROTESTANT EDITION bible

Mar 16

¹Ntukû ya sabatû îkûthira, Maria Magidalina na Maria ng'ina wa Jakubu, na Salome, baragûra marashi nîkenda beeta gwaka mwîrî jwa Jesû.

²Ntukû ya mbere ya kiumia, rûkîîrî kainda, nî beetîre kaburiine riûa rîkiuma.

³Nî booranagia atîrî, “Nûû ûgatwingiritîria iiga riume mûromoone jwa kaburi?”

⁴Îndî bagûkinya bareethîra iiga rîriti mûromoone jwa kaburi. Iiga rîu rîaarî rîrînene mono.

⁵Bagûtonya kaburiine baroona mûthaka ûmwe weekîrîte nguû injerû akari nthî rûteere rwa ûrîo na bararigara mono.

⁶Îndî mûthaka ûu arabeera, “Bûkárigara, Jesû wa Nazarethi, ûrîa waambîrwe mûtharabeene nîwe bûgûcwaa. Nî ariûkîre, atî aja. Raithîrieni arîa baramwîkîte.

⁷ Îteeni bûmenyithie aritwa baawe na Peterû atî: ‘Agwîta Galili arî mbere yeenu. Kûu nîku bûkamwona, o ta ûrîa aabwîrîre.’”

⁸Eekûrû bau barauma au kaburiine na rwîro, baramatûka bakinainaga nî ûguaa na barigari. Gûtî muntû beera noo atîa nîûntû nî baakîraga. [

⁹Jesû akûriûka ntukû mbere ya kiumia rûkîîrî kainda, nî aacionanîrie kîrî Maria Magidalina. Marîa ûu nîwe ûrîa Jesû agondokeere roho inthûûku mûgwanja ciauma kîrî we.[5]

¹⁰Maria Magidalina areeta na aramenyithia barîa baakaraga amwe na Jesû. Îgiita rîu nî baithikîîrîte bakîrîraga.

¹¹Rîrîa baigîrue atî Jesû nî aarî akûriûka na acionania kîrî Maria Magidalina, bararega gwîtîkia.

¹²Nyuma ya ûu, Jesû arî na mûkariî jûngî nî aacionanîrie kîrî aritwa baîrî. Aritwa bau beetîte miuundeene.

¹³Kinya bo bagwîta beera barîa bangî, batabeetîkîrie.

¹⁴Mûthieene, Jesû aracionania kîrî aritwa îkûmi na ûmwe barî amwe bakîrîjaga biakûrîa. Arabatetia mono nîûntû bwa kwaga wîtîkio nîkwîthîrwa kinya bakwîrwa akûriûka nî boomîrie nkoro ciaao na bararega gwîtîkia barîa baarî bakûmwona.

¹⁵ Rîu arabeera, “Îteeni nthîgûrûûne yonthe bûgatûmîîrie Nteto Injega cia Mûrungu kîrî antû bonthe.

¹⁶Ûrîa ûgeetîkia na abatithue akoonokua. Îndî ûrîa ûkarega gwîtîkia agaakanûkua.

¹⁷Barîa bageetîkia bakaewa inya ya kûringa biama: bakeengaga Nkoma bagîtumagîra riîtwa rîaakwa, na bakaaria na mîgambo mîgeni,

¹⁸bakëeja kûgwata njoka kana kûnyua gîntû kinya kîrîkû kîrî na sûmu, gîtîbathûkia. Bakarîkagîîra barîa baajîtue njara na bakoora.”

¹⁹ Rîu Mwathani Jesû akûthiria kwaria nabo, araitithua îgûrû, na arakara rûteere rwa ûrîo rwa Mûrungu.

²⁰Aritwa nabo bareeta baratûmîîria gûntû kunthe. Mwathani nî aarî nabo bagîtûmîîria na akarikîthia Nteto Injega na biama birîa biathithîkaga.]