Read KIMERU BIBLE PROTESTANT EDITION Mar 2 Bible Online

Mar 2 - KIMERU BIBLE PROTESTANT EDITION bible

Mar 2

¹Nyuma ya ntukû inkai, Jesû nî aacokere Kaperinaumu na antû baraigua atî nî aarî mûciî.

²Antû babaingî mono baroothûrana au nja mwanka kûraaga webero kinya akuî na mwari. Jesû aratûmîîria Nteto Injega cia Mûrungu.

³Rîu antû bamwe barakamata muntû waarî kîonje bamwikîtie kîrî Jesû. Nabo baarî arûme bana.

⁴Bagûkinya, bararemwa gûtonya nyomba kûrîa Jesû aarî nîûntû antû nî baingîi mono. Tontû bûû, baraimbûra îgûrûgûrû rîa nyomba arîa Jesû aarî na bakwona kaanya bareenîka muntû ûu arî mûgekeene jwaawe.

⁵Rîrîa Jesû oonere wîtîkio bwaao, areera kîonje kîu, “Mûtaana, ûkûrekerwa meeyia jaaku.”

⁶Bamwe ba aritani ba Waatho barîa baakari nthî o, baraciûria nkoroone ciaao atîrî,

⁷“Nîkî muntû ûûjû akûûmîîria kwaria ûu? Nî akûruma Mûrungu! Nî Mûrungu akî ûûmba kûrekera muntû meeyia.”

⁸Jesû aramenya o rîo ûrîa baaciûragia arabooria, “Nîkî bûkûthûgaania ûu nkoroone cieenu?

⁹Nî bûrîkû bûûthû nkûrûki ya bûngî; nî kwîra kîonje gîkî ‘Ûkûrekerwa meeyia,’ kana nî kûmwîra, ‘Ûkîîra ûjûkie mûgeka jwaaku na ûcîîtîre?’

¹⁰Rîu ndîenda bûmenya atî Mûtaana wa Muntû arî na inya aja nthî kûrekera antû meeyia.” Tontû bûû, areera muntû ûu waarî kîonje,

¹¹“Ndîkwîra, ûkîîra, na jûkia mûgeka jwaaku na waane!”

¹²Antû bonthe baraithîrîtie, muntû ûu arookîîra o rîo na arajûkia mûgeka jwaawe, araciîtîra. Antû bonthe bararigara na barakumia Mûrungu, bakiugaga, “Tûtoona ûntû ta bûbû kaîrî.”

¹³Jesû nî eetîre kaîrî rûteere rwa îria rîa Galili na antû babaingî bareeta kîrî we na araambîrîria kûbaritana.

¹⁴O eetîrîte rûteere rwa îria rîu, nî oonere Lawi, mûtaana wa Alifayo, akari nthî ûbiciine ya kûgitithia ûgoti na aramwîra atîrî, “Nthingata!” Nawe ararûngama na aramûthingata.

¹⁵Nyumeene, Jesû na aritwa baawe nî baakari nthî bakîrîjaga biakûrîa nyomba ya Lawi barî na aritithia ûgoti babaingî amwe na eeyia.

¹⁶Rîrîa bamwe ba aritani ba Waatho barîa baarî Afarisayo boonere Jesû akîrîjanîra na eeyia na aritithia ûgoti, nî boorîrie aritwa baawe, “Nîkî Jesû akûrîjanîra na aritithia ûgoti na eeyia?”

¹⁷Jesû akwigua ûrîa booragia arabeera, “Antû barîa batîajîtue batîcûaga ndagitarî, îndî barîa baajîtue nîbo bamûcûaga. Ni nteejîre gwîta barîa baagîru îndî ndeejîre gwîta eeyia.”

¹⁸Kagiita kamwe aritwa ba Johana na aritwa ba Afarisayo nî baaciatîte biakûrîa. Tontû bûû, antû bamwe bareeta barooria Jesû atîrî, “Nîkî aritwa ba Johana na ba Afarisayo baciataga biakûrîa, îndî aritwa baaku batîciataga?”

¹⁹Jesû arabacokeria, “Nîatîa barîa beeti mûranûûne boomba gûciata biakûrîa rîrîa mûjûkania arî nabo? Îgiita rîonthe rîrîa barî na mûjûkania batîbuîri gûciata biakûrîa.

²⁰Îndî îgiita rîgakinya rîrîa mûjûkania akajûkua aume kîrî bo. Rîu nîrîo bagaciata biakûrîa.

²¹“Gûtî muntû wîkagîra nguû înkûrû kîraka gîkîerû. Akëeja kûthithia ûu, kîraka kîu gîgatambûra nguû îîu nkûrûki.

²²Ningî gûtî we wîkagîra ndua ithiriine bithithîtue na mîgûûta îmîkûrû. Îkëeja gwîkîrwa ku, nîka kîthiri kîu gîtambûkaga na ndibei îgeetîka. Îndî ndua îkagîrwa ithiriine bithithîtue na mîgûûta îmîerû.”

²³ Ntukû îmwe ya sabatû Jesû nî aakûrûkîrîîte miuundeene ya nkano. Aritwa baawe nabo baraambîrîria kuuna nkano bagiikithaga bakarîa.

²⁴Afarisayo baramwîra, “Tega! Nîkî baguikitha nkano bakîrîjaga na Waatho bûtîtîkîîrîtie ûntû bûu ntukû ya sabatû?”

²⁵ Jesû arabeera, “Ka bûtaathoma ûrîa Daudi aathithîrie rîrîa we na antû barîa aarî nabo baarî na mpara na bataarî na gantû ga kûrûma?

²⁶ Daudi nî aakûrûkîre kîûrûûne na ararîa mîgaate îrîa yaathûrîri Mûrungu. Aathithîrie ûu rîrîa Abiathari aarî mûthînjîri-Mûrungu ûrîa mûnene. Waatho bûteetîkîîrîtie muntû ûngî kinya ûrîkû arîa mîgaate îîu, tîga athînjîri-Mûrungu akî. Îndî Daudi nî aamîrîîre na aragaîra barîa aarî nabo.”

²⁷Tontû bûû, Jesû arabeera, “Sabatû yaatuîrwe nîûntû bwa antû îndî antû batoombîrwe nîûntû bwa sabatû.

²⁸Tontû bûû, Mûtaana wa Muntû nî Mwathani kinya wa sabatû.”