Read KIMERU BIBLE PROTESTANT EDITION Mar 3 Bible Online

Mar 3 - KIMERU BIBLE PROTESTANT EDITION bible

Mar 3

¹Rîu Jesû arakûrûka kîromberoone kaîrî na areethîra muntû waarî na njara împonju ku.

²Antû bamwe barîa baarî kîromberoone nî baacwaga ûntû bwa kûthitangîra Jesû. Tontû bûû, nî baakarîre beeteerete boona këethîra Jesû akooria muntû ûu ntukû ya sabatû.

³Jesû nî eerîre muntû ûu, “Njû aja.”

⁴Rîu arabooria atîrî, “Waatho bwîtîkîîrîtie muntû athithia atîa ntukû ya sabatû? Bûrîtîkîîria muntû ateethia bangî kana athithia untû bûbûthûûku? Nî bûgwîtîkîîria muntû ateethua atîgakue kana bûriuga atiganîîrue akue?” Îndî bo barakira ki.

⁵Rîu Jesû arabakûûrîra meetho athûûri na aigîtue bûbûûî nîûntû bwa ûrîa baarî na nkoro injûmû. Nyumeene areera muntû ûu, “Tambûrûkia njara yaaku!” Nawe aratambûrûkia njara na îrabua.

⁶Afarisayo baraumagara oome, na baraireba ntûti na antû barîa baagwataga Herode mbaru, ûrîa bakamûûragithia.

⁷Jesû na aritwa baawe nî baaumîre arîa baarî na bareeta rûteere rwa îria. Ntundu înene nî yaamûthingatîre yuumîte Galili na Judea,

⁸na Jerusalemu, na Idumea, na kuuma rwongo rwa mûuro jwa Jorodani, na bangî kuuma Tiro na Sidoni. Ntundu îîu yonthe yeetîre kîrî Jesû nîûntû bwa mantû jarîa baigîtue nî aathithîtie.

⁹ Jesû nî eerîre aritwa baawe barete gîtarû akuî nawe nîkenda atîkeeje gûkinyangwa nî antû.

¹⁰Nîkwîthîrwa nî aarî akwooria antû babaingî, barîa baajîtue nî baatîkanaga bakîenda kûmûringithia.

¹¹Antû barîa baarî na roho inthûûku bakûmwona, nî bairingîre nthî mbere yaawe bagîkayaga na kajû gakanene bakiugaga, “Gwe ûrî Mûtaana wa Mûrungu!”

¹²Îndî Jesû arabakaania na inya batîkamûmenyithanie kîrî antû.

¹³Jesû nî aitîrie kîrîmeene na areeta antû barîa eendaga gwîta, nabo bareeta kîrî we.

¹⁴Rîu arathuura antû îkûmi na baîrî barîa bagakaraga nawe na agatûmaga gwîta gûtûmîîria

¹⁵barî na inya ya kwînga roho inthûûku.

¹⁶Bau îkûmi na baîrî baathuurîrwe nîbo baba: Simioni ûrîa Jesû eetîre Peterû,

¹⁷na Jakubu na Johana, ataana ba Zebedii, barîa Jesû eetîre Boanerigesi, ûu nî kuuga “Ataana ba ngorogoro.”

¹⁸Bangî nî Anderea na Filipû na Batholomeo na Mathayo na Toma na Jakubu mûtaana wa Alifayo, na Thadeo na Simioni wa kuuma Kanaani,

¹⁹na Judasi Iskarioti, ûrîa waakunyanîîre Jesû.

²⁰Rîu Jesû araana nja. Antû babaingî baroothûrana au kaîrî mwanka Jesû na aritwa baawe baraaga kaanya ga kûrîa.

²¹Rîrîa antû ba nja yaao baigîrue ûntû bûu, bareeta kûmûgîîra nîûntû antû baugaga “Arî na nthû.”

²² Aritani ba Waatho barîa baumîte Jerusalemu nî baugîre, “Beelizebuli nî atonyete ndeene yaawe na ningî nîwe ûmweejaga inya ya kwînga roho inthûûku.”

²³Tontû bûû, arabeeta na arabaarîria na ngerekano arabeera, “Nîatîa Nkoma oomba kwînga Nkoma?

²⁴Ûnene bûkëethîrwa bwathûkeene ikundi ikundi bikirûjaga, ûnene bûu bûtîûmba gûtûûra.

²⁵Kinya mûciî jûkeethîrwa jwathûkeene na jûkîrûjaga jungwa, mûciî jûu jûtîûmba gûtûûra îndî nîka jûthiraga.

²⁶Tontû bûû, ûnene bwa Nkoma bûkëethîrwa bûgaûkeene ikundi ikundi bûtîûmba gûtûûra îndî nîka bûkathira.

²⁷“Gûtî muntû ûûmba kûûna nyomba ya muntû ûrî na inya na ajûkia into biaawe, tiga aambe amûtheeke, rîu amûtuunye into.

²⁸Ndîbwîra na mma atî antû bakarekerwa meeyia jaao na kinya irumi birîa barumîte Mûrungu.

²⁹ “Îndî ûrîa ûkaruma Roho Ûmûtheru atîkororekerwa meeyia jau nîûntû nî ja kenya na kenya.”

³⁰Jesû augîre ûu nîûntû antû nî baarî bakuuga, “Arî na roho înthûûku.”

³¹Ng'ina wa Jesû na ataana ba ng'ina ba Jesû barakinya na bararûngama oome baratûmana barauga atî nî bakwenda kûmwona.

³²Antû barîa baakari nthî bamûthiûrûkîte baramwîra, “Nyakwe na ataana ba nyakwe nî barûngî oome bakîendaga gûkwona.”

³³Jesû arabeera, “Chiaa na ataana ba chiaa nî barîkû?”

³⁴Rîu Jesû aratega antû barîa baakari nthî bamûthiûrûkîte arauga, “Baba nîbo chiaa na ataana ba chiaa.

³⁵O muntû wonthe ûrîa ûthithagia ûrîa Mûrungu eendaga, ûu nîwe mûtaana wa chiaa na mwarî wa chiaa na chiaa.”