Read KIMERU BIBLE PROTESTANT EDITION Mar 4 Bible Online

Mar 4 - KIMERU BIBLE PROTESTANT EDITION bible

Mar 4

¹ Jesû nî aambîrîrie kûritana kaîrî arî rûteere rwa îria rîa Galili. Antû babaingî mono nî boothûranîre au aarî mwanka kûraa atî no mwanka aitie gîtarûûne akare nthî ku. Nabo antû barakara mpwîroone cia îria.

²Nî aabaritanîre mantû jamaingî agîtumagîra ngerekano. Nî aabeerîre atîrî,

³“Thikîîreeni! Mwaandi nî eetîre kwaanda mbeeû.

⁴Akîminyaga mbeeû, imwe nî ciagwîre njîreene na irarîîwa nî nyoni.

⁵Ingî iragwa maigeene, gûntû gûtaarî na mûthetu jûmwingî. Mbeeû iu iraumanga ntûti nîûntû mûthetu jwaarî jûmûkai.

⁶Riûa rîkuuma nî cianyaarîre na nîûntû itaarî na mîri îmîraaja irooma.

⁷Mbeeû ingî iragwa gûntû kwaarî na matî jarî na miigua. Miigua îîu îrakûra na îraciinya, iraaga maciara.

⁸Ingî iragwa mûthetuune jûmûnoru, na irakûra na iraciara: imwe iraciara maita mîrongo îthatû, na ingî iraciara maita mîrongo intantatû, na ingî iraciara maita îgana.”

⁹Rîu Jesû arabeera atîrî, “Ûrîa ûrî na matû ja kwigua nî aigue.”

¹⁰Bamwe barîa baigîtue akîaria, amwe na barîa îkûmi na baîrî nî beetîre kîrî Jesû rîrîa aarî wenka, na baramûûria gîtûmi kîa ngerekano îîu.

¹¹Nawe arabeera, “Buî nî bûmenyithîtue witho bwa Ûnene bwa Mûrungu, îndî bangî barîa barî oome bakaigagua mantû jonthe jakîritanwa na ngerekano,

¹² nîkenda, ‘Batege, îndî baremwe kûmenya, bathikîîre, îndî baremwe gûciûra. Nîkwîthîrwa barîngîûmba kûmenya na bagaciûra, barîngîcokera Mûrungu na akabarekera.’”

¹³Rîu Jesû arabooria, “Ka bûtîûmba gûciûra ngerekano îîu? Nîatîa îndî bûkoomba gûciûra ngerekano irîa ingî?

¹⁴Mwaandi aandaga rûteto rwa Mûrungu.

¹⁵Antû bamwe bakari ta mbeeû iria ciagwîre njîreene. Baigagua rûteto rwa Mûrungu na o rîo Nkoma akabatuunya rûteto rûrîa rûgûkarî rûkwaandwa ndeene yaao.

¹⁶Bangî bakari ta mbeeû irîa ciagwîre gûntû kwaarî maiga. Baigagua rûteto rwa Mûrungu, bakarwîtîkîîria o rîo bagwîrîtue,

¹⁷îndî rûtîrikaga ndeene yaao. Tontû bûû, boomagîria îgiita rîîkaî. Thîîna kana mîthangîko yaabeejîra nîûntû bwa gwîtîkia rûteto rûu bagatiga gwîtîkia ntûti.

¹⁸Antû bangî bakari ta mbeeû irîa ciagwîre kûrîa kwaarî na matî ja miigua. Baba baigagua rûteto

¹⁹îndî nîûntû bwa kwimakîra nthîgûrûûne îîjî, na kwenda ûtonga na mairîrîîria ja mîthemba yonthe, jakabatonya jakaiinya rûteto rûu bakaaga maciara.

²⁰Îndî antû bangî bakari ta mbeeû irîa ciagwîre mûthetuune jûmûnoru. Baigagua rûteto na rûkarika nkoroone ciaao na bagaciara maciara: bamwe bagaciara maita mîrongo îthatû, bangî bagaciara maita mîrongo îtantatû, na bangî maita îgana.”

²¹ Jesû areeta na mbere kûbeera, “Ka kûrî ûgwatagia taawa na amîkunîkîra na mpakûri kana amîîka rungu rwa gîtanda? Teeka îrîîkagîîrwa rûtareene îgûrû?

²² Tontû bûû, gûtî gîntû kiithi gîtiithûrwa kana kîrî withoone gîtiumîrua weerûûne.

²³Ûrîa ûrî na matû ja kwigua nî aigue!”

²⁴ Kaîrî arabeera, “Rikieni mantû jarîa bûkwigua! Kîthimi kîrîa bûthimanagîra na kîo, nîkîo Mûrungu akabûthimîra nakîo na kinya nkûrûki.

²⁵ Ûrîa ûrî nabio akaewa bibingî; ûrîa ûtî nabio, kinya tûniini tûrîa arî natu agatunywa.”

²⁶Jesû areeta na mbere kuuga, “Ûnene bwa Mûrungu bûkari ta muntû waandîte mbeeû muundeene jwaawe.

²⁷Amamaga ûtukû na mûthenya agatinda kûrita ngûgî ciaawe, na îgiita rîu rîonthe mbeeû nîka îkuuma na gûkûra, na atîîthagîrwa akîmenyaga ûrîa îgûkûra.

²⁸Nî mûthetu jûtûmaga mbeeû yuuma na îgîa mabûûra na îraa na mûthieene îciara mpîndî.

²⁹ Kîmera gîakûra, muntû ûu nî ajûkagia gachiû kaawe ageeta gûketha, nîûntû îgiita rîa gûketha rîgûkinya.”

³⁰Jesû arauga, “Nîmbi tûûmba kûng'uanania na Ûnene bwa Mûrungu? Nî ngerekano îrîkû tûûmba gûtumîra kwonania ûrîa bûkari?

³¹Bûkari ta mpîndî ya mûthandûkû îrîa muntû ajûkagia akaanda. Mpîndî îîu nîyo niini buru nkûrûki ya mpîndî cia mîtî îngî yonthe.

³²Îndî yaandwa îkauma îkaa mûtî jûmûnene nkûrûki na mîtî îngî yonthe. Mpang'i ciaaju nî ineneaga na nyoni igaaka biuru ku.”

³³Jesû nî aabaritanîre rûteto agîtumagîra ngerekano inyingî, irîa boombaga kûmenya.

³⁴Gûtî rîo aarîria antû atî gûtumîra ngerekano. Îndî nî aaciûragîra aritwa baawe ûritani bwa ngerekano iu rîrîa barî bonka.

³⁵Ûgoro bwa ntukû îîu, Jesû nî eerîre aritwa baawe, “Tuuneni îria, twîte rwongo rûrîa rûngî.”

³⁶Rîu baratiga antû bangî na baraitia gîtarûûne kîrîa Jesû aarî bareetania nawe. Itarû bingî nî biabathingatîre.

³⁷Ruuo rûrûnene rûraambîria kurutana na mîgombe ya rûûjî îraringa gîtarû na kîrambîrîria kûûjûra rûûjî.

³⁸Jesû nî aarî mûthieene jwa nyuma jwa gîtarû amamîrîte pilû. Aritwa nî baamûkîrie baramwîra, “Mûritani, ka ûtîkûmaka tûrî akuî gûkua?”

³⁹Jesû ararûngama na aragondokera ruuo na areera îria, “Kira! Rîkîria!” Rîu ruuo na mîgombe birakira na kûragea na ûkiri bûbûnene.

⁴⁰Rîu Jesû arooria aritwa baawe, “Nîkî bûgûkîra? Ka bûtî na wîtîkio?”

⁴¹Baramaka mono na baroorania, “Ka ûjû arî ûû ûkwathîkîrwa kinya nî îria na ruuo?”