Read KIMERU BIBLE PROTESTANT EDITION Mar 5 Bible Online

Mar 5 - KIMERU BIBLE PROTESTANT EDITION bible

Mar 5

¹Jesû na aritwa baawe barakinya rwongo rûrîa rûngî rwa îria, nthîgûrûûne ya Gerasa.

²Jesû akuuma gîtarûûne o rîo aratirimana na muntû ûmwe waarî na roho inthûûku aumîte tûburiine.

³Muntû ûu atûûraga tûburiine na gûtî we ûrîngîûmba kûmûtheeka kinya na nyororo.

⁴Magiita jamaingî nî baamûtheekaga na mpengû na nyororo, îndî nî aagiitaga nyororo na akaunanga mpengû iu na gûtî muntû waarî na inya ya kûmûrigîîria.

⁵Aakaraga tûburiine na irîmeene mûthenya na ûtukû agîkayaga na gwitemanga na maiga.

⁶Rîrîa oonere Jesû arî gataaria, nî oogîîre kîrî we na aratûria maru mbere yaawe

⁷akiugaga na kajû gakanene, “Nîatîa ûkwenda naani, gwe Jesû Mûtaana wa Mûrungu Ûrîa Ûrî Îgûrû buru? Itû nî ngûkwerenca riitweene rîa Mûrungu ûkánthangîkia!”

⁸Aaugîre ûu nîûntû Jesû nî aaugaga, “Gwe roho înthûûku, uma kîrî muntû ûûjû.”

⁹Rîu Jesû aramûûria, “Wîtagwa atîa?” Nawe aramûcokeria, “Mbîtagwa ‘Njûûrî,’ nîûntû tûrî babaingî.”

¹⁰Rîu areerenca Jesû nîkenda atîkeenge roho iu ciuma nthîgûrû îîu.

¹¹Au nî kwaarî na ngûrwe inyingî ciarîîthîtue rûteere rwa kîrîma.

¹²Tontû bûû, roho iu nthûûku iramwerenca ikiugaga, “Twîre twîte na tûtonye kîrî ngûrwe irîa.”

¹³Nawe araciîtîkîîria. Rîu roho iu nthûûku iraumagara na iratonya kîrî ngûrwe iu. Ngûrwe cionthe ciaarî akuî ngiri ijîîrî, iramatûkîîra rwareene na iragwa îrieene na iraûrîra ku.

¹⁴Arîîthi ba ngûrwe iu baramatûka na bareeta ntûûreene na miuundeene bareera antû ûrîa gwakarîka. Antû nabo bareeta kwona ûrîa gwakarîkîre.

¹⁵Bagûkinya kîrî Jesû nî boonere muntû ûrîa waatwîre arî na roho inthûûku akari nthî, na eekîrîte nguû na akîthûgaanagia bwega. Bakwona ûu barakîra mono.

¹⁶Antû barîa boonere ûrîa gwakarîkîre nî beetîre bareera antû bangî mantû jarîa jaathithîkîre kîrî muntû ûu waarî na roho inthûûku na ûrîa ngûrwe ciaûrîîre îrieene.

¹⁷Nabo antû bau barerenca Jesû aume nthî yaao.

¹⁸Rîrîa Jesû aitagia gîtarûûne, muntû ûu waarî na roho inthûûku nî aamwerencere amwîtîkîîrie eetanie nawe.

¹⁹Îndî Jesû ararega na aramwîra, “Aana kweenu, na wîte wîre antû ba mûciî jweenu jonthe jarîa Mwathani akûthithîria na ûrîa akwigîîrua kîaao.”

²⁰Rîu, muntû ûu areeta araambîrîria gûtûmîîria kûu Dekapoli mantû jonthe jarîa Jesû aamûthithîrîtie na antû bonthe bararigara mono.

²¹Jesû arauna kaîrî arî gîtarûûne areeta rûteere rûrîa rûngî rwa îria. Antû babaiingî baroothûrana au aarî rûteere rwa îria.

²²Mûrûngamîîri ûmwe wa kîrombero weetagwa Jairû areeta kîrî we. Akwona Jesû arairinga nthî mbere yaawe na

²³aramwerenca akiugaga, “Kaarî gaakwa nî kajîtue na karî akuî gûkua. Itû njû ûkarîkîîre njara ciaaku nîkenda koora na gatûûra mwoyo!”

²⁴Rîu Jesû areetania nawe na antû babaingî mono baramûthingata bamwatîkîte nteere cionthe.

²⁵Kîrî antû bau nî kwaarî na mwekûrû ûmwe waarî na mûrimo jwa kuuma tharike mîaka îkûmi na îîrî.

²⁶Mûka ûu nî aarî agwîta kîrî ndagitarî babaingî na atumîra mbeecha cionthe nîkenda atetheka îndî antû aabua nîka eetaga na mbere kwajua nkûrûki.

²⁷Tontû nî aarî akwigua nkuma ya Jesû, nî aaciûmîrie arakûrûka antû bangî mwanka araringithia nguû ya Jesû.

²⁸Athithîrie ûu agîciîraga, “Ndaringithia nguû yaawe akî, nkaabua.”

²⁹O rîo, tharike îratiga kuuma na araigua akworua mûrimo jûu.

³⁰Jesû akwigua inya yauma mwîrîîne jwaawe, aragarûkîra antû na arabooria, “Nûû waringithia nguû yaakwa?”

³¹Aritwa baawe baramûcokeria, “Nî ûkwona ûrîa antû bagwatîkîte na ûkûûria nûû wandingithia?”

³²Jesû arategatega nîkenda oona ûrîa waarî akûmûringithia.

³³Rîu mûka ûu nîûntû nî aarî akûmenya akworua, nî aumîîre akiinainaga nî ûguaa na araturia maru mbere yaawe na aramwîra ûûma bunthe.

³⁴Jesû aramwîra, “Mwarî, wîtîkio bwaaku bûgûtûma wora. Îta na thîîrî na woorue mûrimo jwaaku.”

³⁵Jesû akîaragia o ûu, antû baumîte nja ya mûrûngamîîri ûu wa kîrombero, barakinya bareera mûrûngamîîri ûu atîrî, “Mwarî waaku agûkua. Ûkáthangîkia Mûritani kaîrî?”

³⁶Kinya këethîra Jesû nî aarî akwigua ûrîa baugîre, nî eerîre mûrûngamîîri ûu, “Ûgákîra, îtîkia akî.”

³⁷Jesû nî eerîre antû bangî bonthe bakámûthingata tiga Peterû, Jakubu na Johana, mûtaana wa ng'ina wa Jakubu.

³⁸Bagûkinya mûciî jwa mûrûngamîîri ûu, Jesû aroona antû bagîkayaga na bakîrîraga mono.

³⁹Rîrîa aakûrûkîre nyomba arabooria atîrî, “Nîkî bûkuuga mbu na kûrîra? Mwarî ûjû atîkuîte îndî nîka amami.”

⁴⁰Îndî baramûthekeera. Rîu Jesû arabaumagaria bonthe oome na areera îthe na ng'ina wa mwarî na aritwa baawe batonye kûrîa mwarî aarî.

⁴¹Jesû aragwata mwarî ûu njara na aramwîra, “Talitha kumi,” nî kuuga “Mwarî, ndîkwîra ûkîîra.”

⁴²Mwarî ûu arookîîra o rîo, na araambîrîria gwîtaîta. Aarî na ûkûrû bwa mîaka îkûmi na îîrî. Rîrîa antû boonere ûu bararigara mono mono.

⁴³Jesû arabakaania ainyîrîtie atî bakéera muntû kinya ûrîkû mantû jau. Ningî arabeera barûmie mwarî ûu biakûrîa.