Read KIMERU BIBLE PROTESTANT EDITION Mar 6 Bible Online

Mar 6 - KIMERU BIBLE PROTESTANT EDITION bible

Mar 6

¹Jesû athingati nî aritwa baawe nî baaumîre kûu na bareeta ntûûreene yaawe yongwa.

²Ntukû ya sabatû îgûkinya nî aambîrîrie kûritana kîromberoone na antû babaingî barîa bamûthikîîrîte nî baarigarîre na barooria, “Nîkû muntû ûûjû aritîte mantû jaja jonthe? Nî ûûme bwa mûthemba jûrîkû bûbû aeei? Nîatîa akûûmba kûringa biama?

³Ûjû tî mûbundi, ûrîa mûtaana wa Maria? Jakubu na Josesi na Juda na Simioni tî ataana ba ng'ina? Kinya aarî ba ng'ina batîtwîre naatuî?” Tontû bûû, bararegana na mantû jaawe.

⁴ Jesû arabeera, “Kîroria nî kîejagwa gîtîîo kunthe tiga ntûûreene yaao na mûciî jwaao na kinya nja yaao.”

⁵Atoombîre kûringa biama bibingî kûu tiga aajie babakai arîkîrîire njara na arabooria.

⁶Nî aarigarîre mono nîûntû bwa antû kwaga wîtîkio. Nyuma ya ûu Jesû nî aariûngîîre ntûûra irîa ciaarî akuî akîritanaga.

⁷Rîu Jesû areeta aritwa barîa îkûmi na baîrî arabatûma baîrî baîrî. Nî aabaeere inya ya kwînga roho inthûûku.

⁸ Ningî nî aabakaanîrie kûjûkia gîntû kinya kîrîkû gîa gûtumîra rûgendoone tiga rûturo runka. Nî aabakaanîrie gûkamata biakûrîa, kana kîondo kana bakamata mbeecha.

⁹Ningî arabeera beekagîre iraatû, na îndî bagákamata nguû ijîîrî.

¹⁰Ningî arabeera, “Nyomba îrîa bûgatonya, karageni ku mwanka rîrîa bûkauma gûntû kûu.

¹¹ Gûntû kûrîa bûtîgwatwa ûgeni kana bûthikîîrwa, bûkiuma ku, bûtige bwaringaringa tîîri îrîa îrî magûrû jeenu, îthîrwe îrî ûkûûjî kîrî bo atî bakûrega kûbûgwata ûgeni.”

¹²Tontû bûû, aritwa bareeta na baratûmîîria atî antû nî babuîrîte kwirira.

¹³ Nî beengîre roho inyingî inthûûku, na barooria barîa baajîtue na barabaaka maguta.

¹⁴ Rîu mûnene Herode nî aigîrue mantû jau jonthe nîûntû nkuma ya Jesû nî yaarî îgûtaamba gûntû kunthe. Antû bamwe baugaga, “Johana Mûbatithania nî ariûkîtue kuuma kîrî akuû na kîu nîkîo gîgûtûma eethîrwa arî na inya ya kûringa biama.”

¹⁵Bangî bakauga, “Ûu nî Elija.” Ningî bangî bakauga, “Nî kîroria, ta kîmwe kîa birîa bia tene.”

¹⁶Îndî Herode akwigua nteto iu nî aaugîre, “Ûu nî Johana Mûbatithania! Nî ndaamûgitithîrie mûtwe îndî nî ariûkîtue.”

¹⁷ Herode nî aarî akûgwatithia Johana na amwiingîra ncheera. Herode aathithîrie ûu nîûntû bwa Herodia, ûrîa aarî akûjûkia amwethia mwekûrû waawe, kinya këethîra aarî mwekûrû wa mûtaana wa ng'ina, Filipû.

¹⁸Johana nî eeraga Herode, “Tî bwega kûjûkia mwekûrû wa mûtaana wa nyakwe.”

¹⁹Tontû bûû, Herodia arathûûra Johana na aracwaa ûrîa amûûragithia, îndî araremwa,

²⁰nîkwîthîrwa Herode nî aakîraga Johana nîûntû nî aijî atî Johana aarî muntû ûmwagîru na ûmûtheru. Tontû bûû, nî aamûmenyerere atîkooragwe. Herode nî aagwîragua kûthikîîra Johana, kinya këethîra nyuma ya kûmûthikîîra nî aathangîkaga nkoro mono.

²¹Ntukû îmwe, Herodia nî oonere kaanya gakega ga kûûragithia Johana. Ntukû îîu ya kîatho gîa kûgwîrîrua gûciarwa kwa Herode. Herode nî aathithîrie kîatho gîkînene na areeta athani na atongeeria ba njûûrî ciaawe amwe na antû barîa baarî îgweta ba Galili.

²²Mwarî wa Herodia nî aakûrûkîre araina na aragwîria Herode amwe na ageni baawe mono. Mûnene Herode areera mwarî ûu, “Ndoomba kîonthe kîrîa ûkwenda naani ngakûnenkera.”

²³Ningî aramûciîtîria aramwîra, “Kîonthe kîrîa ûkandoomba, ngakûnenkera, kinya këethîra nî nusu ya ûnene bwaakwa.”

²⁴Mwarî ûu araumagara na arooria ng'ina, “Nîmbi nkaromba?” Ng'ina aramûcokeria, “Mûtwe jwa Johana Mûbatithania.”

²⁵Mwarî ûu areeta kîrî mûnene na mpwîî aramwîra, “Ndîenda ûmpe o nandî mûtwe jwa Johana Mûbatithania jûrî thaaniine.”

²⁶Mûnene araigua bûbûûî mono, îndî atîûmbe kûrega nîûntû bwa ûrîa aarî agûciîtia mbere ya ageni baawe.

²⁷Tontû bûû, mûnene aratûma asikarî ûmwe ntûti eeta kûreta kîongo kîa Johana. Asikarî ûu areeta ncheera na aragiita Johana mûtwe na

²⁸arajûkamata jûrî thaaniine na aranenkera mwarî. Nawe mwarî araikîria ng'ina.

²⁹Aritwa ba Johana bakwigua akûûragwa, bareeta na barajûkia mwîrî jwaawe barajûthika.

³⁰Atûmwa nî baacokere kîrî Jesû na baramwîra mantû jonthe jarîa baarî bakûthithia na bakûritana.

³¹Antû babaingî nî beetîre kîrî Jesû na aritwa baawe mwanka baraaga kaanya ga kûrîa. Tontû bûû, Jesû areera aritwa baawe, “Twîteni tûrî twinka gûntû gûtî antû nîkenda bûnogoka kagiita gagakai.”

³²Rîu barî bonka baitia gîtarûûne bareeta gûntû gûtaarî na antû bangî.

³³Antû babaingî nî boonere bagîîta, na barabamenya. Tontû bûû, antû ba kuuma ntûûreene cionthe baroogîa barakinya gûntû kûrîa beetîte barî mbere yaao.

³⁴ Rîrîa Jesû aumîre gîtarûûne, nî eethîîre antû babaingî na arabaigîîrua kîaao nîûntû baakari ta ng'ondu itî na mûrîîthi. Rîu araambîrîria kûbaritana mantû jamaingî.

³⁵Gwatua gûtuka, aritwa baawe bareeta kîrî we baramwîra, “Aja tûrî gûtî antû na kûrî akuî gûtuka.

³⁶Îîra antû beete ntûûreene na mîciîne îrîa îrî akuî, bakaigûrîre biakûrîa.”

³⁷Îndî Jesû arabacokeria, “Buî baeni biakûrîa.” Nabo baramûûria, “Ka ûkwenda twîta kûgûra biakûrîa bia mbeecha inyingî ûu ta ndinari magana jaîrî?”

³⁸Nawe arabooria, “Bûrî na mîgaate îng'ana? Îteeni bûkoone.” Bakwona, baramwîra, “Kûrî na mîgaate îtaano na makûyû jaîrî.”

³⁹Tontû bûû, Jesû areera aritwa beere antû bakare nthî nyakiine ikundi ikundi.

⁴⁰Nabo bakara nthî ikundi ikundi. Bimwe bia antû îgana îgana na bingî bia antû mîrongo îtaano îtaano.

⁴¹Rîu Jesû arajûkia mîgaate îîu îtaano na makûyû jaîrî araraithîîria bwa îgûrû, na aracokeria Mûrungu nkaatho, na arang'enyûranga mîgaate îîu na aranenkera aritwa baawe bagaîra antû. Ningî aragaîra antû bonthe makûyû jarîa jaîrî.

⁴²Bonthe bararîa na baranyira.

⁴³Baroothûrania matigi ja mîgaate na makûyû, baroojûria ikabû îkûmi na biîrî.

⁴⁴Barîa baarîîre mîgaate îîu baarî arûme ngiri ithaano.

⁴⁵O rîo Jesû areera aritwa baawe baitie gîtarûûne beetage Bethisaida, rwongo rûrîa rûngî rwa îria barî mbere, nawe atigwe akîrîîkanagia na antû nîkenda baana.

⁴⁶Antû bakwaana araitia kîrîmeene kûromba.

⁴⁷Ûgoro bwakinyîre gîtarû kîrî îrieene gatîgatî, nawe aarî nthî înjûmo wenka.

⁴⁸Nî oonere aritwa baawe barî na thîîna ya gwîtithia gîtarû nîûntû bwa ûrîa ruuo rwabarigagîîria. Kûrî akuî gûkea, Jesû areetîîra rûûjîîne eetîte kîrî bo. Agûkinya akuî nabo arakara teeka akwenda kûbakûrûka.

⁴⁹Îndî bakûmwona eetîrîte îgûrû rîa rûûjî, barathûgaania nî Nkoma, na bararinga gîtuma,

⁵⁰nîûntû bonthe rîrîa baamwonere nî baigîrue ûguaa mono. Jesû araaria nabo o rîo, arabeera, “Ûmîîrieni, nî ni! Bûgákîra!”

⁵¹Araitia gîtarûûne kîu baarî, na ruuo rûratiga kuurutana. Nabo bararigara mono mono.

⁵²Nîkwîthîrwa bataarî baguciûkîrwa nî gîtûmi kîa mîgaate îrîa. Mathûgaanio jaao kinya rîu nî jamami.

⁵³Rîrîa baunîre îria, nî baakînyîre nthîgûrû ya Genesareti na barathekeera gîtarû rûteere rwa îria.

⁵⁴Bakuuma gîtarûûne, antû baramenya Jesû o rîo.

⁵⁵Tontû bûû, baramatûka ntûûreene cionthe irîa ciaarî akuî na barajûkia antû barîa baajîtue bamami mîgekeene yaao barabaikia kûrîa baigîrue Jesû nî aarî.

⁵⁶Rîrîa Jesû aakûrûkagîîra ntûûreene na mîciîne na miuundeene, antû nî beekaga aajie thokoone, na bakamwerenca eetîkîîrie baringithie mîthia ya nguû yaawe. Antû bonthe barîa baamîringithîrie nî baabuîre.