Read KIMERU BIBLE PROTESTANT EDITION Mar 7 Bible Online

Mar 7 - KIMERU BIBLE PROTESTANT EDITION bible

Mar 7

¹Rîrîa Afarisayo na bamwe ba aritani ba Waatho barîa baumîte Jerusalemu, boothûranîre akuî na Jesû,

²nî boonere bamwe ba aritwa baawe bakîrîa na njara îrî na mûgiro, ûu nî kuuga bataathambîtie njara.

³(Nîkwîthîrwa Afarisayo na Ayahudi bonthe, nî baathingataga nkuagaya cia biûjûjû biaao, irîa ciaugaga muntû atîbuîri kûrîa atîthambîtie njara.

⁴Ningî into bionthe birîa biagûragwa thokoone, kwaarî no mwanka bitherue mbere ya birîîwa. Nî kwaarî na nkuagaya ingî baathingataga ta kûthambia ikombe na nyongû na into bingî birîa bithithîtue na îturutia.)

⁵Tontû bûû, Afarisayo na aritani ba Waatho nî boorîrie Jesû, “Nîkî aritwa baaku batîthingataga nkuagaya cia biûjûjû bieetû? Nîkî barîjaga na njara irî na mûgiro?”

⁶ Jesû arabacokeria, “Buî aciaayia! Kîroria Isaya nî aarorerie mantû ja mma jabwegiî rîrîa aandîkîre: ‘Antû baba bankumagia na mîromo akî, îndî nkoro ciaao irî kûraaja naani.

⁷Kûnthaathayia kwaao nî kwa ûtheri, nîûntû baritanaga mooritani ja antû ta jarî jaakwa.’

⁸“Buî bûregaga kwathîkîra maathana ja Mûrungu na bûkathingata nkuagaya cia antû.”

⁹Jesû areeta na mbere kûbeera, “Buî nî bûcwaga na ûûme ûrîa bûrega kûthingata maathana ja Mûrungu nîkenda bûthingata nkuagaya cieenu.

¹⁰ Nîkwîthîrwa Musa augîre, ‘Kumagia abaagu na nyakwe,’ na ‘Ûrîa ûkaruma îthe kana ng'ina no mwanka ooragwe.’

¹¹Îndî buî nî bûritanaga, ‘Muntû akëethîrwa arî na gîntû oomba gûteethia îthe kana ng’ina nakîo, îndî akauga gîntû kîu nî ‘Korubani’ (ûu nî kuuga ‘kîewa kîa Mûrungu’),

¹²ûritani bweenu bûtîtîkîîrîtie ateethia aciari baawe nakîo.

¹³Ûu nîu bûtîonaga rûteto rwa Mûrungu rûrî na bata rîrîa bûkûritana nkuagaya cieenu. Ningî nî bûthithagia mantû jangî jamaingî ta jau.”

¹⁴Jesû nî eetîre antû kaîrî na arabeera, “Thikîîreeni bwinthe na bûciûre.

¹⁵Gûtî kîo kîumaga oome ya muntû na gîkûrûka ndeene yaawe, kîûmba kûmwîkîra mûgiro. Îndî kîrîa kîmwîkagîra mûgiro nî kîrîa kiumaga ndeene yaawe. [

¹⁶Ûrîa ûrî na matû nî aigue.”][1]

¹⁷Agûtiga antû bau arakûrûka nyomba na aritwa baawe baramûûria gîtûmi kîa ngerekano îîu.

¹⁸Nawe arabooria, “Kinya buî bûtîgûciûkîrwa? Ka bûtiijî atî gîntû gîgatonya ndeene ya muntû gîtîûmba kûmûîkîra mûgiro,

¹⁹nîûntû gîtîîtaga nkoroone îndî gîîtaga kîu na nyumeene gîgatewa kîoroone? (Tontû akuuga ûu, nî aatuîre biakûrîa bia mîthemba yonthe nî bibiega na gûtî bio birî mûgiro.)”

²⁰Areeta na mbere kuuga, “Kîrîa kiumaga ndeene ya muntû nîkîo kîmwîkagîra mûgiro.

²¹Nîkwîthîrwa nkoro ya muntû nîyo yuumaga mathûgaanio jamaaî na ûmaramari na waamba na ûûragani na ûthûngîîri na

²²kwirîrîria into biaitha na ûûî na waayia na ûmatha na rûriitho na kwaandîîra bangî mantû jatîo na wikumia na waa.

²³Mantû jau jonthe mathûûku jaumaga ndeene ya muntû na nîjo jamwîkagîra mûgiro.”

²⁴Jesû nî aaumîre au na areeta akuî na Tiro na Sidoni. Nî aakûrûkîre nyomba îmwe na ateendaga muntû kînya ûrîkû amenya arî ku îndî atoombîre gwiciitha.

²⁵Mwekûrû ûmwe waarî na mwarî waarî na roho înthûûku nî aigîrue mantû jegiî Jesû. Tontû bûû, areeta na araigwîthia akuî na magûrû jaawe.

²⁶Mwekûrû ûu aarî Mûgriiki ûrîa waaciarîri antû eetagwa Foenicia, kûu Sîria. Nî eerencere Jesû eenge roho înthûûku yuume kîrî mwarî waawe.

²⁷Jesû aramwîra, “Reka twaana twambe tûnyire mbere nîûntû tî bwega kûjûkia irio bia twaana na ûgerera kurû.”

²⁸Îndî mwekûrû ûu arauga, “Îî Mwathani, îndî kinya kurû irî rungu rwa meetha, nî irîjaga tûng'enyua tûrîa tûgwîthagua nî twaana.”

²⁹Jesû aramwîra, “Tontû bwa ûu wauga, aana. Roho înthûûku îkuuma kîrî mwarî waaku!”

³⁰Nawe araana na areethîra mwarî waawe amami ûrûrî na roho înthûûku yuumîre kîrî we.

³¹Rîu Jesû arauma nthîgûrû ya Tiro na arakûrûkîîra nthîgûrû ya Sidoni na nthîgûrû ya Dekapoli mwanka arakinya îrieene rîa Galili.

³²Antû nî baamwikîîrie muntû ûtoombaga kwaria kana kwigua na baramwerenca amûrîkîîre njara.

³³Jesû aramûrita kîrî antû bangî na aramwîkîra biara matû, na aratuîra mata na aramûringithia rûûme.

³⁴Rîu Jesû araraithîîria îgûrû na arauga, “Efifatha,” na nî kuuga, “Rugûka.”

³⁵O rîo, matû jaawe jararugûka, na rûûme rûrabua na araambîrîria kwaria bwega.

³⁶Jesû arabakaania kwîra muntû kinya ûrîkû mantû jau, îndî amwe na kûbakania bareeta na mbere gûtaambia nteto iu na wîru.

³⁷Antû nî baarigarîre mono mono na barauga, “Nî aathithîtie mantû jonthe bwega. Nî aatûmîte barîa bataigua baigua na barîa bataaria baaria!”