Read KIMERU BIBLE PROTESTANT EDITION Mar 8 Bible Online

Mar 8 - KIMERU BIBLE PROTESTANT EDITION bible

Mar 8

¹Kagiiteene o kau, antû babaingî nî boothûranîte na bataarî na gîntû giakûrîa. Jesû areeta aritwa baawe arabeera,

²“Nî nkwigîîrua antû baba kîaao nîûntû nî bakarîte naani ntukû ithatû na batî na biakûrîa.

³Nkëeja kûbeera baane na mpara boomba kûgirîkîra njîreene, nîûntû bamwe baao baaumîte kûraaja mono.”

⁴Aritwa baawe baramûcokeria, “Nîatîa muntû oomba kûnyiria antû baba bonthe na mîgaate na aja tûrî nî rwanda?”

⁵Nawe arabooria, “Bûrî na mîgaate îng'ana?” Nabo baramûcokeria, “Tûrî na mîgaate mûgwanja.”

⁶Areera antû bakare nthî na arajûkia mîgaate îîu mûgwanja, na aathiria gûcokeria Mûrungu nkaatho aramîng'enyûranga na aranenkera aritwa baawe bagaîra antû. Nabo baragaîra antû mîgaate îîu.

⁷Ningî nî baarî na tûkûyû tûtûkai. Jesû nî aatharimîre tûkûyû tûu na arauga tûgaîrwe antû.

⁸Antû bararîa baranyira. Rîu aritwa baroothûrania matigi ikabû mûgwanja.

⁹Barîa baarîîre baarî antû ta ngiri inya (4,000).

¹⁰Akwîra antû baane, na o rîo aratonya gîtarûûne amwe na aritwa baawe, areeta nthî ya Dalimanutha.

¹¹ Afarisayo nî beetîre kîrî Jesû na baraambîrîria gûkararania nawe bakîmwîraga abaringîre kîama kuuma îgûrû. Baathithagia ûu bakîendaga kûmûgeria.

¹² Jesû araigua bûbûûî nkoroone, na arauga, “Nîmbi îgûtûma nthukî îîjî îcwaa kîama? Ndîbwîra na mma atî gûtî kîama antû ba nthukî îîjî bakoonua.”

¹³Rîu arauma kîrî bo na araitia gîtarûûne kaîrî, araambîrîria kuuna îria eeta rwongo rûrîa rûngî.

¹⁴Aritwa nî baarî bakûûrîîrua gûkamata mîgaate. Tontû bûû, baarî na mûgaate jûmwe junka gîtarûûne.

¹⁵ Jesû arabeera, “Imenyagîreeni mûtheega jwa kwimbithia mûgaate jwa Afarisayo na jwa Herode.”

¹⁶Aritwa baraambîrîria kûringanîra nkaanja bongwa bakiugaga, “Ariuga ûu nîûntû tûtî na mîgaate.”

¹⁷Jesû akûmenya ûu baaciîraga arabeera, “Nîmbi îgûtûma buuga atî nî ûrîa bûtî na mîgaate? Bûtîraciûkîrwa kana bûmenya mwanka nandî? Ka nkoro cieenu itîûmba kûgwata noo mbi?

¹⁸ Keeke! Bûrî na meetho na bûtîkwona? Bûrî na matû na bûtîkwigua? Ka bûtîkûririkana

¹⁹rîrîa ndaang'enyûrangîîre antû ngiri ithaano mîgaate îtaano? Nî ikabû bia matigi bing'ana bwothûranîrie?” Nabo baramwîra, “Nî ikabû îkûmi na biîrî.”

²⁰“A rîrîa yaarî mîgaate mûgwanja kîrî antû ngiri inya, nî ikabû bia matigi bing'ana bwothûranîrie?” Nabo baramwîra, “Nî ikabû mûgwanja.”

²¹Tontû bûû arabeera, “Kinya rîu bûtîraciûkîrwa nî mantû?”

²²Bagûkinya Bethisaida, antû nî baamûreteere muntû ûmwe waarî ntumuumu na baramwerenca amûringithie.

²³Jesû aragwata muntû ûu njara na aramwikia oome ya ntûûra. Aramûtwîra mata meetho na aramûrîkîîra njara na aramûûria, “Kûrî gîntû ûkwona?”

²⁴Muntû ûu aratega arauga, “Ndîona antû, îndî bakari ta mîtî îgwîtaîta.”

²⁵Jesû aramûrîkîîra njara meetho kaîrî, nawe aratega kûnûû, na meetho jaawe jarabua na araambîrîria kwona into bionthe bwega.

²⁶Jesû aramwîra aane kwaao na aramwîra, “Ûgácoka ntûûreene!”

²⁷Rîu Jesû na aritwa baawe bareeta ntûûreeene ya Kaisaria Filipi. Barî njîreene, Jesû arooria aritwa baawe atîrî, “Antû baugaga ûûni nî ni ûû?”

²⁸ Nabo baramûcokeria, “Bamwe baugaga gwe ûrî Johana Mûbatithania, na bangî bakauga ûrî Elija, ningî bangî bakauga ûrî ûmwe wa iroria.”

²⁹ Nawe arabooria, “A buî rî, buugaga ûûni ndî ûû?” Peterû aramûcokeria, “Gwe nîgwe Kristû.”

³⁰Rîu Jesû arabeera, “Bûkéera muntû noo ûrîkû mantû jambegiî.”

³¹Rîu Jesû araambîrîria kûritana aritwa baawe arabeera, “Mûtaana wa Muntû no mwanka athangîkue mono na aregwe nî akûrû atongeeria, na athînjîri-Mûrungu barîa anene, na aritani ba Mawaatho. Akooragwa, na nyuma ya ntukû ithatû akariûka.”

³²Jesû nî aaugîre ûu carûrûkû. Tontû bûû, Peterû aramwikia rûteere na araambîrîria kûmwîra atî tî bûbwega kwaria mantû ta jau.

³³Îndî Jesû aragarûka araraithîîria aritwa baawe na aragondokera Peterû aramwîra, “Uma akuî naani Nkoma! Mathûgaanio jaaku jatiumîte kîrî Mûrungu îndî ûrîthûgaania ta muntû tu.”

³⁴ Rîu Jesû areeta antû bonthe amwe na aritwa baawe na arabeera, “Këethîra muntû nî akwenda kûnthingata, nî airege na akamate mûtharaba jwaawe na anthingate.

³⁵ Nîkwîthîrwa ûrîa ûkenda kwonokia ûtûûro bwaawe akabûta. Îndî muntû ûrîa ûgata ûtûûro bwaawe nîûntû bwaakwa na nîûntû bwa Nteto Injega cia Mûrungu, akabwonokia.

³⁶“Nî umithio bûrîkû muntû akoona, këethîra nthîgûrû yonthe îkaa yaawe îndî aage ûtûûro?

³⁷Nîmbi muntû oomba gûkûrania ûtûûro bwaawe nayo?

³⁸Muntû wonthe ûrîa ûkaigua nthoni nîûntû bwaakwa na aigue nthoni kûthingata nteto ciaakwa, nthukîîne îîjî ya antû batîkîraga Mûrungu na eeyia, kinya Mûtaana wa Muntû akaigua nthoni nîûntû bwa muntû ûu, rîrîa akeeja na araîka babatheru arî mwagoone jwa Îthe.”