Read KIMERU BIBLE PROTESTANT EDITION Mar 9 Bible Online

Mar 9 - KIMERU BIBLE PROTESTANT EDITION bible

Mar 9

¹Jesû areeta na mbere kûbeera, “Ndîbwîra na mma atî kûrî bamwe barûngi aja batîkua mbere ya boona Ûnene bwa Mûrungu bûgîkinya bûrî na inya.”

² Nyuma ya ntukû ithanthatû, Jesû nî eetîre Peterû na Jakubu na Johana, na araitia nabo kîrîmeene gîkîraaja. Bamûtegeete, aragarûka na

³nguû ciaawe iraa injerû cwee, ûntû gûtî muntû ûthambia nguû cierûa mûthemba ta jûu.

⁴Rîu Elija na Musa baraumîra na baraaranîria na Jesû.

⁵Peterû areera Jesû, “Mûritani, Bwabua mono tûgakara aja. Ga twaake tûgaanda tûthatû: kamwe gaaku, na kangî ka Musa na kangî ka Elija.”

⁶Peterû atamenyaga ûrîa akuuga nîûntû nî baamakîte mono.

⁷ Rîu îtu rîreenama rîrabathika na kajû karauma îtuune karauga, “Ûûjû nî Mûtaana waakwa ûrîa mpendeete, mûthikagîîreni.”

⁸O ntûti aritwa bau bakûraithîîria batoonere muntû ûngî arî nabo tiga Jesû wenka.

⁹Beenamîte kuuma kîrîmeene, Jesû arabakaania arabeera, “Bûkéera muntû kinya ûrîkû mantû jarîa bwona mwanka rîrîa Mûtaana wa Muntû akariûka kuuma kîrî akuû.”

¹⁰Bareeka mantû jau nkoroone kinya këethîra nî booranagia bongwa atîrî, “Nîatîa agûtwîra rîrîa akuuga ‘Akariûka kuuma kîrî akuû?’”

¹¹ Nî boorîrie Jesû atîrî, “Nîkî aritani ba Waatho baugaga atî no mwanka Elija aambe eeje mbere?”

¹²Nawe arabeera, “Elija no mwanka eeje nîkenda acokanîîria mantû jonthe. Îndî nîkî kwaandîki atî no mwanka Mûtaana wa Muntû amenwe na athaangîkue mono?

¹³Ndîbwîra atî, Elija nî eejîre na baramûthithîria jarîa jonthe beendaga kûmûthithîria, o ta ûrîa kwaandîki mantû jamwegiî.”

¹⁴Rîrîa baakinyîre kîrî aritwa bangî nî beethîîre aritani ba Waatho bagîkararanagia nabo na antû babaingî bathikîrîtie.

¹⁵Rîrîa antû bau baamwonere nî baamakîre mono na baroogîa kîrî we kûmûthagaana.

¹⁶Jesû arabooria, “Nî mantû jarîkû jau bûgûkararanagia?”

¹⁷Muntû ûmwe aramûcokeria, “Mûritani, nî ngûkûreterete mwana waakwa arî na roho înthûûku îrîa îtûmîte aremwa kwaria.

¹⁸O arîa îramûgwatîra nîka îmwarûkagia nthî, na akarita mûûjî na agakabakaba maîgo na mwîrî jûkoomagara ng'a. Nî mbîrîre aritwa baaku bamîînge îndî baremwa.”

¹⁹Jesû arabeera, “Buî bûrî nthukî yaagîte wîtîkio! Ka ngakara naabuî mwanka rî? Ngeteera bûmenya mantû mwanka rî? Ndetereni mwana ûu.”

²⁰Baramwikia kîrî we. Roho îîu îkwona Jesû, îraringa mwana ûu nthî aragaragara na aragirîka akîritaga mûûjî.

²¹Jesû arooria îthe wa mwana ûu, “Mûtaana ûû atwîre akari ûû kuuma rî?” Nawe aracokia, “Kuuma arî ûmûnini.

²²Magiita jamaingî roho îîu nthûûku nî mûgeraga mwankiine kana rûûjîîne nîkenda îmûûraga. Tontû bûû, këethîra woomba, twigîîrue kîaao na ûtûteethie!”

²³Jesû aramwîra, “Këethîra woomba! Mantû jonthe nî joombîkaga kîrî muntû ûrîa wîîtîkagia.”

²⁴O rîo îthe wa mwana ûu ararîra na kajû akiugaga, “Nî ngwîtîkia, nteethia ntige kûrega gwîtîkia.”

²⁵Rîrîa Jesû oonere antû beetîte kîrî we na rwîro, nî aagondokeere roho îîu nthûûku aramîîra, “Gwe roho îrîa îtiigagua na îtîaragia, ndîkwîra uma kîrî mwana ûûjû na ûkorokûrûka kîrî we kaîrî!”

²⁶Roho îîu îragandûka na kajû gakanene na îkiuma, îramûringa nthî na aragirîka. Mwana ûu aratigwa akari ta muntû ûmûkuû. Antû barauga “Nî akuîre.”

²⁷Îndî Jesû aramûgwata njara na aramûkîîria na ararûngama.

²⁸Jesû agûkûrûka nyomba, aritwa baawe baramûûria barî bonka, “Nîkî îndî tuî tûremerwe kûmîînga?”

²⁹Nawe arabeera, “Gûtî kîo kîûmba kwînga roho ya mûthemba jûu tîga maromba akî.”

³⁰Jesû na aritwa baawe nî baaumîre au na barakûrûkîîra nthîgûrû ya Galili. Jesû ateendaga antû bamenya kûrîa aarî

³¹nîûntû aaritanaga aritwa baawe akîbeeraga, “Mûtaana wa Muntû nî akunyanîri na akanenkaîrwa kîrî barîa bakamûûraga. Îndî ooragwa, akariûka nyuma ya ntukû ithatû.”

³²Aritwa bataaciûrîre gîtûmi gîa ûntû bûu na barakîra kûmûûria.

³³Rîu bagûkinya Kaperinaumu baratonya nyomba na arabooria, “Nî mantû jarîkû bûgûkararanagia bûrî njîreene?”

³⁴ Barakira ki, nîûntû barî njîreene nî baakararanagia bakîûranagia ûrîa mûnene buru kîrî bangî nûû.

³⁵ Jesû arakara nthî, na areeta bau îkûmi na baîrî arabeera, “Muntû akëenda kwaa wa mbere, no mwanka ae wa mûthia na atumîkîre bangî.”

³⁶Rîu arajûkia kaana kaniini arakarûngîka gatîgatîîne kaao. Ningî arakagwata na arabeera,

³⁷ “Ûrîa ûgwataga kaana ta gaka ûgeni nîûntû bwa riîtwa rîaakwa, nî ni agwataga ûgeni. Ûrîa ûngwataga ûgeni, tî ni agwataga ûgeni îndî nî ûrîa waantûmîre.”

³⁸Johana aramwîra, “Mûritani, nî twonere muntû akîînga roho inthûûku agîtumagîra riîtwa rîaaku, naatuî twamûkaania nîûntû tî wa mûûrû jweetû.”

³⁹Îndî Jesû arauga, “Bûkámûkaania, nîkwîthîrwa gûtî muntû ûringa biama agîtumagîra riîtwa rîaakwa, ûûmba kwaria mantû jamaaî jambegiî nyumeene.

⁴⁰ Nîkwîthîrwa ûrîa ûtî ûthû naatuî nî wa mûûrû jweetû.

⁴¹ Ga nkûbwîra na mma muntû wonthe ûrîa ûkabûkundia gîkombe kîa rûûjî rwa kunyua nîûntû bûrî ba Kristû, nî mma atîaga îtuui rîaawe.”

⁴²“Muntû kinya ûrîkû ûrîa ûgatuma ûmwe wa baba baniini barîa bambîtîkîtie beeyia, bwabua akoogeerwa iiga rîa kîthii nkingo na akagerwa îrieene.

⁴³ Këethîra njara yaaku îgaatûma wîyia, mîgiite! Nî kaaba ûkûrûke ûtûûroone bwa kenya na kenya ûrî na njara îmwe nkûrûki gwîta mwankiine jwa kenya na kenya, jûrîa jûtîoraga, ûrî na njara cio-ijîîrî. [

⁴⁴Kûu ing'inyo birîa bibarîjaga bitîkujaga na mwanki jwa kûu jûtîoraga kinya rî.][2]

⁴⁵Këethîra kûgûrû gwaaku gûgatûma wîyia, Kûgiite! Nî kaaba ûkûrûke ûtûûroone bwa kenya na kenya ûtî na kûgûrû kûmwe, nkûrûki ya gwîta mwankiine jwa kenya na kenya ûrî na magûrû jo-jaîrî. [

⁴⁶Kûu, ing'inyo birîa bibarîjaga bitîkujaga na mwanki jwa kûu jûtîoraga kinya rî.][3]

⁴⁷ Këethîra riitho rîaaku rîgatûma wîyîa, rîkûûre! Nî kaaba ûkûrûke Ûneneene bwa Mûrungu ûrî na riitho rîmwe nkûrûki ya kûgerwa mwankiine jwa kenya na kenya ûrî na meetho jo-jaîrî.

⁴⁸ Kûu ing'inyo birîa bibarîjaga bitîkujaga na mwanki jwa kûu jûtîoraga kinya rî.

⁴⁹Nîkwîthîrwa antû bonthe bakatherua na mwanki.

⁵⁰ Chumbî nî înjega, îndî îkëeja kwaga mûchemo, nîatîa yûûmba gwîkîrwa mûchemo kaîrî? Karageni bûrî na mûchemo jwa chumbî ndeene yeenu, na bûtûûrage na thîîrî gatîgatîîne keenu.”