Read KIMERU BIBLE PROTESTANT EDITION Luk 1 Bible Online

Luk 1 - KIMERU BIBLE PROTESTANT EDITION bible

Luk 1

¹Kîrî mûkaathe Theofilo, Antû babaingî nî baciûmîtie kwaandîka mantû jarîa jathithîkîte gatîgatîîne geetû.

²Antû bau baandîkîte mantû jau o ta ûrîa baamenyithîrue jo nî antû barîa baajonere kuuma rîrîa jaambîrîrie na baraa atûmîîria ba nteto iu.

³Tontû bûû, nî mboneete nî bwega ncûnkûûne mantû jonthe bwega kuuma rîrîa jaambîrîrie nîkenda nkwaandîkîra ûrîa jaakari na ûrîa jaathingateene, gwe Mûkaathe Theofilo.

⁴Ndîthithia ûu nîkenda ûkamenya ûûma bwa mantû jau ûthirîtie kûritanwa.

⁵Îgiiteene rîrîa Herode aarî mûnene wa Judea, nî kwaarî mûthînjîri-Mûrungu weetagwa Zekaria. Zekaria aarî wa gîkundi kîa athînjîri-Mûrungu kîrîa gîetagwa Abija. Mwekûrû waawe eetagwa Elizabethi. Elizabethi aarî wa kuuma mwîrîga jwa Aaroni.

⁶Bo-baîrî nî baarî antû babaagîru mbere ya Mûrungu, na nî baathîkagîra maathana jonthe na mataaro ja Mwathani jonthe.

⁷Îndî bataarî na kaana nîûntû Elizabethi aarî nthaata, na nî baarî bagûkûra mono.

⁸Ntukû îmwe Zekaria nî aaritaga ngûgî ya ûthînjîri Mûrungu kîûrûûne nîûntû yaarî ntukû yaawe ya kûrita ngûgî kîûrûûne.

⁹O ta ûrîa kwaarî wîthîre bwa athînjîri-Mûrungu, Zekaria nî aarî akûringîrwa kuura eethîrwa arî kîûrûûne akîîthagîria ubaani. Tontû bûû, arakûrûka ndeene,

¹⁰na antû bareeteera oome bakîrombaga rîrîa ubaani yaaîthagîrua.

¹¹Mûraîka wa Mwathani nî aumîrîîre Zekaria na ararûngama rûteere rwa ûrîo rwa kîritîro kîa igongwana gîa kwîîthîria ubaani.

¹²Rîrîa Zekaria aamwonere nî aamakîre na araigua ûguaa.

¹³Îndî mûraîka aramwîra, “Zekaria ûgákîra, nîkwîthîrwa Mûrungu nî aigîtue maromba jaaku na mwekûrû waaku Elizabethi agagûciarîra kaîjî, naagwe ûgageeta Johana.

¹⁴Naagwe ûgakara na nkerû na kûgwîrua, na babaingî bakagwîrua rîrîa gagaciarwa.

¹⁵ Johana akeethîrwa arî muntû ûrî na îgweta mbere ya Mwathani. Atînyua ndibei kana gintû noo kîrîkû kîrîa kîogitanagia. Ningî akoojûrwa nî Roho Ûmûtheru arî kîu kîa ng'ina.

¹⁶Ningî agacokanîîria antû babaingî ba Israeli kîrî Mwathani Mûrungu waao.

¹⁷ Akeeja mbere ya Mwathani eeja, na akeeja arî na Roho na inya ta ya Elija, nîkenda aigithania aciari na aana baao, na atûme antû barîa batîathîkagîra Mûrungu batue kûthingataga mîîtîre îrîa mîagîru, na athuranîre antû nîkenda beteera Mwathani.”

¹⁸Zekaria areera mûraîka atîrî, “Nîatîa nkamenya ûntû bûu bûrîo? Ni ndî ûmûkûrû mono na mwekûrû waakwa nî ntindiri?”

¹⁹ Mûraîka aramûcokeria, “Nî ni Gabrieli. Nkaraga mbere ya Mûrungu, na ntûmi mbîja kwaria naagwe na nkwîra nteto iji injega.

²⁰Ûkaa maamu na ûtîûmba kwaria mwanka rîrîa mantû jau jagakarîka, nîûntû ûtîretîkia nteto ciaakwa, irîa ikoojûra îgiita rîaacio rîakinya.”

²¹Antû noo beetereete Zekaria, barigari nîûntû nî aarî agûkara kîûrûûne îgiita rîrîraaja.

²²Rîrîa aumagarîre atoombîre kwaria nabo. Rîu antû baramenya nî aarî akwona kîoneki arî kûu ndeene. Tontû atoombaga kwaria, nî aaboonererie na njara ûrîa gwakarîka.

²³Rîrîa îgiita rîaawe rîa kûrita ngûgî kîûrûûne rîathirîre, nî aanîre kwaawe.

²⁴Nyumeene, mwekûrû waawe Elizabethi nî aagîîre îu na araiciitha mîeri îtaano agîciîraga,

²⁵“Mwathani agûnteethia na ampeberia nthao irîa ntwîre nacio kuuma kîrî antû.”

²⁶Elizabethi agûkinyia mîeri îtantatû arî na îu, mûraîka Gabrieli nî aatûmîrwe nî Mûrungu ntûûreene ya Nazarethi kûu Galili.

²⁷ Aatûmi kîrî mwarî karaiti weetagwa Maria, ûrîa wagûragwa nî muntû weetagwa Josefu wa mwîrîga jwa Daudi.

²⁸Mûraîka agûkinya kîrî Maria aramwîra, “Gwîrua! Ûrî ûmûtharime na Mwathani arî amwe naagwe.”

²⁹Maria arathangîka mono akîenda kûmenya gîtûmi kîa nteto iu.

³⁰Mûraîka aramwîra atîrî, “Maria ûgákîra, nîkwîthîrwa Mûrungu nî akwonetie wega bwaawe.

³¹ Ûkagîa îu na ûciare kaîjî ûgeete Jesû.

³² We akaa mûnene na ageetagwa Mûtaana wa Mûrungu Ûrîa Ûrî Îgûrû buru. Mwathani Mûrungu akamwethia mûnene o ta ûrîa aeethetie Daudi, kîûjûjû kîaawe.

³³Akaathaga nchiarwa cia Jakubu kenya na kenya, na Ûnene bwaawe bûtîkorothira.”

³⁴Maria arooria mûraîka, “Nîatîa mantû jau jakoombîka, nîkwîthîrwa ni ndî mwarî karaiti?”

³⁵Mûraîka aramwîra atîrî, “Ûkoojûrwa nî Roho Ûmûtheru na wûûjûrwe nî inya ya Ûrîa Ûrî Îgûrû buru. Tontû bûû, mwana ûmûtheru, ûrîa ûgaciara ageetagwa Mûtaana wa Mûrungu.

³⁶Ningî menya atî Elizabethi, ntindiri ya ndûgû cieenu, ûrîa antû batwîre baugaga nî nthaata, arî na mîeri îtantatû arî na îu.

³⁷ Nîkwîthîrwa gûtî ûntû bûrema Mûrungu.”

³⁸Maria aramwîra, “Ni ndî nthûûmba ya Mwathani. Nî gûkarîke kîrî ni o ta ûrîa wauga.” Rîu mûraîka araciîtîra.

³⁹Nyuma ya ntukû inkai, Maria araithuranîra, areeta na mpwîî mwanka ntûûreene îmwe îrîa yaarî nthîgûrû ya irîma, ya Judea.

⁴⁰Arakûrûka nyomba ya Zekaria na arakeethia Elizabethi.

⁴¹Rîrîa Elizabethi aakeetherue nî Maria, kaana karîa kaarî kîu kîaawe karatûûatûûa kîu na Elizabethi aroojûrwa nî Roho Ûmûtheru.

⁴²Arauga na kajû gakanene, “Gwe ûrî ûmûtharime nkûrûki ya eekûrû bonthe, na ûrîa ûgaciara nî atharimi!

⁴³Nîatîa bûng'ana bûbû, ndeeja kûriûngîrwa nî ng'ina wa Mwathani waakwa?

⁴⁴Tontû rîrîa mbîgîrue nkeethi ciaaku, nîrîo mwana ûrîa ûrî kîu gîaakwa ambîrîîrie gûtûûatûûa nîûntû bwa ûrîa aagwîrîîtue.

⁴⁵Maria, nî ûtharimi nîûntû bwa gwîtîkia atî mantû jarîa weerîrwe jaumîte kîrî Mwathani jakoojûra.”

⁴⁶ Nawe Maria arauga, “Mwoyo jwaakwa nî jûgûkumia Mwathani,

⁴⁷na roho waakwa nî agwîrîrîtue Mûrungu mwonokia waakwa,

⁴⁸ nîûntû nî aririkanîte nthûûmba yaawe îrîa iinyiîtie.

⁴⁹Nîkwîthîrwa Ûrîa ûrî inya nî anthithîrîtie mantû jamanene, na riîtwa rîaawe nî rîîtheru.

⁵⁰Nî aigagîrua barîa bamûtîîaga kîaao kuuma nthukî îmwe mwanka nthukî îngî.

⁵¹We nî athithîtie mantû jamanene, na aragania mathûgaanio ja aikumia.

⁵² Nî atunyîte barîa baathanaga waathani, na aa îgweta barîa batî îgweta.

⁵³ Nî anyirîtie barîa barî na mpara na biakûrîa bibiega, na eenga itonga bitî na gantû.

⁵⁴Nî atethetie Israeli, nthûûmba yaawe, na aririkana kûmigîîrua kîaao,

⁵⁵o ta ûrîa eranîîre na biûjûjû bieetû, Abrahamu na nchiarwa ciaawe, akabaigîîrua kîaao kenya na kenya.”

⁵⁶Maria arakara kwa Elizabethi mîeri îthatû, rîu araana kwaao.

⁵⁷Îgiita rîa Elizabethi rîa kuurûka rîakinya araciara kaîjî.

⁵⁸Rîrîa atûûri baawe na antû ba ndûgû ciaao baigîrue atî Mwathani nî amwigîrîîtue kîaao gîkînene, nî baagwîrîrue amwe nawe.

⁵⁹ Ntukû ya inyanya yakinya, nî beetîre gûtaana kaîjî kau. Nabo beendaga gûgeeta riîtwa rîa îthe Zekaria,

⁶⁰îndî ng'ina wa kaana kau arabeera, “Arî! Kaana gageetwa Johana.”

⁶¹Nabo baramûcokeria, “Gûtî kinya ûmwe wa ndûgû cieenu wîtagwa ûu.”

⁶²Rîu baraarîria îthe Zekaria bagîtumagîra njara nîkenda abeera ûrîa akwenda geetwa.

⁶³Nawe areetia kabaaû ga kwaandîkîra na araandîka, “Nî geetwe Johana.” Bonthe bararigara mono.

⁶⁴O rîu Zekaria aroomba kwaria kaîrî, na arambîrîria gûkumia Mûrungu.

⁶⁵Atûûri bonthe baraigua ûguaa na bareeta bakîaragia mantû jarîa boonere nthîgûrûûne ya irîma ya Judea.

⁶⁶Bonthe barîa baigagua mantû jau nî baarigaraga mono bagaciûria, “A mwana ûûjû akaa muntû wa mûthemba jûrîkû?” Nîkwîthîrwa inya ya Mwathani îrî amwe nawe.

⁶⁷Zekaria, îthe wa kaana kau, nî oojûrîrwe nî Roho Ûmûtheru na araroria akiugaga,

⁶⁸“Mwathani Mûrungu wa Israeli arokumua, nîûntû nî areejîre gûteethia na aakûûra antû baawe.

⁶⁹Nî aratweere Mwonokia ûrî na inya, kuuma kîrî nchiarwa cia Daudi, nthûûmba yaawe.

⁷⁰O ta ûrîa aatumîîre iroria biaawe bibitheru kuuma tene gûtwîra,

⁷¹atî agatwonokia kuuma kîrî anthû beetû, na atwonokie kuuma kîrî barîa batûthwîre.

⁷²Nî aaugîre akaigîrua biûjûjû bieetû kîaao, na aririkane kîrîkanîro kîaawe gîkîtheru.

⁷³We nî aaciîtîîrie kîûjûjû gîeetû Abrahamu,

⁷⁴na areeka wîrane atî agatwonokia kuuma kîrî anthû beetû, nîkenda tûmûtumîkagîra tûtî na ûguaa,

⁷⁵na twaa antû babatheru na babaagîru ûtûûroone bweetû bunthe.

⁷⁶ Naagwe kaana, ûgeetagwa kîroria kîa Mûrungu Ûrîa Ûrî Îgûrû buru, nîkwîthîrwa ûgeeta ûrî mbere ya Mwathani, nîkenda ûthuranîra njîra ciaawe;

⁷⁷nîkenda ûmenyithia antû baawe atî bakoonokua barekerwa meeyia jaao.

⁷⁸Mûrungu weetû arî kîaao gîkînene, na agatûma twoone wonokio bwaawe bûkîîja kîrî tuî.

⁷⁹ Wonokio bûgatûma bonthe barîa batwîre muunduune jwa gîkuû, booneerua mîîtîre ya thîîrî îrîa bakathingataga.”

⁸⁰Mwana ûu nî aakûrîre akîgîaga inya ya mwîrî na ya Roho. Nî aatûûrîre rwanda mwanka ntukû îrîa aacionanîrie kîrî antû ba Israeli.