Read KIMERU BIBLE PROTESTANT EDITION Luk 10 Bible Online

Luk 10 - KIMERU BIBLE PROTESTANT EDITION bible

Luk 10

¹Mwathani akûthiria kuuga ûu arathuura antû bangî mîrongo mûgwanja na baîrî. Arabatûma baîrî baîrî beeta ntûûreene cionthe na gûntû kunthe, kûrîa eerîgîîrîte gwîta.

² Akîbatûma arabeera atîrî, “Maketha nî jamaingî îndî akethi nî babakai. Tontû bûû, rombeni mwene maketha nîkenda agatûma akethi muundeene jwaawe.

³ Nandî îteeni, ndabûtûma bûkari ta ng'ondu gatîgatî ka mbawa.

⁴ Bûgákamata kîbeeti kana kîondo, kana iraatû. Ningî bûgákeethia muntû kinya ûrîkû njîreene.

⁵Nyomba îrîa bûgatonya, ambenî buuge, ‘Thîîrî nî îkare nyomba îîjî!’

⁶Këethîra kûrî muntû wendeete thîîrî ku, thîîrî îîu îgakara nawe, îndî këethîra gûtî we, thîîrî îîu îkabûcokera.

⁷ Kareni nyomba îîu, bûkîrîjaga na kûnyua birîa bakabûnenkera. Nîkwîthîrwa gûtî mûriti ngûgî ûtîbuîrîte kûewa mûchaara jwaawe. Bûgákara bûgîtangatangaga kuuma nyomba îmwe mwanka îngî.

⁸Rîrîa bûgakûrûka ntûûreene na bûgwatwe ûgeni, rîjageni kîrîa bakabûrûmia.

⁹Oragieni barîa baajîtue na bûbeerage, ‘Ûnene bwa Mûrungu bûkwîja akuî naabuî.’

¹⁰ Îndî bwakûrûka ntûûra na, yarega kûbûgwata ûgenî, îtanieni na njîra ciaayo bûkiugaga,

¹¹‘Kinya tîîri ya ntûûra yeenu îrîa îkûgwete magûrû jeetû tûkûmîringaringa nîkenda îkaa ûkûûjî kîrî buî na îbûgambithie. Îndî amwe na bûu, menyeni atî Ûnene bwa Mûrungu bûrî akuî kwîja!’

¹² Ndîbwîra na mma atîrî, ntûkû îrîa Mûrungu akagambithia antû, akaigîîrua ntûûra ya Sodomu kîaao nkûrûki ya ntûûra îîu.”

¹³ “Wûûi kîrî gwe Korazini! Wûûi kîrî gwe Bethisaida! Këethîra biama birîa biaringîrwe kîrî buî nî biaringîrwe Tiro na Sidoni, antû bau barîngî kwîthîrwa bairirîre tene, bekîrîte mathango na baciakîte mûju.

¹⁴Îndî ntukû ya îgamba yakinya Mûrungu akaigîrua ntûûra ya Tiro na Sidoni kîaao nkûrûki ya baabuî.

¹⁵ Naagwe Kaperinaumu ka ûgûciimbaimbia ûkîthûgaanagia ûgakumua mwanka îgûrû? Ûkageerwa mwankiine jwa kenya na kenya.”

¹⁶ Jesû areera aritwa baawe atîrî, “Muntû wonthe ûrîa ûkabûthikîîra, nî ni akûthikîîra. Ningî muntû ûrîa ûkabûrega nî ni akûrega, na ûrîa ûkandega, nî ûrîa waantûmîre akûrega.”

¹⁷Aritwa barîa mîrongo mûgwanja na baîrî nî baacokere bagwîrîtue mono bakiugaga, “Mwathani, kinya roho inthûûku nî iratwathîkîîre rîrîa tûraciîngîre tûgîtumagîra riîtwa rîaaku.”

¹⁸Jesû arabeera, “Nî ndîronere Nkoma akîgwa ta rweni kuuma îgûrû.

¹⁹ Nî mbûeete inya ya gûkinyanga njoka na tûng'aurî, na ndaabûaa inya ya gûciinda mainya jonthe ya mûnthû. Gûtî gîntû kinya kîrîkû gîkabwîkîra ngûma.

²⁰Îndî amwe na bûu bûkagwîrueni nîûntû roho inthûûku nî ikûbwathîkîra, îndî gwîrueni nîûntû mariîtwa jeenu nî jaandîki îgûrû.”

²¹Kagiiita o kau Jesû oojûrîtwe nî Roho Ûmûtheru, aragwîrua na arauga, “Nî ngûgûcokeria nkaatho gwe Baaba, Mwathani wa îgûrû na nthî, nîkwîthîrwa nî withîte mantû jaja jatîkamenyekane nî barîa boome na barîa boombaga gûciûra mantû, na wajaguûrîra nkenke. Baaba, ûu nîu weendaga gûkarîke.

²² “Nî nenkeri into bionthe nî Baaba. Gûtî we wiijî Mûtaana nûû tiga Îthe, na gûtî we wiijî Îthe nûû tiga Mûtaana na barîa mûtaana amenyithagia Îthe nûû.”

²³Rîu araraithîria aritwa baawe na arabeera barî bonka, “Buî nî bûtharimi nîûntû bwa kwona mantû jarîa bûkwona!

²⁴Nî mma iroria na anene babaingî nî beendeete kwona mantû jarîa bûkwona, îndî bataajonere, na nî beendeete kwigua mantû jarîa bûkwigua, îndî batajaigîrue.”

²⁵ Mûritani ûmwe wa Waatho nî aairitîre na arooria Jesû kîûria gîkî akîmûgeria, “Mûritani, nîatîa mbuîri kûthithia nîkenda mbona ûtûûro bwa kenya na kenya?”

²⁶Jesû aramûûria, “Maandîko jaugaga atîa? Wajathoma wigagua jakiuga atîa?”

²⁷ Nawe arauga atîrî, “Endaga Mwathani Mûrungu waaku na nkoro yaaku yonthe, na mwoyo jwaaku junthe, na inya yaaku yonthe, na mathûgaanio jaaku jonthe. Ningî weende mûtûûri waaku o ta ûrîa ûciendeete gwengwa.”

²⁸ Jesû aramwîra, “Ûgûcokia ûrîa kwagîrîte. Thithagia ûu, na ûgatûûra.”

²⁹Îndî akîenda gûcieethia ûmwega arooria Jesû, “A mûtûûri waakwa nûû?”

³⁰Jesû aramûcokeria, “Kûrî muntû ûmwe weenamîte Jeriko, aumîte Jerusalemu. Nî aatirimanîre na aamba, nabo baramûrita nguû na baramûtutuma na baramûtuunya into bionthe birîa aarî nabio, na baramûtiga arî akuî gûkua.

³¹Mûthînjîri-Mûrungu ûmwe nî eenamîrîte njîreene îîu, na akûmwona arakûrûkîîra rûteere rûrîa rûngî rwa njîra.

³²Ningî o ûu Mûlawi ûmwe nî eenamîrîte njîreene îîu, na agûkinya au muntû ûu aarî, aramûtega îndî arakûrûkîîra rûteere rûrîa rûngî rwa njîra.

³³ Îndî Mûsamaria ûmwe arî rûgendoone, agûkinya au muntû ûu aarî nî aamwonere na aramwigîîrua kîaao.

³⁴Nî eetîre arîa aarî na areetûrîria ironda maguta na ndibei na arabioga na itambaa. Rîu aramwitithia ntigiriine na aramwikia mûkaweene, na aramûmenyeera.

³⁵Rûûneene Mûsamaria ûu aranenkera mwene mûkawa denari ijîîrî na aramwîra, ‘Menyagîîra muntû ûûjû, na akeeja gûtumîra mbeecha inyingî nkûrûki ya iu, ngakûrîaa ngîcoka.’”

³⁶Jesû arooria mûritani ûu atîrî, “Nî ûrîkû kîrî antû bau bo-bathatû woonanîrie arî mûtûûri wa muntû ûu waaûri nî aamba?”

³⁷Mûritani ûu wa Waatho aramûcokeria, “Nî muntû ûrîa waamwigîîrue kîaao.” Jesû aramwîra, “Îta na ûthithagie o ta ûu.”

³⁸ Rîrîa Jesû na aritwa baawe beetîte ntûûreene îmwe, Mariitha nî aamûgwatîre ûgeni nyomba yaawe.

³⁹Mariitha nî aarî na mwarî wa ng'ina weetagwa Maria. Nawe Maria arakara nthî akuî na magûrû ja Jesû amûthikîîrîtie akîritana.

⁴⁰Îndî Mariitha nî aithangîîkagia na ngûgî cionthe cia kûmathîra ageni. Rîu areeta kîrî Jesû na aramwîra, “Mwathani, ka ûtîkûûria woona mwarî wa chiaa antiganîritie maathîra ageni ndî ninka? Mwîre eeje anteethie.”

⁴¹Îndî Mwathani aramûcokeria atîrî, “Mariitha, Mariitha, nî winogeetie na waithangîkia na mantû jamaingî.

⁴²Nî ûntû bûmwe bunka bûrî na bata, na Maria nî aithuurîre ûntû bûu na atîûmba gûtunywa bu.”