Read KIMERU BIBLE PROTESTANT EDITION Luk 11 Bible Online

Luk 11 - KIMERU BIBLE PROTESTANT EDITION bible

Luk 11

¹Ntukû îmwe Jesû nî aarombaga arî antû ana. Aathiria kûromba, ûmwe wa aritwa baawe aramwîra, “Mwathani, tûritane kûromba o ta ûrîa Johana aaritanîre aritwa baawe.”

²Jesû arabeera, “Rîrîa bûkûromba, rombageeni ûjû: Baaba, riîtwa rîaaku rîathûrwe; ûnene bwaaku bwîje.

³O ntukû tweejage biakûrîa bia kûng'ana;

⁴na ûtûrekagîre meeyia jeetû, nîûntû kinya tuî nî tûrekagîra barîa batwîagîria; ûkáreka tûgwa magerioone.”

⁵Rîu Jesû arabeera, “Nî ûrîkû weenû ûtîîta kîrî mûcoore ûtukû gatîgatî na amwîra, ‘Mûcoore, mpa mîgaate îthatû,

⁶nîûntû kûrî mûcoore waakwa waakinya gwaakwa arî rûgendoone na gûtî biakûrîa ndî nabio bia arîa.’

⁷A mûcoore ûu arî nyomba agacokia, ‘Ûkánthangîkia! Tontû nî mpiingîre mûrango na ûûni na aana baakwa nî tûmamîre. Ntîûmba gûûkîra nkûnenkera gantû kinya kamwe!’

⁸Ndîbwîra atîrî, kinya akarega gûûkîîra aamûnenkera kîrîa akwenda nîûntû nî mûcoore waawe, aagokîîra amûnenkere bionthe birîa akwenda, nîûntû muntû ûu atiigua nthoni cia gûkara agîîtanaga.

⁹Tontû bûû, ndîbwîra, rombeni na bûkaewa, cweeni na bûkoona, ringaringeni mwari na bûkarugûrîrwa.

¹⁰Tontû muntû wonthe ûrîa ûrombaga nî aejagwa, na wonthe ûrîa ûcwaga nî oonaga, na wonthe ûrîa ûringaringaga mwari nî arugûragîrwa.

¹¹Nî mûciari ûrîkû kîrî buî wîîtagua gîkûyû nî mwana waawe na akamûnenkera njoka?

¹²Kana ageetia nkara ûkamûnenkera kang'aurî?

¹³Këethîra buî bûnari antû babaaî nî bwijî kwaa aana beenu biewa bibiega, nîatîa Baaba ûrîa ûrî îgûrû akaa barîa bamûrombaga Roho Ûmûtheru bûng'ana!”

¹⁴Ntukû îmwe Jesû nî eengaga roho înthûûku îrîa yaatûmîte muntû ûmwe ethîrwa arî maamu. Rîrîa roho îîu yaumîre kîrî muntû ûu, araambîrîria kwaria na antû bararigara mono.

¹⁵ Îndî antû bamwe barauga, “Engaga roho inthûûku agîtumagîra inya ya Beelizebuli, mûnene wa roho inthûûku.”

¹⁶ Bangî bakîenda kûmûgeria, nî baamwîrîre aringe kîama gîa kwonania arîtumîra inya kuuma kîrî Mûrungu.

¹⁷Îndî akûmenya ûrîa baathûgaania arabeera, “Ûnene o bûrîkû bûkëethîrwa bûgaûkeene ikundi ikundi bikîrûjaga biongwa bûtîûmba gûtûûra. Kinya mûciî jûrîa jûtî ngwatanîro nîka jwaraganaga.

¹⁸Ûnene bwa Nkoma bûkëethîrwa bûgaûkanîte nîatîa bûûmba gûtûûra? Atî buugaga mpîngaga roho inthûûku ngîtumagîra inya ya Beelizebuli?

¹⁹Këethîra mpîngaga roho inthûûku ngîtumagîra inya ya Beelizebuli rî, ataana beenu baciîngaga bagîtumagîra inya yaaû? Tontû bûû, ataana bau beenu nîbo bakabûgambithia.

²⁰Îndî nkëethîrwa mpîngaga roho inthûûku ngîtumagîra inya ya Mûrungu, bûmenye Ûnene bwa Mûrungu bûgûkinya kîrî buî.

²¹Rîrîa nchamba îjûkagia mathaga ja ndwaa na îgakaria nja yaayo, into biaayo nî biîthagîrwa birî kiindajî.

²²Îndî nchamba îngî îkîrîtie îrîa ya mbere înya, îkamiithûkîra ka îjûkagia mathaga ja ndwaa jarîa îîu îngî îgwikarîtie najo na îgataa înto biaayo bionthe.

²³ Muntû ûrîa ûtî kîmwe naani nî mûnthû waakwa; na o ûrîa ûtîngwatagia kûûthûrania nîka anyagagia.

²⁴“Rîrîa roho înthûûku yuumaga kîrî muntû, îriûngaga gûntû gûtî rûûjî îgîcwaga arîa yuurûka. Yaaga antû a kuurûka îkauga: ‘Ngacoka nyomba yaakwa îrîa ndaumîre.’

²⁵Rîrîa yacoka îkeethîra nyomba yeegeri na îthuranîri bwega.

²⁶Rîu îgeeta îgacwaa roho ingî mûgwanja inthûûku nkûrûki yaayo, nacio cionthe igatonya kîrî muntû ûu na igakara kîrî we. Tontû bûû, mûkariî jwa muntû ûu jûkaa jûmûûî nkûrûki ya ûrîa jwakari mbere.”

²⁷O akîaragia mantû jau, mwekûrû ûmwe kuuma ntunduune araaria na kajû gakanene na arauga, “Mwekûrû ûrîa waagûciarîre na akûrera nî atharimi.”

²⁸Îndî Jesû aramûcokeria atîrî, “Barîa baigagua rûteto rwa Mûrungu na bakarwathîkîra nî batharimi nkûrûki ya ûu.”

²⁹ Rîrîa antû babaingî boothûûranîre arîa Jesû aarî nî aabeerîre, “Nthukî îîjî nî închebûku. Îcwaga kwonua kîama, îndî gûtî kîama îkoonua tiga kîama ta kîrîa kîa Jona.

³⁰ O ta ûrîa Jona aaere kîama kîrî antû ba Nineve, o ûu nîu Mûtaana wa Muntû akaa kîama kîrî nthukî îîjî.

³¹ Mûka-mûnene wa nthîgûrû ya Sheba akariûkua ntukû ya îgamba na agambithie antû ba nthukî îîjî. Nîkwîthîrwa nî aumîre kûraaja mono areeta kwigua ûûme bwa Solomoni. Rîu kûrî ûmwe aja ûmûnene nkûrûki ya Solomoni.

³² Rîrîa antû ba nthukî îîjî bakagambithua, antû ba Nineve bakaumîra barite ûkûûjî atî nthukî îîjî nî îthûûkîtie. Antû ba Nineve bakaumîra nîûntû nî baairirîre Jona agûtûmîîria. Rîu kûrî ûmwe aja ûmûnene nkûrûki ya Jona.

³³“Gûtî muntû ûgwatagia taawa na amîîka rungu kana amîkunîkîra, îndî nîka amîîkaga arîa îkamûrîkîra barîa bagûtonya nyomba.

³⁴Riitho nî taawa ya mwîrî jwaaku. Riitho rîaaku rîkeethîrwa rîkîonaga bwega, mwîrî jwaaku junthe jwîthagîrwa jûrî weerûûne. Rîrîa riitho rîaaku rîtîbui, mwîrî jwaaku junthe jwîthagîrwa jûrî muunduune.

³⁵Tontû bûû, menyagîîreeni weerû bûrîa bûrî ndeene yeenu bûtîkae muundu.

³⁶Mwîrî jwaaku jûkëethîrwa jûûjûûri weeru na gûtî o jûrî na muundu, mwîrî jwaaku jûkathaara bwega buru, o ta ûrîa taawa îthaaraga.”

³⁷Jesû akûthiria kwaria, Mûfarisayo ûmwe nî aamûûrîrie eete akarîe biakûrîa kwaawe. Agwîta arakara nthî kûrîa.

³⁸Mûfarisayo ûu nî aarigarîre mono akwona atî Jesû ataathambîre njara mbere ya kûrîa.

³⁹Rîu Mwathani aramwîra, “Buî Afarisayo bûthambagia gîkombe na thaani bwa oome, îndî ndeene bûûjûrî ûtuunyani na ûthûûku.

⁴⁰Buî bûrî biaa! Anga ûrîa wathithîrie bwa oome tîwe wathithîrie bwa ndeene?

⁴¹Îndî teethagieni nkîa na birîa bûrî nabio, na into bionthe bikaa bibitheru kîrî buî.

⁴² “Wûûi kîrî buî Afarisayo! Nîkwîthîrwa bûritagîra Mûrungu gîchunchî kîmwe kuuma kîrî îkûmi kîa twinto tûrîa twîkagîra irîo mûchemo, ta itûngûrû na ndania na chini îndî bûtîendaga kûthithia mantû ja îota kana kwenda Mûrungu. Nî bwagîrîte bûthithagia mantû jau bûthithagia îndî bûkárega kûthithia jau jangî.

⁴³Wûûi kîrî buî Afarisayo! Tontû bwendaga gûkarîra îtî birîa bieega buru kîromberoone na bûkeenda gûkeethagua na gîtîîo thokoone.

⁴⁴Wûûi kîrî buî! Tontû bûkari ta tûburi tûrîa tûtîonagwa, na antû betagîîra îgûrû rîaatu batîkûmenya.”

⁴⁵Ûmwe wa aritani ba Waatho aramwîra, “Mûritani, wauga ûu, kinya tuî nîka ûgûtûruma.”

⁴⁶Jesû arauga, “Wûûi kinya buî aritani ba Waatho, tontû bûkamatithagia antû mîrigo îmîrito mono, îndî buî bûtîbateethagia gûkamata.

⁴⁷Wûûi kîrî buî! Tontû bwakaga tûburi twa iroria birîa biûjûjû bieenu bioragîre.

⁴⁸Rîrîa bûkûthithia ûu nîka bûgwîtikania na ûrîa biûjûjû bieenu biathithîrie. Nîkwîthîrwa booragîre iroria naabuî bûraaka tûburi.

⁴⁹Nîkwîthîrwa Mûrungu agîtumagîra ûûme bwaawe nî augîre, ‘Nkabatûmîra iroria na atûmwa, na bûkooraga bamwe baao na bûthangîkie bangî.’

⁵⁰Tontû bûû, nthukî îîjî îgaakanûkua nîûntû bwa iroria bionthe birîa bioragîrwe kuuma nthîgûrû îkûûmbwa.

⁵¹ Bakaambîria gûkanûkîrua gîkuû kîa Abeli mwanka kîa Zekaria ûrîa wooragîîrwe gatîgatî ka kîritîro kîa igongwana na kîûrû. Ga nkûbwîra na mma atî nthukî îîjî îgakanûkua nîûntû bwa mathithio jau jonthe.

⁵²Wûûi kîrî buî aritani ba Waatho! Tontû nî bwithîte rûbungûro rwa kûrugûra mûrango jwa ûmenyo. Buî bûtîkûrûkaga ku, na bûrigagîîria barîa bakwenda gûtonya ku.”

⁵³Rîrîa aumîte antû au, aritani ba Waatho na Afarisayo nî baamûûrîrie biûria bibingî bathûûri bagîcwaa auga mantû jamaingî,

⁵⁴nîkenda boona ûntû bûbûthûûku bwa kûmûthitangîra.