Read KIMERU BIBLE PROTESTANT EDITION Luk 12 Bible Online

Luk 12 - KIMERU BIBLE PROTESTANT EDITION bible

Luk 12

¹ Kûrî îgiita rîmwe antû ngiri inyingî boothûranîre amwe mwanka baraambîrîria gûkinyangana. Rîu Jesû areera aritwa baawe ûjû, “Imenyagîîreni mûtheega jwa kwimbithia mîgaate jwa Afarisayo. Mûtheega jûu nî ûciayia.

² Gûtî gîntû gîkunîkîri gîtîkûnûrwa, kana witho bûtîmenyekana.

³Tontû bûû, ûntû bunthe bûrîa bwaragîria muunduune bûkaumîrua weerûûne, na ûntû bunthe bûrîa bwaragia na kîoe bûrî bwinka, bûgatûmîîrua bwigîîgue nî antû bonthe.”

⁴Jesû areeta na mbere kûbeera, “Acoore baakwa, bûgákîra barîa boraaga mwîrî, îndî gûtî ûngî boomba kûthithia.

⁵Îndî ka mbwîre ûrîa bûbuîri gûkîraga: kîrageni ûrîa ûûraga mwîrî, na aathiria kûjûûraga, arî na inya ya kûjûgera mwankiine jwa kenya na kenya. Ga nkûbwîra na mma atîrî, ûu nîwe bûbuîri gûkîraga.

⁶Ka nyoni ithaano itîgûragwa na mbeecha inkai? Mûrungu atîûragîrua nî kinya îmwe yaacio.

⁷Mûrungu nî aijî îtari rîa mîtuundu yeenu. Tontû bûû, bûgákîra nîkwîthîrwa bûrî ba gîtûmi nkûrûki ya nyoni inyingî.”

⁸“Ndîbwîra na mma atî, muntû wonthe ûrîa ûgankûûjîîra mbere ya antû, kinya Mûtaana wa Muntû akamûkûûjîîra mbere ya araîka ba Mûrungu.

⁹Îndî ûrîa ûgankaana mbere ya antû, kinya ni nkamûkaana mbere ya araîka ba Mûrungu.

¹⁰ Muntû kinya ûrîkû ûrîa ûkaaria mantû jatîagîrîte jegiî Mûtaana wa Muntû akarekerwa; îndî ûrîa ûkaaria mantû jatîagîrîte jegiî Roho Ûmûtheru atîrekerwa.

¹¹Rîrîa bakabwikia kûbûgambithia iromberoone kana kîrî anene kana kîrî athani, bûkaithangîkieni bûkîuragia ûrîa bûgacokia kana ûrîa bûkauga.

¹² Tontû Roho Ûmûtheru akabûritana ûrîa bûkaaria kagiiteene kau.”

¹³Ûmwe kuuma kîrî kîrîndî kîu kîothûranîte aramwîra, “Mûritani, îîra mûtaana wa chiaa angaîre into birîa baaba atûtigîîre agîkua.”

¹⁴Îndî Jesû aramûûria, “Mûcoore! Nûû ûmpethetie mûgiiti wa îgamba rîeenu kana mûbûgaîri into bieenu?”

¹⁵Rîu Jesû aareera antû bonthe, “Imenyagîîreni bûtîkagîe na ûkîa bwa into no birîkû; nîkwîthîrwa muntû atîûmba gûtûûrua mwoyo nî wingî bwa ûtonga bûrîa arî nabu.”

¹⁶Ningî arabaa ngerekano îîjî, “Kûrî îgiita muntû ûmwe arîmîre muunda na jûraciara irîo bibingî mono.

¹⁷Nawe arathûgaania na araciûria, ‘Nîatîa nkathithia nîûntû ntî na a gwîka maketha jaakwa?’

¹⁸Ningî araciîra atîrî, ‘Nkaathithia ûjû: ndîtharia nchuku ciaakwa cionthe na mbake ingî inene. Rîu mbîke irîo na into biaakwa bingî ku.

¹⁹Ncoke nciîre atîrî, Ûrî na into bibingî biakûrîa mîaka îmiingî. Nogoka, na ûrîe na ûnyûe na ûgwîrue.’

²⁰Îndî Mûrungu areera gîtonga kîu, ‘Ûrî kîaa, ûtukû bûbû ûgaakua! Into bibi ûrî nabio bikaa biaaû?’”

²¹Jesû akîthiria arauga, “O ûu nîu gûgakara kîrî muntû ûrîa ûciûthûranagîria ûtonga, îndî tî gîtonga mbere ya Mûrungu.”

²²Jesû areera aritwa baawe, “Tontû bûû, ndîbwîra atîrî, bûkáithangîkia bûkîûragia bûgatûûra atîa kana bûkarîa mbi kana bûgeekîra mbi.

²³Nîkwîthîrwa ûtûûro bûrî gîtûmi nkûrûki ya biakûrîa, na mwîrî jûrî gîtûmi nkûrûki ya nguû.

²⁴Raithîrieni nyoni: itîaandaga kana îketha, na îtî nchuku, îndî amwe na bûu, Mûrungu nî areraga nyoni iu. Buî bûrî ba gîtûmi gîkînene nkûrûki ya nyoni!

²⁵Nî ûrîkû weenu ûûmba gûciongeera ntukû îmwe kîrî ûtûûro bwaawe nîûntû bwa ûrîa aithangîkîtie?

²⁶Rîu këethîra buî bûtîûmba kûthithia gantû kaniini ta kau rî, nîmbi îtûmaga bwithangîkia na mantû jau jangî?

²⁷ Raithîrieni ûrîa maûa jaumaga. Jatîritaga ngûgî kana jatuma nguû. Îndî ndîbwîra kinya Solomoni ûrîa waarî na mwago jûmûnene ateekîra nguû inthongi ta îuwa rîmwe rîa jau.

²⁸Këethîra Mûrungu nî athongomagia matî ja kîthaka, jarîa jaumaga naarua na rûûjû jakooma rî, agatûma bwîkîra nguû inthongi atîa, îbuî antû ba wîtîkio bûbûkai!

²⁹Bûkaithangîkieni bûgîciûragia nîmbi bûkaarîa kana bûnyua.

³⁰Nîkwîthîrwa mîgongo îngî yonthe ithangîkagîria mantû jau; îndî Abaagu weenu nî aijî kîrîa bûrî na ûbatu bwaakîo.

³¹Îndî buî ambeeni bûcwee Ûnene bwa Mûrungu na akabûaa into biu bingî bionthe bûrî na ûbatu bwaabio.

³²“Bûgakîreni buî antû babakai, nîûntû Abaagu weenu nî oonete kwagîrîte kûbûnenkera Ûnene.

³³Endieni into bieenu bionthe na bûteethagie nkîa. Îkageni ûtonga bweenu Îgûrû arîa aamba batîûmba kwiya kana bûthûkangua nî nungu.

³⁴Nîkwîthîrwa arîa ûtonga bwaaku bûrî, nîo kinya nkoro yaaku îkeethîrwa îrî.

³⁵ “Karageni bwithuranîrîte na bûkarage na taawa cieenu îgîakanaga,

³⁶ bûkare ta nthûûmba cietereete mûnene waacio aumîte kîathoone kîa mûranû. Nîkenda rîrîa akaringaringa bamûrugûrîra ntûti.

³⁷Nthûûmba irîa mûnene akeethîra itîmami rîrîa agacoka, nî itharimi. Ndîbwîra na mma atî mûnene ûu akaithuranîra na arîjanîrie biakûrîa nacio.

³⁸Akëeja kwîja ûtukû gatîgatî, kana nchamba ya ngûkû îkîgamba na akethîra itîmami, nthûûmba iu nî intharime.

³⁹ Îndî menyeni atî, këethîra mwene nyomba nî ethagîrwa aijî thaa irîa mwamba akeeja, atîreka nyomba yaawe yuunwa.

⁴⁰Kinya buî karageni bwithuranîrîte, tontû Mûtaana wa Muntû akeeja rîrîa bûtîmwîrîgîrîte.”

⁴¹Peterû aramwîra, “Mwathani, nî tuî ûkwaa ngerekano îîjî kana nî antû bonthe?”

⁴²Jesû arauga, “Nthûûmba ya gwîtîkua na înjûme nî îrîa mwathi waayo anenkagîra mûciî jwaawe îjûmenyeera na îejaga antû barîa barî ku irio thaa irîa ciagîrîte.

⁴³Nthûûmba îrîa îkeethîrwa îkîthithagia ûu rîrîa mwathi waayo akeeja nî îtharimi.

⁴⁴Nî mma akaethia nthûûmba îîu mûrûngamîîri wa into biaawe bionthe.

⁴⁵Îndî nthûûmba îîu îkëeja gûciîra yongwa, ‘Mwathi waakwa agakara îgiita rîrîraaja atîracoka,’ na îkaambîrîria kûûra nthûûmba irîa ingî na kûrîa na kûnyua na kwogita,

⁴⁶mwathi waayo agacoka rîrîa îtîmwîrîgîrîte na amîkanûkie na amîgere kûrîa barîa batîathîkaga bageragwa.

⁴⁷Îndî nthûûmba îrîa ijî ûrîa mwathi waayo eendaga îndî îkeethîrwa îtithuranîrîte na îtîthithîtie ûrîa mwathi waayo endaga, nthûûmba îîu îkaûûrwa ibooko bibingî.

⁴⁸Îndî nthûûmba îrîa îtaamenyere ûrîa mwathi waayo eendaga, na îrathithia mantû jatîbui îkaûûrwa ibooko bibikai. O muntû ûrîa weei na wingî, nîu akeerîgîrwa kwejana na wingî; na muntû ûrîa weei na wingî nkûrûki, nîu akeerîgîrwa kweejana na wingî nkûrûki.

⁴⁹“Ndeejîre kûmuntia nthîgûrû mwanki na ndîngîgwîrua mono kwîthîra mwanki jûu jwambîrîtie gwakana!

⁵⁰ Nî mbeteereete kûbatithua na nî nkûthangîka mono mwanka rîrîa ntukû ya kûbatithua kûu îgakûrûka.

⁵¹Bûrîthûgaania mbîjîte kûreeta thîîrî nthîgûrû? Ndîbwîra, nteejîre kûreeta thîîrî nthîgûrû, îndî ndeejîre gûtûma antû baathûkana.

⁵²Kwambîrîria nandî antû bataano ba mûciî jûmwe bakaathûkana; bathatû bagwatanîre bambîrîrie kûrwaa na bau bangî baîrî na bau baîrî barwee na bau bangî bathatû.

⁵³ Îthe akarwaa na mûtaana waawe na mûtaana arwee na îthe; ng'ina akarwaa na mwarî waawe na mwarî arwee na ng'ina; ng'ina wa nthaka akarwaa na mûka wa mûtaana waawe na mûka wa mûtaana arwee na ng'ina wa nthaka.”

⁵⁴Ningî Jesû areera kîrîndî, “Rîrîa bwonaga matu jaumîte bwa rûgûrû buugaga, ‘Ngai îkaura,’ na nî mma îkaura.

⁵⁵Rîrîa ruuo rurutanaga kuuma bwa ûmotho buugaga, ‘No mwanka kware mono,’ na gûgakara u.

⁵⁶Îbuî aciayia baba! Buî nî bwîjî gûciûra ûrîa gûgakara bwaraithîîria ûrîa matu na nthî îkwonekana îkari. Nîmbi îndî îkûgiria bûûmba gûciûra mantû jarîa jagûkarîka îgiiteene rîrî?”

⁵⁷“Nîmbi îgiragia bûmenya mantû ja mma, jarîa jaagîrîte kûthithagua?

⁵⁸Gûkëethîrwa kûrî muntû ûkûthitangîte, bwabua bûkaiganua na bûkathiria mantû mbere ya bûkinya kootini. Bûkëeja gûkinya kootini ûkagiitîrwa îgamba na asikarî bagwîkie ncheera.

⁵⁹Ndîkwîra na mma ûtiuma ncheera mwanka rîrîa ûkarîa baini îrîa ûrîngî yonthe.”