Read KIMERU BIBLE PROTESTANT EDITION Luk 14 Bible Online

Luk 14 - KIMERU BIBLE PROTESTANT EDITION bible

Luk 14

¹Ntukû îmwe ya sabatû Jesû nî eetîre kûrîa biakûrîa kwa mûtongeeria ûmwe waarî wa gîkundi kîa Afarisayo na antû nî baamûtegeete boona ûrîa akathithia.

²Au mbere yaawe nî kwaarî na muntû ûmwe waarî na mûrimo jwa kwimba mwîrî.

³Jesû araarîria aritani ba Waatho na Afarisayo na arabooria atîrî, “Waatho nî bûgwîtîkîîria muntû oorua ntukû ya sabatû kana bûtîgwîtîkîîria?”

⁴Îndî barakira ki. Rîu Jesû arooria muntû ûu waajîtue na aramwîra aciîtîre.

⁵ Rîu arabooria, “Mwana weenu kana ndeegwa yeenu îkëeja kûgwa îrinyeene ntukû ya sabatû rî, nûû weenu, ûtîîta kûmîrita na mpwîî o ntukû îîu?”

⁶Nabo batoombîre gûcokia kîûria kîu.

⁷Jesû akwona ûrîa barîa beeti kîathoone baathuuraga itî birîa biarî bia antû ba îgweta, nî aabaeere ngerekano îîjî,

⁸ “Rîrîa ûgeetwa mûranûûne ûgákarîra itî birîa biîkîri antû barî îgweta. Nîkwîthîrwa muntû ûngî ûrî na îgweta nkûrûki yaaku oomba kwîthîrwa eeti mûranûûne jûu,

⁹na ûrîa ûkûbwîtîte eeja akwîra, ‘Aa muntû ûûjû kaanya akare nthî.’ Rîu ûkaigua nthoni ûgîîta gûcwaa gîtî nau mûthia ûkarîra.

¹⁰Îndî rîrîa ûgeetwa kîathoone, weeta karîra gîtî kîrîa gîîkîri barîa batî îgweta nau mûthia nîkenda rîrîa ûrîa ûgwîtîte akeeja, akwîre, ‘Mûcoore, njûû aja mbere! Rîu ûkoona îgweta mbere ya barîa bangî bûgûkari nthî nabo meetheene.

¹¹ Nîkwîthîrwa muntû ûrîa wineneagia akanyiiua na ûrîa wiinyiiagia akaneneua.’”

¹²Ningî areera kinya muntû ûrîa waamwîtîte kîathoone atîrî, “Watua gwîta antû kîathoone, ûgéeta acoore baaku kana antû beenu kana itonga, birîa biûmba gûgwîta kîathoone kinya bio.

¹³Îndî rîrîa ûkwenda gwîtana kîathoone, îtaga nkîa na ithua na bionje na atumuumu,

¹⁴naagwe ûkaatharimwa, nîûntû batîûmba gûkûrîaa. Gwe ûkarîwa rîrîa barîa baagîru bakariûka.”

¹⁵Rîrîa muntû ûmwe wa barîa baarîjaga biakûrîa nawe aigîrue ûu, aramwîra atîrî, “Nî atharimi muntû ûrîa ûkarîa biakûrîa Ûneneene bwa Mûrungu!”

¹⁶Îndî Jesû aramwîra, “Îgiita rîmwe kûrî muntû ûmwe wathithîrie kîatho na areeta antû babaingî mono.

¹⁷Ntukû ya kîatho îgûkinya nî aatûmîre nthûûmba yaawe îkeere bonthe barîa beeti, ‘Beete kîathoone nîûntû biakûrîa nî biîte.’

¹⁸Îndî antû barîa beeti bonthe baraeejana itûmi biaao birîa biabarigîrîrie gwîta kîathoone. Muntû ûmwe arauga, ‘Nî ndîragûrîre kîthaka na no mwanka mpambe mbîte ngakîone. Itû ndakwerenca ûmwîre andekere.’

¹⁹Ûngî arauga, ‘Nî ndîragûrîre ndeegwa îkûmi cia mûraû, na ka mbîtîte gûtega ûrîa ikûrîma. Itû ndakwerenca ûmwîre andekere.’

²⁰Ningî ûngî arauga, ‘Nî ndîragûranîre. Tontû bûû, ntîûmba kwîja.’

²¹Tontû bûû, nthûûmba îracoka na îreera mwathi waayo ûrîa antû bau baugîre. Rîu mwathi ûu arathûûra na aramîîra atîrî, ‘Îtania na njîra cionthe cia ntûûra na mpwîî na wîîre nkîa na bionje na atumuumu na ithua biîje.’

²²Nyuma ya kagiita gagakai nthûûmba îramwîra, ‘Mwathi waakwa, nkûthithia ûrîa ûkuugîîte na kinya nandî kûrî na kaanya ka antû bangî.’

²³Tontû bûû, mwathi ûu areera nthûûmba yaawe atîrî, ‘Îtania na njîra cionthe kaîrî na wîîre antû beeje mwanka nyomba yûjûre ndo.

²⁴Nîkwîthîrwa ndîbwîra atî gûtî kinya ûmwe wa barîa beetî kîathoone ûgacema biakûrîa biaakwa.’”

²⁵Îgiita rîmwe antû babaingî mono nî beetanîtie na Jesû. Nawe ararûngama na arabaraithîîria na arabeera,

²⁶ “Muntû ûrîa ûkwenda kûnthingata, no mwanka ampende nkûrûki ya ûrîa endete îthe na ng'ina, na mwekûrû waawe, na twaana twaawe, na ataana ba ng'ina, na aarî ba ng'ina; ningî no mwanka ampende nkûrûki ya ûrîa aciendeete wengwa.

²⁷ Muntû wonthe ûrîa ûtîjûkagia mûtharaba jwaawe na anthingata atîûmba kwaa mûritwa waakwa.

²⁸Nî muntû ûrîkû kîrî buî akîendaga gwaka nyomba ûtîambaga gûtara into na ûgûri bwaabio nîkenda oona këethîra arî na mbeecha cia kûûjûria nyomba îîu?

²⁹Akarega kûthithia ûu, akaambîrîria kûmîaka na eekîre mûsingi îndî aremwe kûmîûjûria. Antû bonthe barîa bakamîonaga bagatua kûmûthekagîra bakiugaga,

³⁰‘Muntû ûûjû aambîrîrie gwaka, na araremwa kûûjûria nyomba.’

³¹Kana nî mûnene ûrîkû arî na asikarî ngiri îkûmi, ûtîambaga gûkara nthî na athûgaania bwega mbere ya aithûkîrwa nî mûnene ûngî ûrî na asikarî ngiri mîrongo îîrî?

³²Akëeja kwona atîûmba kûrwaa nawe nîka agatûmîra mûnene ûu ûngî antû ba kûromba thîîrî mbere ya njûûrî yaawe îkinya.

³³Tontû bûû, muntû ûrîa ûkwenda kwa mûritwa waakwa no mwanka atige into birîa arî nabio bionthe.

³⁴“Chumbî nî înjega, îndî îkëeja kwaga mûchemo rî, nîatîa yûûmba gwîkîrwa mûchemo kaîrî?

³⁵Yagîre mûchemo nî ya ûtherî îrî mûthetuune kana kinya mboreoone. Nîka îteejagwa. Muntû ûrîa ûrî na matû ja kwigua, nî aigue.”