Read KIMERU BIBLE PROTESTANT EDITION Luk 15 Bible Online

Luk 15 - KIMERU BIBLE PROTESTANT EDITION bible

Luk 15

¹ Ntukû îmwe aritithia ûgoti na eeyia babaingî nî beetîre kîrî Jesû nîkenda bamûthikîîra.

²Afarisayo na aritani ba Waatho baranung'una bakiugaga, “Muntû ûûjû nî agwataga eeyia ûgeni na akarîjanîra nabo.”

³Tontû bûû, Jesû arabaa ngerekano îîjî:

⁴“Nî muntû ûrîkû kîrî buî wîthîrîkua arî na ng'ondu îgana, na îmwe yaacio îkaûra, ûtîtiga iu ingî mîrongo kenda na kenda bûûrîîne, na eeta gûcwaa îrîa yûûrîte mwanka rîrîa akaamîona?

⁵Rîrîa akamîona amîîkîra ituro agwîrîtue,

⁶na akamîaania. Rîu ageeta acoore na atûûri baawe na akabeera, ‘Gwîrueni amwe naani, nîûntû ndîkwona ng'ondu yaakwa îrîa îkûûrîte.’

⁷Ndîbwîra, o ûu nîu gûkeethîrwa kûrî na kûgwîrua gûkwingî îgûrû rîrîa mwîyia ûmwe akairira, nkûrûki ya kwîthîrwa kûrî na antû mîrongo kenda na kenda ku babaagîru na batî na bata ya kwirira.

⁸“Kana nî mwekûrû ûrîkû arî na ciringi îkûmi cia fetha, na îmwe yaacio îkaûra ûtîgwatia taawa na eegera nyomba na amîcwaa bwega mwanka rîrîa akaamîona?

⁹Amîona, ageeta acoore na atûûri baawe na abeere, ‘Gwîrueni amwe naani nîûntû ndîkwona ciringi yaakwa îrîa îkûûrîte.’

¹⁰Ndîbwîra, o ûu nîu araîka ba Mûrungu bagwîragua rîrîa mwîyia ûmwe airira.”

¹¹Jesû arauga, “Nî kwaarî na muntû ûmwe waarî na ataana baîrî.

¹²Ûmwe waao ûrîa, mûnini areera îthe atîrî, ‘Baaba, nenkera rûgai rwaakwa.’ Tontû bûû, îthe arabagaania into biaawe bobaîrî.

¹³Nyuma ya ntukû inkai mûtaana ûu mûnini, arendia into biaawe bionthe na arajûkia mbeecha areeta nthîgûrû îngî yaarî kûraaja. Arî kûu, nî eenyangîrie into biaawe bionthe mantûûne ja ûmaramari.

¹⁴Akûthiria gûtûmîra bionthe birîa aarî nabio, kûragia mpara înene nthîgûrû îîu na araambîrîria kûthîîna.

¹⁵Tontû bûû, areeta gûcwaa ngûgî kwa muntû ûmwe nthîgûrûûne îîu. Muntû ûu aramwaa ngûgî ya kûrîthia ngûrwe.

¹⁶Nî airîragîîria kûrîa macaû jarîa ngûrwe ciarîjaga, îndî gûtî muntû wamûnenkagîra gantû ga kûrûma.

¹⁷Îndî rîrîa acokere kûthûgaania bwega araciîra, ‘Baaba arî na nthûûmba inyingî, ikûrîa na igatigia, naani ka ngûkuîra gûkû nî mpara!

¹⁸Ngacoka kîrî baaba na mwîre atîrî, “Baaba, nî mbîîtie kîrî Mûrungu na kîrî gwe.

¹⁹Ntîagîri gwîtwa mûtaana waaku kaîrî; njûkia ta ûmwe wa nthûûmba ciaaku.”’

²⁰Tontû bûû, araithuranîra na aragwata rûgendo rwa gûcoka kîrî îthe. Îthe akûmwona arî gataaria, aramwigîîrua kîaao na aroogîa aramûkûmbata, na aramûcûnca.

²¹Mûtaana waawe aramwîra, ‘Baaba, nî mbîîtie kîrî Mûrungu na kîrî gwe. Ntîagîri gwîtwa mûtaana waaku.’

²²Îndî îthe areera nthûûmba ciaawe atîrî, ‘Îteeni na mpwîî bûreete nguû irîa nthongi mono na bûmwîkîre. Ningî bûmwîkîre mbete na iraatû.

²³Ningî bûthînje ndeegwa îrîa noru, tûrîe na tûgwîrue.

²⁴Nîkwîthîrwa mûtaana ûûjû waakwa nîka arakuîte, na nandî akûriûka. Ningî nîka araûrîte na nandî akwonora.’ Baraambîrîria kûrîa na kûgwîrua.

²⁵“Îgiita rîu rîonthe mûtaana waawe ûrîa mûkûrû aarî muundeene. Agûkinya akuî na nja yaao araigua antû bakiina bakîringaga inanda.

²⁶Tontû bûû, areeta nthûûmba îmwe na aramîûria ûrîa gwakarîkaga.

²⁷Nthûûmba îîu îramwîra, ‘Mûtaana wa nyakwe akwîja na abaagu nî oragîre ndeegwa îrîa noru, nîûntû mûtaana ûu agûcoka arî thîîria.’

²⁸Îndî mûtaana ûu mûkûrû arathûûra na ararega gûkûrûka. Îthe araumagara na aramwerenca akûrûke.

²⁹Îndî areera îthe, ‘Ntwîre gûkûritîra ngûgî mîaka îmingî na gûtî rîo ndaregana na waatho bwaaku. Ningî ûtaampa kinya kathenge tûrîa na acoore baakwa tûgwîrîtue.

³⁰Îndî mûtaana waaku, ûrîa weenyangîrie into biaaku ûmaramariine akwîja, nî ûmûthînjîîre ndeegwa îrîa noru!’

³¹Îndî îthe aramwîra, ‘Mûtaana waakwa, wîthagîrwa ûrî amwe naani magiita jonthe, na bionthe birîa ndî nabio nî biaaku.

³²Nî gûkwagîrîte twina na tûgwîrua, nîûntû mûtaana wa nyakwe nîka arakuîte na nandî akûriûka. Ningî nîka araûrîte na nandî akwonora.’”