Read KIMERU BIBLE PROTESTANT EDITION Luk 16 Bible Online

Luk 16 - KIMERU BIBLE PROTESTANT EDITION bible

Luk 16

¹Jesû nî aeere aritwa baawe ngerekano îîjî, “Nî kwaarî muntû gîtonga, ûrîa waandîkîre muntû wa kûmenyeera into biaawe. Gîtonga kîu kîreerwa atî muntû ûu nî eenyangagia into biaawe.

²Tontû bûû, gîtonga kîu kîreeta muntû ûu na kîramwîra, ‘Nî mantû jarîkû jaja nkwigua jakwegiî? Njû mbone këethîra into biaakwa bionthe birî o nîûntû ûtîîta na mbere kûbirûngamîîra kaîrî.’

³Muntû ûu nawe araciîra, ‘Nîatîa nkathithia, nîûntû mwathi waakwa nîka agûmpînga ngûgîîne? Ntî na inya ya kûrîma na nkaigua nthoni gwîta nkîrombarombaga.

⁴Nkûmenya ûrîa nkathithia rîrîa nkeengwa ngûgîîne, nîkenda antû bakangwataga ûgeni mîciîne yaao.’

⁵Tontû bûû, araambîrîria gwîta o muntû o muntû wonthe ûrîa waarî na îrandû rîa mwathi waawe. Arooria ûrîa eetîre mbere atîrî, ‘Ûrî na îrandû rîng'ana rîa mwathi waakwa?’

⁶Muntû ûu aramûcokeria, ‘Nî ndeebe îgaana rîmwe cia maguta.’ Nawe aramwîra, ‘Jûkia arîa twandîkanîrîte na ûgiite waandîke ndîkûrandûra ndebe cia maguta mîrongo îtaano.’

⁷Rîu arooria ûngî atîrî, ‘Naagwe nî îrandû rîng'ana ûrî narîo rîa mwathi waakwa?’ Mwîrandû ûu aramwîra, ‘Nî nkunia îgaana rîmwe cia nkano!’ Nawe aramwîra, ‘Jûkia arîa twandîkanîrîte na ûgiite waandîke ndîkûrandûra nkunia mîrongo înaana cia nkano.’

⁸Rîu gîtonga kîu kîrakumia mûrûngamîîri ûu ûtaarî mwîtîkua nîûntû bwa gûtumîra ûûme bwa gwiteethia. Antû ba nthîgûrû îîjî batumagîra ûûme bwa gwiteethia nkûrûki ya ba ûnene bwa Mûrungu.

⁹Ndîbwîra atîrî, tûmagîreni ûtonga bweenu bûrîa bwonete na njîra cia waayia gûtuma ûcoore, nîkenda rîrîa ûtonga bûu bûkathira, bakabûgwata ûgeni kûrîa bagatûûra kenya na kenya.

¹⁰Ûrîa ûûmba gwîtîkua na into bibikai, oomba gwîtîkua na into bibingî. Ningî ûrîa ûtîûmba gwîtîkua na into bibikai, atîûmba gwîtîkua na into bibingî.

¹¹Rîu këethîra buî bûtaa eetîkua bûgîtumîra ûtonga bweenu nthîgûrûûne îîjî rî, nûû ûkabwîtîkia abwaa ûtonga bwa mma?

¹²Bûkëethîrwa bûtaa eetîkua bûgîtumîra into biaitha rî, nûû ûkabûnenkera birîa birî bieenu?

¹³ Gûtî muntû ûûmba gûtumîkîra athani baîrî nîûntû ga akathûûra ûmwe na eende ûngî kana atumîkîre ûmwe nkûrûki ya ûrîa ûngî. Buî bûtîûmba gûtumîkîra Mûrungu na bûtumîkîra mbeecha.”

¹⁴Afarisayo bakwigua mantû jau jonthe nî bathekeere Jesû, nîûntû nî beendeete mbeecha.

¹⁵Îndî arabeera atîrî, “Buî bûcieethagia babaagîru mbere ya antû îndî Mûrungu nî aijî nkoro cieenu. Nîkwîthîrwa kîrîa Mûrungu amenete nîkîo antû bakumagia.

¹⁶ Waatho bwa Musa na iroria bwatumagîrwa mwanka rîrîa Johana eejîre. Kuuma rîu nî nteto injega ciegiî Ûnene bwa Mûrungu itûmagîîrua, na antû bonthe baciatîkagîîria nîkenda bakûrûka ku.

¹⁷ Nî bûbûûthû îgûrû na nthî kûthira, nkûrûki ya gatemwa kamwe ka Waatho kaûra.

¹⁸ “Muntû ûrîa ûkeenga mwekûrû waawe na agûre ûngî, nîka athûngagîîra. Ningî muntû ûrîa ûgûraga mwekûrû wîngi nî mûkûrû waawe, nîka athûngagîîra.”

¹⁹“Nî kwaarî na muntû ûmwe gîtonga. Eekagîra nguû inthongi cia goro cia rangî ya mûkû. Nî aatûraga kûthithia biatho ntukû cionthe.

²⁰Nkîa îmwe yaarî na ironda mwîrî junthe yeetagwa Lazarû nî yaakaraga nthî akuî na mpingîro ya gîtonga kîu.

²¹Lazarû nî airîragîîria kûewa îrio birîa biagûjaga kuuma meetheene ya gîtonga kîu. Kinya kurû nî cietaga igacûna ironda biaawe.

²²Nkîa îîu nî yaakuîre na îrakamatwa nî araîka îraikua akuî na Abrahamu.

²³Gîtonga kinya kîo kîrakua na kîrathikwa. Nakîo kîrî mwankiine jwa kenya na kenya gîkîthangîkaga nî gîategere bwa îgûrû na kîroona Abrahamu arî kûraaja na Lazarû arî akuî nawe.

²⁴Gîtonga kîu kîreetana na kajû, ‘Itû, Baaba Abrahamu, mbîgîîrua kîaao, na ûtûme Lazarû atombeke mûthia jwa kîara kîaawe rûûjîîne angwîthîrie ntaanta ya rûûjî rûûme rûgîe mpio nîûntû ndî na rwakaî rûrwingî gûkû mwankiine.’

²⁵Îndî Abrahamu aramwîra, ‘Mûtaana waakwa, ririkana rîrîa waarî nthîgûrû nî waarî na into bibingî na Lazarû ataarî na into bibiega bia kûgwîrîrua. Îndî nandî we nîka akûgwîrua naagwe nîka ûkûthangîka nî ûrûrû.

²⁶Amwe na jau nî tûgaanîtue nî mûguuru jûmûnene nîkenda barîa bakwenda kwîja kûu baremwa na barîa bakwenda kuuma kûu beeja naaja tûrî baremwa.’

²⁷Gîtonga kîu kîrauga, ‘Rîu baaba, ndakwerenca ûtûme Lazarû eete mûciî jwa baaba,

²⁸akeere ataana ba chiaa bo-bataano baimenyere batîkeeje kwîja gûntû gûkû kwa mîthangîko.’

²⁹Îndî Abrahamu arauga, ‘Barî na Waatho bwa Musa na ûritani bwa iroria. Tigana nabo baigue ûrîa bagûkaanua.’

³⁰Îndî gîtonga kîu kîrauga, ‘Itû arî, baaba Abrahamu, muntû akëeja kûriûka kuuma kîrî akuû na ageeta kîrî bo bageetîkîîria kwirira.’

³¹Nawe Abrahamu arauga, ‘Bakëethîrwa batiigagua ûrîa Waatho bwa Musa na bwa iroria bûkuuga, gûtî muntû ûgatûma bairira kinya akeethîrwa ariûkîte kuuma kîrî akuû.’”