Read KIMERU BIBLE PROTESTANT EDITION Luk 17 Bible Online

Luk 17 - KIMERU BIBLE PROTESTANT EDITION bible

Luk 17

¹Jesû areera aritwa baawe atîrî, “Mantû ja gûtûma muntû eeyia no mwanka jeeje. Îndî wûi kîrî ûrîa ûkajareta!

²Bwabua muntû ûu akaogeerwa iiga rîa kûthia nkingo na akagerwa îrieene, antû eeja gûtûma ûmwe wa baba baniini eeyia.

³ Imenyeereni! Muntû akëeja gûkwîîria, mûkaanie; na akëeja kwirira mûrekere.

⁴Akëeja gûkwîîria maita mûgwanja ntukû îmwe, îndî na akeeja maita mûgwanja agîkwîraga, ‘Ndîkwirira,’ no mwanka ûmûrekere.”

⁵Atûmwa bareera Mwathani atîrî, “Twongeere wîtîkio bweetû!”

⁶Mwathani arauga, “Bûkëethîrwa bûrî na wîtîkio bûbûnini ta mpîndî ya mûthandûkû, bwoomba kwîra mûkûû jûjû: ‘Kûûka na ûgaciaande îrieene,’ na jûkabwathîkîra.”

⁷Ningî Jesû arabooria, “Nî muntû ûrîkû kîrî buî, arî na nthûûmba yaawe yuumîte kûrima kana yuumîte kûrîîthia ng'ondu, ûmîîra ‘Kûrûka ntûti na ûrîe biakûrîa?’

⁸Anga teeka akamîîra, ‘Îkîra nguû irîa ûtumagîra ûkîruga na ûndugîre biakûrîa. Rîu ûndeetere mpambe ndîe na nyue, naagwe ûcoke ûrîe na ûnyue?’

⁹Nthûûmba îîu îtîcokagîrua nkaatho nîûntû bwa kûthithia ûrîa îbuîrîte kûthithia.

¹⁰Tontû bûû, kinya buî rîrîa bwathithia jonthe jarîa bûkûbuîrîte kûthithia, ugageni atî, ‘Tuî tûrî nthûûmba itîagîrîte, tûthithîrie ûrîa tûbuîrîte kûthithia.’”

¹¹Rîrîa Jesû aarî rûgendoone eetîte Jerusalemu, nî aakûrûkîrîîre mwankeene jwa Samaria na Galili.

¹²Agîtonyaga ntûûreene îmwe nî aatirimanîre na antû îkûmi baajîtue nî mûtigiri.

¹³Antû bau bararûngama gataaria na barakaya bakiugaga, “Itû Jesû Mwathi weetû, twigîîrue kîaao.”

¹⁴ Jesû akûboona arabeera, “Îteeni bûgacionanie kîrî athînjîri-Mûrungu.” Barî njîreene barabua.

¹⁵Rîrîa ûmwe waao oonere akworua aracoka agîkumagia Mûrungu na kajû gakanene.

¹⁶Nî aairingîre nthî mbere ya Jesû aramûcokeria nkaatho. Muntû ûu aarî Mûsamaria.

¹⁷Jesû arooria, “Tî antû îkûmi boorerue? Barîkû bau bangî kenda?

¹⁸Gûtî ûngî ûracoka gûcokeria Mûrungu nkaatho, tiga mûgeni ûûjû.”

¹⁹Rîu Jesû areera muntû ûu atîrî, “Ûkîîra na ûciîtîre nîûntû wîtîkio bwaaku nîbu bwatûma ûbua.”

²⁰Jesû akûûrua nî Afarisayo bamwe rîrîa Ûnene bwa Mûrungu bûkeeja, nî aabeerîre atîrî, “Ûnene bwa Mûrungu bûtîîja bûkionagwa bwîrwa nîbu bûbû!

²¹Ningî gûtî muntû ûkoomba kuuga, ‘Tegeeni bûrî aja!’ Kana auga, ‘Tegeeni bûrî arîa!’ Nîkwîthîrwa Ûnene bwa Mûrungu nî kîrî buî bûrî.”

²²Rîu areera aritwa baawe, “Îgiita rîgakinya rîrîa bûkairîrîria kwona Mûtaana wa Muntû kinya noo ntukû îmwe îndî bûtîmwona.

²³Antû bakabwîra, ‘Tegeeni arî arîa!’ Kana babwîre, ‘Tegeeni arî aja!’ Buî menyeni bwîta, kana bûbathingata.

²⁴Nîkwîthîrwa ntukû îrîa Mûtaana wa Muntû akeeja akoonwa nî antû bonthe o ta ûrîa rweni rwenagia rûkoonwa îgûrû rîonthe.

²⁵Îndî mbere no mwanka aambe athangîkue mono na aregwe nî nthukî îîjî.

²⁶ O ta ûrîa gwakari îgiiteene rîa Noa, nîu gûkeethîrwa gûkari rîrîa Mûtaana wa Muntû akeeja.

²⁷ Antû nî baarîîjaga na bakanyua, na nî baagûranaga na bakagûrwa, mwanka ntukû îrîa Noa aakûrûkîre ndeene ya sabina. Mbura ya maburiko nî yaurîre na îrathiria antû bonthe.

²⁸ Gwakari o ta ûu îgiita rîa Loti. Antû nî baarîîjaga na bakanyua, na nî baagûranaga na bakagûrwa. Nî baandaga mbeeû na bagaaka nyomba.

²⁹Îndî ntukû îrîa Loti aaumagarîre Sodomu, nîrîo ngai ya mwanki jwa ûbiriti yaurîre kuuma îgûrû na îraîthia antû bonthe.

³⁰O ûu nîu gûgakara ntukû îrîa Mûtaana wa Muntû akoonanua.

³¹ Ntukû îîu muntû ûrîa ûkeethîrwa arî îgûrûgûrû rîa nyomba, agákinya nthî kûjûkia into biaawe birîa birî nyomba. Ningî ûrîa ûkeethîrwa arî muundeene, agácoka nja.

³² Nî bûkûririkana mwekûrû wa Loti!

³³ Muntû wonthe ûrîa ûcwaga kwonokia ûtûûro bwaawe akabwaga. Îndî ûrîa ûraîrwa nî ûtûûro bwaawe akabwonokia.

³⁴Ndîbwîra atî, ûtukû bûu, antû baîrî bakeethîrwa bamami gîtandeene kîmwe na ûmwe ajûkue na ûngî atigwe.

³⁵Eekûrû baîrî bakeethîrwa bagîkiaga barî amwe, na ûmwe ajûkue na ûngî atigwe. [

³⁶Antû baîrî bakeethîrwa barî muundeene jûmwe na ûmwe ajûkue na ûngî atigwe.]”[2]

³⁷Aritwa baawe baramûûria atîrî, “Mwathani, nîkû mantû jaja jagakarîka?” Nawe arabeera, “Arîa kiimba kîrî, nîo nderi ciûthûranaga.”