Read KIMERU BIBLE PROTESTANT EDITION Luk 18 Bible Online

Luk 18 - KIMERU BIBLE PROTESTANT EDITION bible

Luk 18

¹Jesû nî aeere aritwa baawe ngerekano îîjî akîbaritana nî babuîrîte kûromba Mûrungu magiita jonthe batîkûnoga.

²Nî aabeerîre, “Ntûûreene îmwe nî kwaarî na mûgambi ûmwe ûtakîraga Mûrungu kana atatîaga muntû kinya ûrîkû.

³Ntûûreene îîu nî kwaarî na ntigwa yaatwîre gwîta kîrî mûgambi ûu îkîmwîraga, ‘Giita na îota îgamba rîrî nkûgamba na mûnthû waakwa.’

⁴Mûgambi ûu nî aatûrîre akîregaga gûteethia ntigwa îîu. Îndî nyumeene araciîra atîrî, ‘Kinya këethîra ntîkîraga Mûrungu kana nkîra muntû noo ûrîkû,

⁵nkathikîîra ntigwa îîjî na ngiite îgamba rîrî nîûntû îgeeta na mbere kûnthangîkia îkîîjaga kîrî ni.’”

⁶Mwathani arabeera atîrî, “Bûkwigua ûrîa mûgambi ûrîa ûtagiitaga magamba na îota aathithîrie.

⁷Ka Mûrungu atîthikîîra barîa athuurîte, barîa bamûrîragîra ûtukû na mûthenya? Ka akathaa atîrabateethia?

⁸Ndîbwîra atî, akabateethia na mpwîî. Amwe na jau rî, rîrîa Mûtaana wa Muntû akeeja, akeethîra antû barî na wîtîkio gûkû nthîgûrû?”

⁹Jesû akîarîria antû barîa baciîtîkîtie atî nî babaagîru na bakamena bangî, nî aabaeere ngerekano îîjî:

¹⁰“Antû baîrî nî baitîrie kîûrûûne kûromba. Ûmwe waao aarî Mûfarisayo na ûngî aarî mûritithia ûgoti.

¹¹Mûfarisayo nî aarûngamîre na araromba akiugaga, ‘Mûrungu, nî ngûgûcokeria nkaatho nîûntû ntîkari ta antû bangî; bo nî atuunyani, antû bathithagia mantû jamathûûku na athûngîîri. Ntîkari kinya ta mûritithia ûgoti ûûjû.

¹²Nî nciataga biakûrîa maita jaîrî o kiumia na nkarita gîchunchî kîmwe kuuma kîrî îkûmi kîa into bionthe birîa mbonaga kuumania na ngûgî ciaakwa.’

¹³Îndî mûritithia ûgoti ararûngama gataaria na arakîra kûraithîria îgûrû, na arairingaringa kîbara akîugaga, ‘Itû Mûrungu, mbigîîrua kîaao, nîûntû ndî mwîyia!’

¹⁴ Ndîbwîra mûritithia ûgoti nî aanîre arekeri meeyia jaawe, îndî Mûfarisayo atarekeerwe. Nîkwîthîrwa o muntû ûrîa wineneagia akanyiiua îndî ûrîa winyiiagia akaneneua.”

¹⁵Antû nî baikîîrie Jesû twana tûnyî atûrîîkîra njara atûtharima. Aritwa bakûboona bararigîria antû bau.

¹⁶Îndî Jesû areeta twaana na arauga atîrî, “Rekeeni twaana twîje kîrî ni. Bûgátûgiiria nîkwîthîrwa Ûnene bwa Mûrungu nî bwa twaana ta tûtû.

¹⁷Ndîbwîra na mma atî, o muntû wonthe ûrîa ûtîtîkîîria Ûneneene bwa Mûrungu ta kaana kanyi, atîkorokûrûka ku.”

¹⁸Mûtongeeria ûmwe aramûûria, “Mûritani ûmwega, nkathithia atîa nîkenda mboona ûtûûro bwa kenya na kenya?”

¹⁹Jesû aramwîra, “Nîkî ûkûmbîta ûmwega? Gûtî ûmwega tiga Mûrungu wenka.

²⁰ Nî ûkûmenya Maathana: Ûkáthûngîîra, na Ûkóragana, na Ûkáiya, na Ûkárita ûkûûjî bwa ûrongo, na tîyaga abaagu na nyakwe.”

²¹Nawe arauga, “Nî ntwîre kûthithia jau jonthe kuuma wîthî bwaakwa.”

²²Rîrîa Jesû aigîrue ûu, aramwîra atîrî, “Nî wagîîte ûntû bûmwe bunka. Endia bionthe birîa ûrî nabio na ûgaîre nkîa mbeecha îîu, naagwe ûkeethîrwa ûrî na ûtonga îgûrû. Wathithia ûu, wîje ûnthingate.”

²³Îndî rîrîa aigîrue ûu araigua bûbûûî nîûntû nî aarî gîtonga gîkînene.

²⁴Jesû akwona ûrîa muntû ûu aaigîrue bûbûûî arauga, “Kûrî na inya itonga gûkûrûka Ûneneene bwa Mûrungu!

²⁵Nîkwîthîrwa nî bûbûûthû nkamîîra gûkûrûkîîra gakûthoone ga cindano, nkûrûki ya gîtonga gûkûrûka Ûneneene bwa Mûrungu.”

²⁶Antû barîa baigîrue ûu barooria, “Rîu nûû ûûmba kwonoka?”

²⁷Jesû arauga, “Mantû jarîa jatîûmbîkaga kîrî antû nî joombîkaga kîrî Mûrungu.”

²⁸Peterû arauga, “Nî tûtigîte into bieetû bionthe twakûthingata.”

²⁹Jesû arabeera, “Ndîbwîra na mma atî, gûtî muntû ûtigîte nja yaawe kana mwekûrû, kana ataana ba ng'ina, kana aciari, kana aana baawe, nîûntû bwa Ûnene bwa Mûrungu,

³⁰ûtîeewa îtuui mainda jamaingî mono îgiiteene rîrî, na mûthieene aewa ûtûûro bwa kenya na kenya.”

³¹Jesû nî aireberie aritwa barîa îkûmi na baîrî arabeera, “Twîtîte Jerusalemu, na mantû jonthe jarîa iroria biaandîkîre jegiî Mûtaana wa Muntû jakoojûra.

³²Akanenkanîrwa kîrî antû barîa batî Ayahudi na bakamûthekera na bamûthithîrie mantû ja nthao na bamûrume na bamûtwîre mata.

³³Bakamûûra na bamûûrage, îndî ntukû ya ithatû akariûka.”

³⁴Aritwa nî baaremerwe gûciûra ûrîa aabeeraga nîûntû bataaeei ûmenyo bwa gûciûra mantû jau. Tontû bûû, batamenyere ûrîa Jesû abeeraga.

³⁵Rîrîa Jesû aakinyîre akuî na Jeriko, nî eethîîre muntû ûmwe mûtumuumu akari nthî rûteere rwa njîra akîrombaga ûteethio.

³⁶Rîrîa muntû ûu aigîrue ntundu îkûrûkîte nî oroorie ûrîa gwakarîkaga.

³⁷Antû baramwîra, “Nî Jesû wa Nazarethi ûkûrûkîte.”

³⁸Muntû ûu areetana, “Jesû Mûtaana wa Daudi, mbigîîrua kîaao!”

³⁹Antû barîa baarî mbere baramwîra atîge gwîtana. Îndî areeta na mbere gwîtana na inya nkûrûki, “Mûtaana wa Daudi, mbigîîrua kîaao!”

⁴⁰Jesû ararûngama na arauga atî muntû ûu aikue kîrî we. Muntû ûu agûkinya akuî, Jesû aramûûria,

⁴¹“Nîatîa ûkwenda nkûthithîria?” Nawe arauga, “Mwathani, ndîenda kwona.”

⁴²Jesû aramwîra, “Ambîria kwona. Wîtîkio bwaaku bûgûtûma worua.”

⁴³O rîu araambîrîria kwona na arathingata Jesû agîkumagia Mûrungu. Antû bonthe bakwona ûu, nî baakumîrie Mûrungu.